Todo ou nada: o BM O Porriño xógase en Islandia o título da EHF European Cup

Unha tempada histórica remata este sábado para o Conservas Orbe Zendal BM O Porriño, que conquistou o mundo do balonmán no seu debut en competición europea. O conxunto galego disputa esta tarde o partido de volta da final da EHF European Cup fronte ao Valur, da liga islandesa (17 horas, Reikiavik). As xogadoras dirixidas por Ismael Martínez viaxaron até Islandia para afrontar o segundo e definitivo encontro da final, ao que chegan coa eliminatoria completamente aberta tras empatar na ida no Porriño (29-29) grazas a un gol de Mica Casasola no último segundo. Con todo por decidir, o equipo islandés contará coa vantaxe de xogar na casa e co apoio da súa afección. Porén, máis de 70 seareiros e seareiras galegas desprazáronse tamén para animar o seu equipo. O apoio incondicional de toda a vila ás súas guerreiras foi unha constante durante toda a tempada, algo que se fixo evidente no encontro de ida, onde o Pavillón Municipal encheu as súas bancadas. A entrega da afección sorprendeu mesmo ás propias xogadoras, como recoñece a este xornal Carolina Bono, peza chave no esquema de Martínez. “Hai xente que mesmo sacou os billetes a Islandia antes ca nós. É incríbel que veñan tantos a apoiarnos e que poidamos sentir o seu alento. Haberá moita xente que nos verá desde a pantalla grande que se vai colocar no Porriño, e estou segura de que recibiremos todo o seu apoio”, afirma. No seu debut en Europa, o percorrido do BM O Porriño quedará para o recordo, pase o que pase este sábado. “Fixemos un torneo incríbel, fomos moi solventes en todas as eliminatorias. É certo que o Valur é moi bo, e como se viu custounos máis, pero creo que estamos preparadas para a volta. E estamos todas, que é o máis importante; trataremos de dar o mellor de nós”, engade. Confianza plena en levantar este sábado o trofeo Tras coñecer xa de primeira man as súas rivais, o BM O Porriño chega ao partido de volta con plena confianza en que pode levantar o primeiro título europeo da súa historia. “Estamos moi ilusionadas e con confianza en que podemos gañar. Levamos toda a semana traballando sobre o partido da ida e vendo que podemos mellorar para esta volta”, destaca a central internacional coa selección nacional arxentina. Ademais, ten claro que este segundo duelo será moi distinto do primeiro: “O primeiro tempo da ida foi un pouco unha toma de contacto, porque é certo que podes ver as xogadoras en vídeo, pero é diferente telas diante; ver o rápidas que son, as distancias... e seguramente eses nervios que tivemos por xogar na casa, diante da nosa xente e sendo o primeiro partido, xa non os teremos neste segundo duelo”. Outro aspecto destacado de cara ao encontro decisivo é o estado físico co que chega o cadro dirixido por Ismael Martínez. A semana pasada, o equipo tivo que compaxinar a ida da final europea cunha exixente eliminatoria de cuartos de final do play-off pola Liga. Porén, neste caso chega en mellores condicións, xa que o mal resultado no partido de ida ante o BM Elche, no que as porriñesas perderon por unha diferenza de 11 goles (32-21) que complicaba enormemente a remontada, levou o técnico porriñés a introducir máis rotacións das habituais para que as súas xogadoras chegasen á cita europea de este sábado cunha menor carga física. Unha tempada especial para o equipo e para Bono O BM O Porriño experimentou nos últimos anos un crecemento exponencial, e iso puido percibirse nesta campaña que, de seguro, quedará para o recordo. Como xa destacaba a semana pasada Ismael Martínez, o conxunto porriñés soubo compaxinar á perfección, durante todo o curso, a competición ligueira, alcanzando no campionato regular un meritorio cuarto posto, e o seu debut en competición europea, sorprendendo o continente enteiro até chegar á final con opcións reais de levantar o título. Para as xogadoras foi un ano exixente a nivel físico, pero tamén un dos máis especiais dos últimos tempos. A propia Carolina Bono, que cumpre xa a súa cuarta tempada no conxunto galego, afirma: “Fomos de menos a máis. O primeiro ano que estiven aquí loitabamos por non descender, e nos seguintes xa estabamos a pelexar polo play-off, mesmo chegando a roldas avanzadas. Pero esta foi unha tempada histórica, fixemos un moi bo papel na Liga, aínda que caésemos en cuartos. E creo que non o mereciamos, pero coa rodaxe de tantos partidos, as pernas pesan. Aínda así, non está todo acabado, quédanos esta final e podemos coroar a tempada cun título que creo que merecemos”. Foi tamén unha tempada especialmente boa a nivel persoal para a central arxentina, na que logrou o seu récord goleador e puido consolidarse como unha das pezas chave no sistema de Ismael Martínez. “Véxome moi ben, e igual que o equipo foi de menos a máis, eu tamén notei esa evolución. Sinto que cada vez contribúo máis, e estou moi contenta por iso, pola confianza que Isma ten en min e pola gran conexión que teño coas miñas compañeiras”. Carolina Bono xa pensa na vindeira tempada Despois deste curso histórico –que podería rematar da mellor das maneiras– e logo de confirmarse que Carolina Bono seguirá un ano máis no conxunto porriñés, a central arxentina empeza a pensar na vindeira tempada e nos obxectivos que se marcará. “Queremos participar de novo nunha competición europea. Aínda que supón xogar moitos partidos ao longo do ano, case sempre cuartas feiras e sábados, é unha competición moi bonita. Á xente gústalle e o pavillón énchese”. Nun plano máis persoal, procurará seguir enlazando convocatorias coa selección arxentina, xa que a finais deste ano hai Mundial, e co Porriño buscará contribuír ao equipo "o máximo posíbel para seguir facendo historia” con esta camisola.