Só pode quedar un: Noia e Burela prepáranse para unha agónica loita pola permanencia

Semana decisiva para o fútbol sala galego coa chegada da derradeira xornada da na Primeira División masculina coa máxima emoción para os dous equipos galegos, Burela FS e Noia Portus Apostoli. Cunha diferenza de tan só un punto entre ambos –en favor dos mariñaos–, os partidos deste sábado decidirán que representante manterá Galiza o vindeiro curso na elite. O Burela chega, a priori, con máis opcións, dependendo de si mesmo grazas aos 27 puntos que agora mesmo suma na clasificación e que o colocan na 14ª praza, a que marca o límite da permanencia. Tan só un punto e unha praza por debaixo, un Noia en postos de descenso (15º) con 26 puntos. A xornada disputarase –agás o partido entre o Zaragoza, xa descendido, e o Valdepeñas, que non se xoga nada– en horario unificado este sábado ás 20 horas. E os dous equipos galegos xogarán a domicilio. O Noia desprazarase até Torrejón de Ardoz (Madrid) para enfrontarse a un dos grandes equipos da competición, o Movistar Inter (4º) que no que vai de tempada apenas perdeu só 7 partidos, empatou 4 e sumou 18 vitorias e que vén de proclamarse campión da Copa do Rei, o seu primeiro título en catro anos. O Burela FS, pola súa parte, visitará o Pazo dos Deportes de Cartaxena (Murcia) para enfrontarse ao Jimbee Cartagena Costa Cálida, que se sitúa na quinta praza da táboa con só 7 derrotas, 9 empates e con 13 vitorias. E mentres os murcianos non teñen xa nada en xogo e serán quintos na liga regular pase o que pase, o Inter podería mesmo arrebatar o liderado ao Servigroup Peñíscola, que o avantaxa en 3 puntos. Iso si, se o Burela perde e o Noia empata, salvaranse os segundos, pois teñen gañado o goalaverage particular (2-2 e 3-2). Caridad García, porteira do Burela FS: "Gañar a Copa foi unha recompensa polo sufrimento de toda a tempada" O Noia está obrigado a sumar e a ollar de esguello o que ocorra no partido dun Burela que precisan que pinche para poder salvarse. “Somos conscientes de que non dependemos de nós mesmos, pero o que temos é que centrarnos no noso traballo. Visitamos unha das pistas máis complicadas da Liga, pero imos intentar facer os nosos deberes e, despois, o que pase no outro partido xa non depende de nós e non temos nada que facer”, admite Javier Barreiro, director xeral do conxunto noiés, en declaracións a Nós Diario. Desde o inicio da tempada o obxectivo do Noia era claro: a permanencia. "E que sexa ou non unha boa campaña, dependerá diso”, di Barreiro. Nesta tempada atravesaron dúas situacións ben diferenciadas. “Na primeira volta non estivemos ben. As lesións lastráronnos moitísimo e pagamos a falta de efectivos non podendo sacar máis puntos. Na segunda parte da competición, xa a partir de finais de decembro, penso que o equipo estivo a un bo nivel, cumprindo cos obxectivos marcados a principios de tempada. Conseguimos gañar partidos contra rivais directos fóra da casa e estar fortes e fiábeis aquí, pero pagamos o lastre que arrastramos da primeira volta. Quizais ese bo traballo posterior non sexa suficiente para lograr o obxectivo”, sinala. As lesións "son parte da competición e non son escusa, pero si é certo que iso foi un peso co que tivemos que cargar toda a tempada, a pesar de que na segunda parte fixemos bos números", puntualiza. Agora o Noia xogarase o todo polo todo, o que supón non só un desafío táctico e deportivo, senón tamén mental, logo de perder a oportunidade no anterior choque de chegar a este nunha situación vantaxosa. “Non gañar ao Zaragoza –xa descendido– na casa, que nos empatasen a falta duns segundos (3-3), foi un pau moi gordo. Veunos ben que entre ese partido e o desta fin de semana houbese un paro, porque foi un golpe duro perder as opcións de depender de nós mesmos”, apunta Barreiro. O Noia sabe impor o seu dominio e proclámase campión da Copa Galiza Un 'pau' para o futsal galego Un pau duro como tamén o é saber que a praza que queda do descenso vaina ocupar, si ou si, un dos dous equipos galegos. “É unha desgraza que se dese esta situación. Para nós, para Galiza, para o deporte galego, para o noso futsal, é importante que haxa dous equipos en Primeira. Oxalá o Parrulo suba de novo e se manteñan esas dúas prazas na elite, aínda que o idóneo sería que estivésemos os tres”, destaca Barreiro. Unha análise na que coincide o adestrador burelao, David Rial. “É unha auténtica putada, así de claro. Ter máis dun equipo galego é bo para todos; oxalá o Parrulo poida ascender e Galiza manteña dous equipos en Primeira, porque nos derbis o ambiente é espectacular”, afirma en conversa con este xornal. O Burela, nunha tempada convulsa no extradeportivo, chega a esta última xornada dependendo de si mesmo e, por iso, “o balance da tempada ten que ser positivo”, defende Rial. “Sabiamos as nosas circunstancias, cun cadro de xogadores moi curto, pouca xente con experiencia… Pero á metade da tempada, todos firmariamos poder chegar á última xornada dependendo de nós mesmos para lograr a permanencia”, matiza. E no caso de conseguir o ansiado obxectivo este sábado, "será unha tempada de matrícula”, subliña. O conxunto laranxa podería salvarse aínda sen gañar, dependendo do resultado do Noia, pero esa non é unha opción que Rial baralle na súa cabeza. “Depende de nós. Temos que ir alí e gañar e non ter nada que mirar cara a outro lado. Se temos iso na cabeza, teremos outra preocupación. Eu o que estou pedindo esta semana é que sexa un partido máis e que o obxectivo é gañalo”, reitera, con rotundidade. Entre veteranas, novas promesas e paixón: o Guardés busca a final polo título de Liga Play-off de ascenso: O Parrulo, unha nova esperanza para o fútbol sala galego Galiza mantense no panorama estatal como unha referencia no fútbol sala, sendo un dos poucos territorios que esta tempada poden presumir de ter dous equipos na Primeira masculina —e cinco na feminina–. Unha realidade que pode salvar O Parrulo Ferrol en caso de ascender, novamente, á elite do fútbol sala estatal masculino. O equipo ferrolán quere que este sábado (19 horas), no primeiro partido das semifinais dos play-off de ascenso, A Malata sexa unha gran festa, e para iso organizará ademais unha previa na súa 'fan zone' na que os seareiros e as seareiras gozarán dunha pista de 3x3, da actuación do DJ Meirás Land e moitas máis actividades para prepararse para o encontro. No partido de ida da semifinal, O Parrulo Ferrol FS (3º) recibirá o Inagroup El Ejido (4º). Nos dous enfrontamentos na liga regular os ferroláns impuxéronse a domicilio (2-4) e empataron na Malata (2-2). Ambos chegan en dinámicas semellantes: nos últimos cinco partidos disputados na liga, O Parrulo perdeu un, empatou outro e gañou tres; os mesmos números que o seu rival. Primeiro paso nos play-off para un Parrulo que buscará, catro anos despois, voltar á máxima categoría do fútbol sala estatal e, ao tempo, que Galiza recupere a súa dobre representación na elite.