Os alimentos moderan o seu prezo en setembro e sitúan a inflación xeral en 1,3%

O Índice de Prezos de Consumo (IPC) baixou un 0,6% en setembro en relación ao mes anterior e recortou oito décimas a súa taxa interanual, até 1,5%, o súa cifra máis baixa desde marzo de 2021, cando se situou en 1,3%, segundo os datos publicados esta terza feira polo Instituto Nacional de Estatística (INE), que coinciden cos avanzados a finais do mes pasado.

O organismo explicou que a moderación do IPC até 1,5% débese ao abaratamento dos carburantes, da electricidade e dos paquetes turísticos, así como ao menor custo dos prezos dos alimentos, cuxa taxa interanual reduciuse sete décimas, até 1,8%, a menor taxa desde outubro de 2021.

A moderación no prezo dos alimentos foi consecuencia, principalmente, do abaratamento dos aceites e graxas e, en menor medida, do menor custo das froitas, e da subida, inferior á de setembro de 2023, experimentada por legumes e hortalizas. Co descenso do IPC interanual no noveno mes do ano, a inflación encadea catro meses consecutivos de descensos despois das subidas experimentadas en marzo, abril e maio, que levaron ao IPC para escalar até 3,6%.

Dúas décimas por baixo na Galiza

Na Galiza o IPC baixou un 0,8% en setembro en relación ao mes anterior e recortou un punto a súa taxa interanual, até 1,3%, dúas décimas por baixo da media. Por grupos, os alimentos e bebidas non alcohólicas presentan unha alza anual do 1,6% nos seus prezos, e as bebidas alcohólicas e o tabaco, do 3,2%.

Mentres, vestido e calzado rexistran un IPC anual do 0,9%, vivenda, auga, electricidade, gas e outros combustibles, do 2,3%; mobles, artigos do fogar e artigos para o mantemento corrente do fogar, de 1%, e sanidade, de 3,1%. Reduciron os prezos un 4% o transporte e un 0,2% as comunicacións. En lecer e cultura repuntaron un 0,8%, en ensino un 3,8%, en restaurantes e hoteis un 5% e noutros bens e servizos, un 3,1%.

Poloq ue se refire á evolución mensual, alimentos e bebidas non alcohólicas diminuíron os prezos un 0,5%, bebidas alcohólicas e tabaco aumentaron un 0,3%, vestido e calzado un 1,3%, vivenda, auga, electricidade, gas e outros combustíbeis descenderon un 0,9%. O IPC mensual de mobles, artigos do fogar e artigos para o mantemento corrente do fogar experimentou unha alza de 0,5%, sanidade, de 0,6% e en transporte caeu un 1,9%.

Comunicacións rexistra unha caída de 0,1% dos prezos en comparación con agosto e en lecer e cultura é de 3,6%. Pola súa parte, o ensino sobe os seus prezos un 1,5% mensual e os restaurantes e hoteis caen un 1,1%. Por último, outros bens e servizos baixan un 0,2%.

Inflación subxacente

A inflación subxacente (sen alimentos non elaborados nin produtos enerxéticos) moderouse tres décimas en setembro, até 2,4%, nove décimas por riba da taxa xeral e a súa taxa máis baixa desde xaneiro de 2022.

No noveno mes do ano, o Índice de Prezos de Consumo Harmonizado (IPCA) situou a súa taxa interanual en 1,7%, sete décimas menos que en agosto. Pola súa parte, a variación mensual do IPCA foi de -0,1%.

En termos mensuais (setembro sobre agosto), o IPC reduciuse un 0,6% respecto ao mes anterior, o seu maior retroceso mensual en dous anos, en concreto desde setembro de 2022. Na variación mensual influíu o abaratamento dos paquetes turísticos, dos carburantes, do transporte aéreo de pasaxeiros e da electricidade. Por contra, os prezos do vestido e calzado incrementáronse un 2,4% polo comezo da tempada de outono-inverno.

O Ministerio de Economía destacou a baixada do prezo do aceite en setembro, cun descenso do 2,2%. "Esta redución continuada está a permitir achegar a inflación dos alimentos ao índice xeral, grazas ás medidas de apoio adoptadas", apuntou o departamento que dirixe Carlos Cuerpo.

"A redución continuada da inflación segue reflectindo a capacidade da economía española de compatibilizar o maior crecemento económico entre os principais países da zona euro, como poñen de manifesto os datos de crecemento do PIB do segundo trimestre, cun crecemento da economía española catro veces superior á media da zona euro, cunha moderación dos prezos", subliñou Economía.