Os partidos galegos en Segunda e Primeira RFEF

Coa fin de semana sen fútbol en Primeira polo partido da selección española, toda a atención céntrase no que aconteza en Segunda División e Primeira RFEF. Comezando polo Racing de Ferrol, a esperanza galega da categoría de prata, e o seu encontro este domingo na Malata contra o Burgos (14 horas). Os Diaños Verdes buscarán escalar posicións nesta décima sexta xornada após derrotar a pasada quinta feira ao Mirandés e situarse décimo sextos na clasificación con 26 puntos, dous por baixo do segundo da táboa, o Sporting de Xixón. Diante terá un Burgos situado na zona media da clasificación con 20 puntos. É este o mellor Rácing de Ferrol de todos os tempos? Desta vez, na previa ao partido compareceu en rolda de prensa polo Racing o xogador Jesús Bernal. O centrocampista verde indicou que o Burgos é un equipo que compite moi ben, polo que espera un partido moi complicado, a pesar de que o rival non se mostrou moi forte lonxe do seu campo. “Se pensamos que será un encontro sinxelo, estariamos moi confundidos”, sinalou, “temos que afrontar un partido dando o máximo, tratando de que eles non sentan cómodos”, concluíu. Porén, a atención informativa destes días estivo centrada na posíbel saída do equipo cara o Valencia de Carlos Vicente. Segundo o xornal Marca, o xogador deixaría Ferrol para incorporarse ao equipo valenciano por tres tempadas, unha noticia que o axente do xogador, David Vila, asegura que non hai nada de acordo e hai uns días xa subliñaba que o xogador apostaba polo Racing, polo menos até o final de tempada. O propio club galego ignoraba esta proposta e aseguraba que deberían pagar os 600.000 euros da cláusula que ten. As citas de Primeira RFEF En Primeira RFEF, o Celta B, agora Celta Fortuna, terá oportunidade de certificar o seu bo momento este domingo na súa visita a Teruel (Estadio de Pinilla, 12 horas). O equipo celeste está terceiro na clasificación con 23 puntos, un por baixo do actual líder: a Cultural Leonesa. Diante terá un Teruel en horas baixas, situado penúltimo con sete puntos, cun adestrador moi cuestionado pola afección tras o empate da pasada xornada diante do Tarazona, outro equipo aragonés. Tras os celestes, o mellor equipo galego desta categoría é o Lugo, noveno na táboa con 19 puntos. Nesta xornada visitará este domingo Catalunya para enfrontarse ao Sabadell (Nova Creu Alta, 16 horas). Onte en rolda de prensa, Pedro Munitis asegurou que lle “sorprendía” a posición deste rival na clasificación. “Calquera erro que cometen penalízanlle, demostra a igualdade que hai neste grupo”, recoñecía o adestrador dos albivermellos. O Dépor fai un chamamento a doar alimentos ante o Logroñés Un día antes que o técnico lucense analizaba ao Sabadell, desde a sala de prensa, Jozabed Sánchez. O centrocampista apunta que "a situación do Sabadell é enganosa, o míster púxonos en alerta”, polo que non queren fixarse “só na táboa”. Entende que "seguro que sairán cun punto máis de intensidade” e lembra que noutra circunstancia tocoulle “estar nesa situación e cambia moito a cousa”. Fóra de casa tamén xogará o Dépor, nesta ocasión viaxando cara Aragón para disputar este sábado o seu partido contra o Tarazona (Municipal de Tarazona, 16 horas). Os da cidade herculina atópanse na zona media da clasificación no posto onceavo e con 17 puntos. Na rolda de prensa previa ao choque realizada en Abegondo, Imanol Idiakez asegurou que o seu equipo está a buscar "a regularidade”. Non o vai ter fácil diante dun rival que o propio técnico apuntaba como “complicado, nun campo máis pequeno que Riazor”. Neste sentido, cualificou ao equipo aragonés como un rival que "manexa moi ben o balón parado, o xogo directo, e vainos a expor duelos por todo o campo”. Ademais, o técnico do Dépor cre que aproveitarán calquera “saque de banda preto da túa área é un balón á área con Cubillas... xente con moito poder físico que gañan moitos duelos aéreos e deixan moito balón aí solto. Ten unhas connotacións a nivel futbolístico o partido que temos que ter moi presentes". Todos os detalles dos partidos da fin de semana dos equipos galegos de fútbol Tamén este sábado decorrerá o encontro que enfrontará ao Arenteiro co Cornellà (Estadio de Espiñedo, 19 horas). Os do Carballiño, con 14 puntos na táboa, están agora no posto trece da clasificación. O seu adestrador, Javi Rey, admitía onte en rolda de prensa que o rival “é moi forte e emprega unha defensa de cinco” polo que o seu conxunto deberá “interpretar onde están as vantaxeser capaces de afundilos no seu campo”. Despois, a vitoria podería chegar se o Arenteiro “xera ocasións de gol” tendo en conta que noutras xornadas “houbo partidos no Espiñedo con ese mesmo sistema e faltounos precisión na última zona do campo”. Neste sentido, lembrou que estes días nos adestramentos “insistimos nesta parte do xogo, nas accións técnicas individuais para ser capaces de crear ocasións de gol”. Por último, o técnico galego tentará que os seus xogadores "impriman un ritmo alto" desde o inicio para "aproveitar a confianza que ten o equipo e o apoio da afección", sen esquecer que sería fundamental "deixar a portaría a cero".