O cooperativismo agrupa na Galiza 78.000 persoas e factura 3.500 millóns

O cooperativismo vive un bo momento na Galiza. O ano pasado creáronse 192 cooperativas, 174 delas de traballo asociado, onde as súas integrantes son persoas socias e asalariadas, que sitúan o país como o segundo territorio do Estado, só por detrás de Andalucía, en constitución deste tipo de entidades económicas. 2024 fechou con máis de 2.000 cooperativas, 50% das cales están presididas por mulleres, que conforman 45% da súa base asociativa. A xerente de Unión Cooperativas (EspazoCoop), Lucía Mendoza, destaca a Nós Diario a importancia do cooperativismo como "un dos motores económicos que contribúe ao desenvolvemento local e sustentábel", e apunta que "representa 7% do produto interior bruto (PIB) galego". Nesta orientación, afirma que "son empresas máis resilientes, con capacidade para afrontar crises económicas, cun modelo de xestión democrático e un reparto de beneficios equitativo". A Xunta cifra a facturación do conglomerado cooperativo galego en 2024 en 3.500 millóns de euros. "O cooperativismo galego representa moito máis que unha fórmula empresarial", continúa Mendoza, para quen "é unha maneira de entender a economía desde a colaboración, o arraigo co territorio e a aposta polo ben común". Nesta liña, sinala que "está presente en sectores tan diversos como o agro, os servizos, o ensino ou a atención social", dado que as cooperativas "teñen un papel protagonista na articulación do tecido produtivo galego, especialmente no medio rural". Ana Olveira, presidenta de EspazoCoop e autora dunha tese de doutoramento titulada O modelo cooperativo como organización que favorece a participación das mulleres na xestión empresarial e no emprendemento, indica a Nós Diario que "realmente o que fai o cooperativismo é impedir que o impacto da economía galega vaia fóra e facer que repercuta no país". Nas cooperativas, di, "hai mellores condicións laborais, non hai practicamente discriminación salarial entre homes e mulleres e concíliase máis". A profesora do departamento de Organización de Empresas e Comercialización da Universidade de Santiago de Compostela María Bastida apunta a Nós Diario que "nos últimos anos as cooperativas se consolidaron como ferramenta de autoemprego, en particular entre a mocidade, e como vía para dinamizar economías locais e fixar poboación". Neste punto, incide en que "son especialmente útiles para responder a necesidades reais da comunidade, adaptarse a contornos cambiantes e impulsar unha economía con valores". "O modelo cooperativo destaca por promover unha economía máis democrática, inclusiva e sustentábel", explica Bastida. Fronte a outros modelos empresariais "baseados exclusivamente no lucro", as cooperativas "priman as persoas, a participación e o compromiso co territorio". Neste sentido, revela que "permite compartir riscos, distribuír beneficios de forma equitativa e tomar decisións colectivas, favorecendo a creación de emprego estábel, o arraigamento local e a cohesión social". Os retos de futuro O movemento cooperativo galego ten pendentes tarefas importantes para o futuro. A este respecto, Bastida indica que "o cooperativismo tamén enfronta retos, como a necesidade de reforzar a igualdade de xénero, avanzar na consolidación de proxectos, potenciar sectores estratéxicos como o mar ou o agro e depurar o rexistro de entidades inactivas". Olveira considera necesaria "a reforma da Lei de cooperativas de 1998", porque "a realidade do cooperativismo galego de hoxe non ten nada a ver coa daquel momento e é urxente que se adapte a realidade do realidade do tecido productivo cooperativo". Ao tempo, demanda "unha acción de gobern