O ano de pandemia aumentou en 10 puntos os fogares galegos que chegan mal a fin de mes

Un ano de pandemia deixa pegada tamén na economía dos fagores galegos. Hai agora un 20% máis de fogares que chegan mal a fin de mes dos que había no primeiro trimestre do ano pasado, antes da irrupción con forza da pandemia e as súas consecuencias no plano económico.

Segundo os datos publicados polo Instituto Galego de Estatística (IGE) o mes pasado, no primeiro trimestre de 2021 aumentou a pobreza ao se disparar os casos en que se chega con dificultade ou moita dificultade a final de mes, até supor un 58% do total, unha porcentaxe 10 puntos maior que un ano antes, cando era de 48%. 

Afondando na distribución, os fogares que chegan con dificultade a final de mes son 47,06% e os que rematan cada mes con moita dificultade, 10,01%, achegándose entre ambos os dous a ese 60%. Pola contra, 47,3% di que chega con facilidade ou moita facilidade. 

 10% dos fogares rematab o mes "con moita dificultade"

Deste modo, os fogares con dificultades superan o 50% por cuarto trimestre consecutivo, algo que antes do impacto da pandemia non ocorría desde o primeiros tres meses de 2018.

Ingresos a partir das prestacións

A dependencia dos fogares de ingresos que non proceden de relacións laborais actuais é cada vez maior. O propio IGE publicaba o pasado mes de xaneiro que 41,8% dos fogares da Galiza teñen nas prestacións a súa principal entrada económica. 

Unha porcentaxe levemente superior á de fogares nesa situación hai unha década, en 2010 (41,6%), mais que se traduce en que en 2019 (último ano computado pola institución, antes da pandemia) había case 447.000 fogares na Galiza na que a súa vía de ingresos máis importante derivaba das prestacións (xubilación, incapacidade, desemprego etc.) polo que o aumento se traducía en case 10.000 fogares máis que en 2010.

Un informe elaborado por Oxfam e presentado a inicios deste ano apuntaba ao aumento da pobreza na Galiza nestes meses. Así, se na Galiza pre-Covid a pobreza relativa atinxía 552.800 persoas, após o primeiro ano de Covid esa cifra aumenta até os 612.000.