43% dos fogares galegos chegan con dificultade ou moita dificultade a fin de mes

O Instituto Galego de Estatística (IGE) presentou esta sexta feira os resultados actualizados da súa Enquisa Conxuntural a Fogares, con datos correspondentes ao cuarto e último trimestre do ano 2025. Unha estatística que determina que até 43% dos fogares da Galiza chegan con dificultade ou moita dificultade a fin de mes no plano económico. Así, a pesar da repunta dos fogares que acaban o mes con facilidade ou moita facilidade –en relación ao trimestre anterior–, máis de catro de cada dez fogares seguen a experimentar dificultades económicas. Concretamente, 37% das familias declararon que chegan a fin de mes con dificultade, e outro 6,04%, con moita dificultade. A Xunta critica "o modus operandi" mais non se fecha ao novo modelo de financiamento: "É cedo para facer unha valoración" A situación económica dos fogares No cuarto trimestre de 2025, 56,96% dos fogares galegos chegaron con facilidade ou moita facilidade a fin de mes, 37% con dificultade e 6,04% dos fogares restantes fíxoo con moita dificultade. Con respecto ao trimestre anterior, aumentan en 1,13 puntos porcentuais os fogares que chegan con facilidade ou moita facilidade a fin de mes (de 55,83% a 56,96%) e en 0,43 puntos os que chegan con moita dificultade (de 5,61% a 6,04%), mentres que diminuíu a proporción dos que chegan con dificultade, ao pasar de 38,56% a 37% (-1,56 puntos porcentuais). En comparación co mesmo período do ano 2024, a porcentaxe de fogares que chega con facilidade ou moita facilidade a fin de mes aumentou en 3,08 puntos porcentuais. Ademais, a relación de fogares que chega con dificultade a fin de mes evolucionou do 38,51% ao 37% entre ambos os períodos e a porcentaxe de fogares que chega con moita dificultade decrece 1,51 puntos. Datos: IGE / Gráfico: Nós Diario Atrasos no pago de recibos de obrigado cumprimento En relación aos fogares que tiveron algún atraso no pago de recibos de obrigado cumprimento nos últimos tres meses, a porcentaxe aumenta do 1,17% ao 2,24% do terceiro ao cuarto trimestre do ano 2025. Un dato especialmente salientábel, pois os recibos de obrigado cumprimento refírense a facturas ou comprobantes de pagamento de servizos ou impostos que son obrigatorios por lei, como a taxa de residuos –o recibo do lixo– ou os recibos relativos ao aluguer, por exemplo. As familias que non poden asumir gastos 'extra' No documento do IGE 'Medidas económicas tomadas polos fogares nos últimos tres meses' exponse que até 18,8% dos mesmos non se permitiu ningún extra nos tres últimos meses, considerándose como tales os gastos destinados a vacacións ou viaxes, facer fronte a imprevistos ou grandes compras, extras de alimentación, roupa ou calzado, contratar novos servizos para o fogar, saír cear ou ir ao cine, entre outras actividades. Tamén se inclúe nesta categoría poder aforrar e traballar menos horas ou que algún membro do fogar se permita deixar de traballar dada a situación económica do núcleo familiar. No cuarto trimestre de 2025, 21,13% dos fogares galegos cambiaron os seus hábitos de compra mercando marcas brancas, de menor calidade e menor prezo ou produtos en oferta. Esta foi a medida económica máis habitual empregada polos fogares e as familias para reducir os gastos, aumentar os ingresos ou afrontar pagos neste período de tres meses. Ademais, 11,49% dos fogares galegos diminuíu outros gastos comúns –como roupa e calzado, transporte, gas, electricidade etc–, agás na alimentación, cuxo consumo non se viu reducido para aforrar. Medidas económicas que esperan adoptar os fogares Segundo as respostas recollidas na enquisa e en canto ás medidas económicas que as familias esperan realizar nos próximos tres meses, 41,56% dos fogares galegos valoran aforrar algo de cartos no futuro máis inmediato; o 61,53%, facer algún extra en produtos de alimentación; o 65,53%, saír cear, ir a cafetarías, ao cine ou ao teatro, e o 22,6% facer fronte a gastos imprevistos ou a grandes compras. Un 12,94% dos fogares da Galiza está a pagar a vivenda principal na que habitan, o 10,38% o coche e o 3,15% unha segunda vivenda. En comparación co cuarto trimestre de 2024, a porcentaxe fogares que paga a vivenda habitual baixou uns relevantes 0,67 puntos. Datos: IGE / Gráfico: Nós Diario A confianza dos fogares O indicador de confianza do consumidor (ICC), un índice que vai nunha escala de -100 a 100 (sendo -100 a total desconfianza e 100 a total confianza) e que mide o grao de optimismo das persoas consumidoras, situouse no cuarto trimestre de 2025 en -14,47 puntos, o que representa 1,46 puntos menos que no trimestre anterior. Pola súa parte, o indicador de sentimento do consumidor (ISC) tamén baixou comparándoo co anterior trimestre. A puntuación que os fogares deron á situación financeira persoal descendeu dun -11,49 no terceiro trimestre a un -12,40 no último (en escala de 100 a -100). A confianza varía en función dos ingresos dos fogares No último trimestre de 2025 diminuíron tamén os catro indicadores parciais de perspectivas de evolución do indicador de confianza do consumidor (ICC): a situación financeira persoal (-0,32), o desemprego (-0,65), a situación económica na Galiza (-2,36) e a capacidade futura de aforro (-2,49). O indicador de confianza do consumidor varía en función dos ingresos do fogar, pois os fogares con menores ingresos medios mensuais presentan valores máis baixos no ICC, mentres que a confianza aumenta ao aumentaren os ingresos do fogar. Así, o indicador no caso dos fogares con menos de 600 euros ao mes sitúase en -37,14 puntos, mentres nos fogares con ingresos por riba dos 3.000 euros o indicador chega a 2,01. Tamén descenderon as puntuacións perspectivas de evolución. Chama a atención que a puntuación media do indicador tanto de confianza como de sentimento varía en función do tamaño dos concellos. No caso do ICC, os fogares situados concellos de menos de 10.000 habitantes proporcionan unha puntuación moito máis baixa que a dos concellos de 50.000 ou máis habitantes, cunha diferenza de 4,44 puntos na escala de -100 a 100, cunha puntuación de -30,80 no caso dos concellos máis pequenos e de -26,53 nos fogares dos máis grandes.