O Consello de Ministros que aprobará as medidas 'anticrise', atrasado ante a negativa de Sumar a excluír medidas sobre vivenda

O Consello de Ministros extraordinario para abordar o decreto 'anticrise' pola guerra no Irán atrasouse esta sexta feira ante a negativa dos membros de Sumar a que dea comezo se se deixa fóra a prórroga dos contratos de aluguer e medidas de control ás marxes empresariais. Fontes do socio minoritario da coalición explicaron que o Consello aínda non empezou e que aínda se segue negociando para tratar de incluír estas dúas iniciativas no texto. "Isto non pode quedar fóra da resposta 'anticrise', isto non pode ser un mero decreto de rebaixa de impostos", apostilaron.

Os ministros e ministras de Sumar xa viñan presionando para introducir elementos de mellora ao acceso á vivenda e de control de prezos neste plan anticrise, así como estabelecer un mecanismo de control para evitar que a redución de tributos implique para as empresas beneficios extraordinarios inxustificados.

Esta mesma mañá o voceiro adxunto de Sumar e deputado de Compromís, Alberto Ibáñez, reprochou ao PSOE que se "escuda excesivamente nas dereitas" con medidas baseadas na rebaixa de impostos e, pola contra, "féchase" a impulsar medidas en materia de vivenda no decreto 'anticrise' que os socios do Gobierno de coalición negocian para paliar as consecuencias da guerra no Irán.

Moncloa está a ultimar aínda o seu plan de medidas para paliar o impacto económico derivado da agresión dos Estados Unidos e Israel sobre o país persa, no que baralla incluír a rebaixa do IVE dos carburantes de 21% a 10%, segundo confirmaron fontes coñecedoras do contido do decreto citadas pola axencia Europa Press. Esta rebaixa contrastaría coa bonificación universal de 20 céntimos por litro de combustíbel que o Goberno español aprobou en 2022 para paliar os efectos da guerra en Ucraína.