Cales son as principais novidades do decreto contra a crise anunciado por Pedro Sánchez?

Impostos sobre a electricidade e o gas natural IVE dos alimentos Banca e enerxéticas Axudas ao transporte Ingreso Mínimo Vital Eficiencia enerxética Axudas e despedimentos Mudanza nas hipotecas Impostos sobre a electricidade e o gas natural As baixadas de impostos vinculadas coa electricidade e co gas natural que estaban vixentes, en moitos casos desde verán de 2021, para facer fronte ao impacto da crise inflacionista, serán retiradas de "maneira gradual", segundo anunciou esta cuarta feira o presidente do Executivo español, Pedro Sánchez. Como é a nova reforma do mercado eléctrico a UE? Cal é a medida clave e cando entrará en vigor? Desta forma, o Consello de Ministras e Ministros acordou ir retirando de modo gradual as baixadas do Imposto sobre o Valor Engadido (IVE) da electricidade, que caera de 21% a 5%; do Imposto sobre o Valor da Produción de Enerxía Eléctrica (Ivpee), que baixara de 7% a 0%, así como do Imposto Especial Eléctrico (IEE), que descendera desde 5,1% até 0,5%. No caso da electricidade, o IVE situarase en 10% durante todo 2024, o IEE estará en 2,5% durante o primeiro trimestre do ano e en 3,8% durante o segundo, e o Ivpee terá un tipo de 3,5% até marzo e de 5,25% até xuño, segundo a prórroga de varias das medidas temporais estabelecidas para facer fronte á crise enerxética, cuxa vixencia terminaba este 31 de decembro. Nas subministracións de gas natural, o IVE situarase en 10% durante os primeiros tres meses de 2024 -até agora 5%-, para recuperar o seu nivel de 21% unha vez pasado o período invernal. Porén, manterase o tipo de 10% para os combustíbeis de biomasa durante todo o ano. As subministracións de calor seguirán esa mesma pauta pasado o inverno, dependendo da súa orixe fósil (21%) ou renovábel (10%). Seguirá tamén até o 30 de xuño de 2024 a prohibición de interromper por falta de pagamento as subministracións básicas de electricidade, auga e gas natural ás persoas usuarias vulnerábeis, así como os descontos do bono social eléctrico de 65% para as persoas usuarias vulnerábeis, de 80% para as usuarias vulnerábeis severas e de 40% para os fogares de clase traballadora que teñan baixos ingresos. Por outra parte, mantéñense os límites aplicados ao crecemento da Tarifa de Último Recurso de gas (TUR), que impiden un incremento de custo da materia prima por encima de 15%, limitando a suba trimestral aproximadamente a 5%, así como a existencia da TUR veciñal, á que poden acollerse as comunidades de veciñanza con calefacción central a través de gas natural. Igualmente, o prezo máximo que poderá alcanzar o butano seguirá estabelecido en 19,55 euros por bombona. Así mesmo, os cargos da electricidade na factura manteranse en 2024 no mesmo nivel que agora, isto é, ao redor de 55% por baixo do nivel que mantiñan no ano 2021. IVE dos alimentos A rebaixa do IVE dos alimentos seguirá até o vindeiro 30 de xuño. Desta maneira, produtos como o pan, os ovos, a froita e as verduras seguirán cun tipo de 0%, mentres que o aceite e as pastas alimenticias continuarán cun tipo rebaixado de 5%. Non obstante, seguirán excluídos desta rebaixa outros alimentos básicos como a carne ou o peixe. A carne e mais o peixe seguirán exentos das rebaixas do IVE Banca e enerxéticas Sánchez anunciou, así mesmo, a prórroga por un ano máis dos gravames aos beneficios extraordinarios tanto do sector financeiro como do sector enerxético e avanzou a intención de facer permanente ambos os tributos. A banca do Estado español é a máis vulnerábel aos riscos xeopolíticos de toda a UE Porén, no caso do gravame enerxético, o presidente español explicou que se van introducir modificacións na Lei Xeral de Orzamentos para que se poidan deducir desde o 1 de xaneiro os investimentos "estratéxicos" vinculados con proxectos industriais e coa descarbonización do sistema produtivo estatal. As enerxéticas poderán deducir investimentos "estratéxicos" na tributación O decreto tamén contempla a futura revisión de ambos os gravames (á banca e ás enerxéticas) "para a súa plena integración no sistema tributario", e prevé a concertación de ambos os impostos con Euskadi e Nafarroa. O decreto tamén prorroga a aplicación do Imposto Temporal de Solidariedade das Grandes Fortunas mentres non se produza a revisión da tributación patrimonial nas autonomías, circunstancia que está vinculada á reforma do sistema de financiamento autonómico. Axudas ao transporte O Goberno español volveu prorrogar para todo 2024 a gratuidade dos trens de proximidade e de Media Distancia para usuarias habituais, así como os descontos de 50% no transporte de competencia autonómica. As bonificacións do transporte estenderanse, para toda a poboación, até decembro de 2024 Como pasou até agora, as autonomías deberán achegar 20% do desconto para que o Estado acometa a transferencia dos fondos para subvencionar a rebaixa de 30% nos abonos multiviaxe. Tamén seguirá habendo billetes gratuítos nos autobuses de competencia estatal, así como descontos de 50% nos trens Avant. O BNG amosou a súa conformidade coa prórroga das axudas aos bonos de transporte para 2024, incluída no acordo en materia de transporte asinado co PSOE para a investidura de Pedro Sánchez. Neste sentido, a forza nacionalista ve positivo o avance nunha das medidas recollidas no acordo de investidura. Ingreso Mínimo Vital O Executivo español aprobou tamén a cesión da xestión do Ingreso Mínimo Vital (IMV) ás autonomías con réxime común que o soliciten para equiparalas coas de réxime foral (Euskadi e Nafarroa), que xa o tiñan cedido. Fontes da Xunta da Galiza sinalaron esta cuarta feira que solicitarán proximamente unha reunión bilateral para analizar e estudar conxuntamente as condicións. "Na Galiza valoramos positivamente o anuncio do traspaso da xestión do IMV ás comunidades de réxime común", aseguraron. Eficiencia enerxética Por outra parte, esténdense até o 31 de decembro de 2024 todas as medidas destinadas ás reformas que axuden a realizar un consumo máis sostíbel de enerxía, xa sexa en casas particulares ou en bloques de veciñanza. Estas axudas, vinculadas ao Plan de Recuperación, Transformación e Resiliencia, permitirán deducir 20%, 40% ou 60% do Imposto sobre a Renda das Persoas Físicas (IRPF) a quen impulse estas actuacións sobre as súas propiedades. Xunto ao anterior, tamén se prorrogan as facilidades de amortización para os investimentos que utilicen enerxía de fontes renovábeis. Axudas e despedimentos As empresas que se acollan ás medidas de redución de xornada ou suspensión de contratos por sobrecustos da enerxía e que se beneficien de apoio público non poderán xustificar despedimentos obxectivos baseados no aumento dos custos enerxéticos até o próximo 30 de xuño. Mudanza nas hipotecas Tamén se estenderán durante 2024 as medidas de eliminación das comisións ou compensacións bancarias pola amortización anticipada das hipotecas a tipo variábel, a conversión dos préstamos a tipo fixo e a gratuidade das conversións de tipo variábel a tipo mixto.