O vicedecano do balonmán estatal, a SD Teucro, celebra este ano o seu 80º aniversario

O vicedecano do balonmán estatal, a Sociedade Deportiva Teucro, celebra este ano o seu 80º aniversario, e farao por todo o alto cunha serie de actividades en homenaxe á súa longa e destacada traxectoria. Fundado en Pontevedra no ano 1945, o Teucro é o segundo equipo de balonmán máis antigo do estado español, precedido unicamente polo BM Granollers. Ao longo deste camiño, o conxunto pontevedrés disputou 18 tempadas na máxima categoría do balonmán estatal, a Liga Asobal, ademais de alcanzar as semifinais da Copa do Rei en dúas ocasións: nas tempadas 1992-93 e 2003-04. A época dourada do equipo galego remóntase a mediados dos anos 90, cando na tempada 1994-95 alcanzou o cuarto posto na clasificación, o seu mellor resultado histórico na Liga Asobal. Este fito permitiulle clasificarse por primeira vez para unha competición europea: a Copa EHF. Tras esa etapa de esplendor, o club descendeu na tempada 1996-97 á División de Honra B, actual División de Honra Prata. Nos anos seguintes, o Teucro viviu un continuo vaivén entre as tres principais categorías do balonmán estatal, e na actualidade, o equipo dirixido por Irene Vilaboa compite na Terceira División, loitando por recuperar a praza na División de Prata e coa ilusión intacta de volver situarse entre os mellores conxuntos do Estado. “Ao longo de todos estes anos pasaron figuras moi importantes polo Teucro, practicamente o mellor do mundo estivo aquí. Agora mesmo é un club que loitou moitas batallas e que segue loitando, nunha dinámica distinta, pero con protagonistas tamén relevantes”, explica Vilaboa sobre a situación actual do equipo. A importancia histórica do club galego segue vixente, e a súa técnica destaca que “no mundo do balonmán, a palabra ‘Teucro’ é coñecida por todos. É un club que soubo reinventarse e que tivo ao seu carón o mellor do mundo. En Galiza, grazas a iso, hai moita tradición balonmanística e, máis concretamente, na provincia de Pontevedra hai e houbo sempre unha forte cultura deste deporte, pois, das súas terras saíu un dos clubs históricos do Estado”. Con esperanza de volver ao máximo nivel A SD Teucro, que chegou a disputar até 18 tempadas na máxima categoría do balonmán estatal, atópase actualmente na Terceira División. Unha das principais causas que levaron o conxunto galego a esta situación foi, segundo explica a súa técnica Irene Vilaboa, “o tema económico, que estivo por baixo do nivel deportivo. E é que, cando se chega a un nivel de competición tan alto, o club ás veces ten que baixar un chisco o listón ou algún chanzo para poder rexurdir, xa que as necesidades económicas dunha competición tan exixente obrigan os clubs a reducir custos de cando en vez”. A adestradora viguesa chega este ano á súa sexta tempada á fronte do conxunto pontevedrés. Durante este período viviu unha salvación histórica na División de Honra Prata, un descenso á Terceira División e varios intentos de acceder ao playoff de ascenso. Sobre a súa etapa no Teucro, Vilaboa sinala: “É un club distinto ao dos seus inicios, que tivo que reinventarse, pero no que a súa esencia, o seu nome e o seu bo facer seguen sendo os mesmos. Ao final, o tempo e a alta competición fan que haxa que librar certas batallas para rexurdir”. Nos últimos anos, o vicedecano do balonmán estatal loitou sen éxito por clasificarse para o playoff de ascenso á División de Honra Prata. Actualmente, o Teucro ocupa a cuarta posición na táboa clasificatoria, con esperanzas de pelexar polo ascenso. A súa adestradora asegura que deron coa clave e que agora están a facer o necesario para estar na loita. “Todo pasa por organizarnos a nivel de base para que haxa xogadores que poidan dar o salto ao primeiro equipo e, sobre todo, loitar por ter orzamentos como os que manexan os equipos que queren ascender a Prata”, afirmou, e engadiu ademais que se necesita "contar cun persoal moi compensado e cun orzamento acorde ás exixencias desa categoría para poder ascender”. A pesar de estar vivindo unha das súas etapas máis difíciles, a conexión entre o Teucro e a súa afección segue intacta. “A relación do club coa xente é moi boa, especialmente con aqueles que apoian o equipo incondicionalmente, e tamén con eses nenos que non chegaron a coñecer o Teucro na súa mellor etapa, pero que se emocionan en cada partido”, asegurou Irene Vilaboa. 80 anos de historia que se festexan por todo o alto Para reivindicar toda a súa traxectoria e relevancia ao longo destes anos, a SD Teucro celebrará en 2025 unha máis que merecida homenaxe cunha serie de actividades que se desenvolverán durante os vindeiros días e meses. Despois de 80 anos, o club continúa coa ilusión intacta para volver situarse entre os mellores do Estado Sobre este acto conmemorativo, que se estenderá ao longo do ano, Irene Vilaboa destacou algunhas das iniciativas programadas: “Esta sexta feira decorre a cea, na que xa hai máis de 200 persoas anotadas. A ela asistirán os protagonistas destes 80 anos: xogadores, directivos, patrocinadores, afeccionados, é dicir, toda a masa social que compón o club. Temos tamén, o día 13 de xuño, a inauguración dunha exposición de fotografías e vídeos titulada ‘80 anos de Camiño Azul’, que conectará o Pavillón Municipal coas distintas zonas emblemáticas de Pontevedra. Esta exposición estará aberta ao público desde xuño ata setembro.” As actividades conmemorativas non rematarán aí. “O mesmo día 13 de xuño, no Teatro Principal, Xabier Fortes dirixirá un coloquio titulado ‘As Lembranzas Azuis’, centrado na evolución do Teucro ao longo do tempo e na súa estreita vinculación coa cidade. O 14 de agosto decorrerán unhas xornadas técnico-deportivas con adestradores de gran prestixio no panorama estatal. Pola tarde, disputaranse partidos amigábeis: a SD Teucro enfrontarase á Selección Galega, e a continuación teremos o prato forte, co encontro entre o BM Granollers e o Benfica, que se desprazarán a Pontevedra para formar parte desta festa do balonmán”, detallou Vilaboa. Unha ampla programación de actividades lembra os 80 anos do equipo A celebración destes 80 anos por todo o alto responde a unha motivación clara: “O 75 aniversario estivo marcado pola pandemia da Covid-19, con moitas restricións, o que impediu celebralo como se merecía”, explica a técnica do conxunto pontevedrés. E engade: “Agora podemos facer unha boa celebración, sen restricións, e ademais, o 80 é un número redondo que nos dá pé a render esta homenaxe como é debido”.