Estas son as 10 citas nacionais e internacionais que porán a proba o campo a través galego
A Federación Galega de Atletismo (FGA) deu esta cuarta feira a coñecer o calendario provisional da modalidade de campo a través, un calendario marcado, segundo asegura a propia Federación, por "unha variada e importante oferta". A primeira proba do calendario invernal galego arrincou o pasado día 12 de outubro, coa disputa en Ourense da sétima edición do Campionato Xunta da Galiza de campo a través de remudas mixto, conxuntamente coa Copa Deputación de Ourense, e que servían ambas as dúas probas para inaugurar oficialmente o calendario desta modalidade.
Xunta a estas dúas competicións están calendadas até o momento, un total de dez carreiras, entre as que destaca a celebración do Campionato Xunta da Galiza Absoluto para o vindeiro día 3 de xaneiro, con sede aínda por designar de maneira definitiva.
Esta cita servirá como antesala da celebración do Campionato a nivel de Estado español que tanto a nivel individual, como de seleccións galegas, acollerá o vindeiro 24 de xaneiro a localidade granadina de Almodóvar del Río. Na edición anterior, que se disputou en Madrid, a Galiza conquistou un total de sete medallas. A outra cita galega importante corresponde á celebración do clásico Memorial Alejandro Lorenzo quen decidirá os títulos das categorías base galegas Sub14, Sub12 e Sub10.
Os máster terán que agardar até o 24 de xaneiro para o seu campionato galego, que de igual modo, servirá para acudir ao Campionato de España Máster catorce días despois en Hornachuelos (Andalucía).
Lugo coa súa Ponte Romana, Pontevedra co cros Cidade de Pontevedra, Pereiro de Aguiar co Cros Guillelme Brown, Vigo co Memorial Belarmino Alonso, as distintas fases dos Xogade, completan a programación galega nesta modalidade.
Citas internacionais
A nivel internacional, cómpre salientar a celebración tanto do Campionato de Europa o día 14 de decembro en Portugal como a disputa do Campionato do Mundo que marcha até Estados Unidos o día 10 de xaneiro. Xunto a estas importantes citas, os atletas universitarios contarán co seu campionato mundial en Italia o 14 de marzo, e os clubs galegos loitarán por facerse co título europeo o día 8 de febreiro en sede aínda por determinar.