A crise industrial cronifícase tras caer a actividade un 31,9% desde o ano 2008

A comisión de Industria, Enerxía, Comercio e Turismo do Parlamento debateu esta cuarta feira unha iniciativa sobre a actividade industrial na Galiza. A proposta, defendida polo deputado nacionalista Brais Ruanova, reclamaba a posta en marcha dun paquete de medidas dirixidas a reverter a crise industrial, que, entre outras cuestións, contemplaba medidas para avanzar no feche de ciclos produtivos e en frear a deslocalización empresarial. A alternativa foi rexeitada polo Partido Popular, que por boca do seu parlamentario Argimiro Marnotes, cuestionou a legalidade dalgunhas das demandas. Precisamente, a iniciativa chegou á Cámara galega nun momento en que os principais indicadores para determinar a situación do sector industrial na Galiza están en vermello. Así, o índice de produción industrial (IPI), que achega información sobre o estado da industria nun territorio, rexistrou unha caída de 5,9% nos primeiros catro meses deste ano, pasando de situarse en 101,6 puntos en xaneiro de 2025 a 95,7 en abril. Ao tempo, a industria galega presentou nese período un peor comportamento que a estatal, cuxo descenso foi de 4%. A crise do sector industrial non ten un carácter conxuntural na Galiza. O índice de produción industrial (IPI) situouse en abril de 2025, último mes con cifras, por baixo dos niveis de 2008, o que evidencia que o complexo industrial non logrou recuperar a actividade previa á Gran Recesión. Neste sentido, o IPI alcanzou en abril dese ano 140,4 puntos. Así, atópase 31,9% por baixo dos valores de 2008, de maneira que non conseguiu volver, en ningún dos exercicios, aos números anteriores ao comezo da crise. A evolución do IPI A actividade industrial na Galiza durante este período amosou un peor comportamento que no Estado. Mentres en abril de 2008 o IPI galego superaba en 2,4% o estatal, 17 anos despois fica 2,8% por detrás, nunha tendencia que se acelerou durante os anos de Goberno de Alberto Núñez Feixoo e continuou con Alfonso Rueda. Na mesma dirección, a industria manufactureira galega presentou unha peor produtividade que a estatal, situándose nun 72,1% da media estatal en termos de postos de traballo equivalente a tempo completo (Ptetc) e nun 73,6% en termos de horas traballadas. Os indicadores de emprego inciden na cronificación da crise do complexo industrial galego, iniciada ao comezo da Gran Recesión, á volta de 2008. A este respecto, o Instituto Galego de Estatística (IGE) incide en que en marzo dese ano o sector ocupaba 216.000 persoas en toda a Galiza, ficando en 183.300 en marzo de 2025, último mes con datos. Neste sentido, a industria destruíu nese período 32.700 postos de traballo, reducíndose a ocupación no complexo industrial galego en 15,2%. A caída do emprego A caída de emprego na industria contrasta co acontecido no sector servizos. Mentres entre 2008 e 2025 o sector industrial perdeu na Galiza 32.700 persoas, pasando de representar 18% a 15,6% do emprego total, o sector servizos gañou 57.300 traballadores e traballadoras, saltando de 735.400 ocupados en marzo de 2008 a 810.500 no mesmo mes de 2025. Neste sentido, o peso dos servizos no mercado laboral incrementouse en termos porcentuais en 9,4 puntos desde 2008, representando na actualidade o 72,7% do emprego total na Galiza. O catedrático xubilado de Economía da Universidade de Vigo e especialista en política industrial Xosé Luís Outes Ruso explica a Nós Diario que "a peor parte da crise industrial padécena as pequenas e medianas empresas, que son as que carecen de capacidade de financiamento e que deben, por tanto, acudir aos créditos bancarios". A este respecto, Outes Ruso indica que "os xuros bancarios que pagan as empresas na Galiza atópanse un 7% por riba do que pagan en países como Alemaña ou Holanda" e, neste sentido, aposta por instrumentos financeiros públicos para impulsar a actividade industrial. Un total de 4.090 industrias fecharon no país desde o exercicio de 2008. Segundo os datos achegados polo IGE, a finais desa anualidade, a Galiza contaba con 17.190 empresas dedicadas a esa actividade, ficando ao remate 2023, último ano con datos, en 13.100. Así, a redución do tecido industrial mantívose constante ao longo de todo o período, destacando pola súa intensidade os primeiros anos da Gran Recesión e o ciclo económico aberto a partir de 2018, acelerado posteriormente pola pandemia e pola crise de prezos. O sector público Outes Ruso aposta por un maior peso do sector público como vía para dinamizar a actividade industrial na Galiza. Nesta dirección, defende, entre outras propostas "a posta en marcha dunha axencia enerxética galega" e dunha "empresa pública industrial galega, que debe comezar pola nacionalización da factoría de Alcoa na Mariña, privatizada polo Goberno de Aznar no anos 90" e "dun holding público de empresas do sector naval con Navantia, outros estaleiros e a industria auxiliar do sector". A automoción perdeu 1.200 empregos na Galiza en 2024 O sector da automoción destruíu 1.200 empregos en 2024 na Galiza. Segundo as cifras ofrecidas polo Clúster de Automoción de Galicia (Ceaga), o complexo ocupaba ao remate da anualidade 23.600 persoas, fronte as 24.800 de 2023. A perda do emprego produciuse nun contexto de grandes incertezas no conxunto do conglomerado do automóbil. Xosé Luís Outes Ruso amósase pesimista sobre o futuro do sector da automoción na Galiza. A este respecto, sinala que "a nivel mundial a produción de vehículos xa superaba nun 25% a demanda antes de que aparecese o coche eléctrico ou híbrido" e alerta de que "a composición do produto final coche eléctrico ten bastante pouco que ver cos coches que coñecemos, polo que vai orixinar mudanzas na industria dos compoñentes". "Vexo mal o sector do automóbil na Galiza", conclúe Outes, quen considera que "a industria europea do automóbil ten moi complicado competir coa chinesa, cuns prezos moi inferiores e cunha tecnoloxía case sempre superior". Na mesma liña, entende que "o problema está en que as decisións de Stellantis non se toman aquí, tómanse fóra" e lembra que a multinacional é unha empresa de capital estadounidense, francés e italiano.