Hipotecas e préstamos xeran á banca 26.711 millóns de euros en beneficios en 2023

O Goberno español aprobou esta terza feira no Consello de Ministras e Ministros a liña de avais a través do Instituto de Crédito Oficial (ICO) para acceder á entrada da compra dunha vivenda para mozas e mozos e familias con menores a cargo. A medida non entra a valorar o prezo nin as condicións de acceso a un fogar. O economista Manoel Barbeitos razoa, en conversa con Nós Diario, que "estas medidas [aprobadas tamén pola Comunidade de Madrid e a Xunta da Galiza] seguen o xogo dos bancos, son avais e hai que devolvelos polo que as entidades bancarias nunca perderán", explica, "mais non tocan o problema de fondo que é que non se axusta a oferta á demanda, cando sabemos que hai vivendas abondo no mercado", engade. A suba de xuros deixa a compra de vivenda en mans de quen pode pagar ao contado: as hipotecas seguen caendo na Galiza O negocio inmobiliario Os bancos continúan apostando polo negocio inmobiliario, mais agora non é a construción de nova vivenda a súa principal opción. Unha das razóns é o número de vivendas baleiras que hai no país. A propia Sociedade de Xestión de Activos Procedentes da Reestruturación Bancaria (Sareb) indica que quedan na Galiza 2.035 vivendas por vender e a Federación Galega de Empresas Inmobiliarias (Fegein) indica que en 2023 houbo un mínimo histórico de inmóbeis novos ao contabilizar un total de 17.730. Os maiores ingresos na vivenda nestes momentos, polo tanto, proceden das hipotecas e das súas comisións, así como doutros elementos, por exemplo, os seguros de impago de alugeres. A sinatura de hipotecas sobre vivendas diminúe 11,8% en outubro na Galiza Beneficios malia o descenso de préstamos Segundo os últimos datos publicados polo Centro de Información Estatística do Notariado, correspondentes ao mes de novembro, a Galiza viviu un encarecemento anual do prezo dos pisos de 41,8%, cunha media de 1.726 euros/metro cadrado. Isto explicaría unha redución interanual, ese mesmo mes, de 15,5% dos préstamos hipotecarios para adquisición de vivenda no país. Malia este descenso, as entidades bancarias mostraron músculo e anunciaron beneficios récord a través dos empréstitos que sumaron entre as cinco entidades máis importantes do Estado español (CaixaBank, Santander, BBVA, Sabadell e Bankinter) a cifra de 26.000 millóns de euros que, no caso de Abanca, é de algo máis de 711 millóns de euros (+217% con relación a 2022), entre os que figuran créditos a familias e empresas no Estado español (+14%) e en Portugal (+15,3%), cun total de case 9.000 millóns de financiamento concedido. 24 anos a un tipo medio de 3,26%: a sinatura de hipotecas segue en caída cos xuros máis altos en sete anos O mesmo informe da entidade notarial sinala que o penúltimo mes de 2023 rexistráronse 41,5% das compravendas rexistradas na Galiza. En novembro financiáronse os 978 préstamos hipotecarios concedidos ese mes, unha porcentaxe que contrasta coa media estatal de 42,7%. Ademais, a contía media dos préstamos situouse nos 107.022 euros (-5,5%) e supuxo de media 71,8% do prezo do inmóbel, por un 71% no conxunto do Estado español. A vivenda como negocio Para Barbeitos, o maior problema no tema da vivenda consiste na “excesiva dependencia que hai das entidades bancarias” e en que “a adquisición por parte das familias do seu fogar remata agora por entrar na lóxica do negocio financeiro”. Neste sentido, considera que o que debería ser “un ben público” réxese polas “leis do mercado no que entra a especulación”. A sinatura de hipotecas sobre vivendas cae 24,8% en agosto na Galiza, dous puntos máis que a media estatal Pola contra, este economista entende que os bancos deberían ocupar "un lugar secundario na política de vivenda e non determinala". É "a lóxica" que para Barbeitos implica "obter a máxima rendibilidade co mínimo investimento e no prazo máis curo de tempo". No caso das hipotecas, ademais de contar cun 20% do valor da vivenda, os custos pola apertura, taxas de xestión e impostos chegan a ser de 10%. Seguros de impago As entidades bancarias, no tema inmobiliario, engaden máis produtos ás hipotecas que lles xeran aínda máis beneficios: son os seguros de protección de pagos. Os propios bancos contan cunha liña de seguros que ofrecen como cobertura adicional, nalgúns contratos de maneira obrigatoria, válida exclusivamente para a protección de pago en caso de desemprego ou incapacidade temporal, que garante a amortización de hipotecas, préstamos de consumo, tarxetas de crédito e outras operacións de financiamento durante a compra. A renegociación de hipotecas alcanza o máximo histórico no mes de abril O seu importe calcúlase sobre o total do préstamoe, de media, a maioría oscila entre 1% e 1,5% do importe da hipoteca. Ademais, as entidades "bonifican" o seu tipo de xuros aos clientes que contraten produtos, como seguros ou tarxetas de crédito. Segundo a Asociación de Usuarios Financeiros, as hipotecas con bonificación supoñen pagar até 1.987 euros máis ao ano. Sacar a vivenda baleira ao mercado O economista Manoel Barbeitos considera que unha solución ao problema do acceso á vivenda na Galiza sería pór en circulación toda a vivenda baleira que hai no país. Neste sentido, e segundo o último informe sobre este tema publicado polo Observatorio de Vivenda da Galiza, en 2021 había un total de 1.757.739 vivendas das que 90.929 estaban baleiras, polo que se constata un incremento de 74% por cada 100 habitantes en relación ao ano 2011.