O PP aproba unha reforma da Lei do deporte "pírrica" e "innecesaria" para a oposición

Trece anos despois de terse aprobada a Lei do deporte da Galiza, o PP levou ao Pleno do Parlamento galego para ser aprobada unha reforma de catro artigos, unha disposición adicional e unha disposición última co epicentro no obxectivo de que a Xunta da Galiza poida exercer a acusación popular nos procedementos penais derivados de episodios de violencia no deporte. Ademais, introduce cambios na limitación de mandatos das federacións deportivas así como algunhas exixencias sobre a súa transparencia. A reforma saíu adiante cos únicos votos do PP e sen a aprobación do resto de grupos –BNG, PSdeG e Democracia Ourensá–, que se abstiveron. O punto de partida da reforma, tal e como indicou o presidente da Comisión que a tratou, Julio García Comesaña, foi a morte en febreiro deste ano dun home de 68 anos após de máis de dous meses ingresado na UCI tras sufrir unha agresión durante un partido de balonmán cadete feminino entre o Sanxenxo Balonmán e o Club Rasoeiro disputado en Vilalonga en decembro de 2024. Neste sentido, a norma permitirá que a Xunta exerza a acción popular en procesos xudiciais por violencia no deporte. O BNG consegue que o PP recúe na Lei do deporte para adaptala ás necesidades das federacións: os mandatos non superarán os 20 anos Modificación "pírrica" Na quenda de intervencións, por parte do BNG falou o deputado Daniel Castro, que sinalou que lle parecía "imposíbel atopar explicacións para esta Lei do deporte, que o único que xerou foron problemas e tempo perdido". O representante nacionalista afirmou que era unha "modificación pírrica", polo que animou o PP a "centrarse nos verdadeiros problemas do deporte galego" como o prezo das licenzas e a falta de infraestruturas. Ademais, lembrou que o BNG conseguiu mudar a idea inicial do PP de limitar a tres os mandatos nas federacións. Así, a limitación pasa a catro mandatos con posibilidade dun quinto baixo determinadas condicións. A "oportunidade perdida" Por parte do PSdeG, a deputada Paloma Castro laiouse de que a reforma sexa "unha nova oportunidade perdida" que non garante un deporte "máis inclusivo e igualitario". Para a socialista, a mudanza "introduce cambios innecesarios, redundantes ou inadecuados" e "non mellora o anterior", senón que "introduce problemas novos". Pola contra, bota en falta que "non se fale de deporte inclusivo nin de como facilitar o deporte adaptado nas federacións", ademais de non tratar "o problema da desconexión deportiva no rural galego". Reforma "importante" Defendendo a reforma, o deputado do PP, Roberto Rodríguez, rexeitou que fose unha modificación "de pouco ou menor alcance". Pola contra, asegurou que é "unha aposta clara por garantir que o deporte galego siga sendo o que quere e debe de ser, un espazo de convivencia, de educación e de valores; libre de violencia e un exemplo de bo goberno". Após o debate, en declaracións aos medios, o conselleiro de Presidencia, Xustiza e Deportes, Diego Calvo, puxo en valor que a reforma da norma fose aprobada sen votos en contra, o que, na súa opinión, "avala un pouco o sentido da propia modificación". O deporte xera máis de 17.000 empregos directos na Galiza Críticas das federacións federativas estiveron presentes no hemiciclo seguindo o pleno, foi o caso da de Piragüismo e a de Salvamento e Socorrismo. En declaracións a Nós Diario, Alfredo Bea, responsábel da primeira, afirmou que está ben "que se queira mellorar na transparencia e na erradicación da violencia" mais, no seu caso, no tema do deporte e o medioambiente "non se fixo nada desde 2012". Neste sentido, indicou que "hai temas de maior calado que estes" tendo en conta que se lles exixe "procedementos administrativos máis contundentes cos mesmos miserábeis cartos que nos dan desde hai anos por parte da Xunta". Como urxente, Bea pon enriba da mesa un exemplo propio: o decreto de práctica deportiva no medioambiente "que Catalunya ten desde 2003". Por este motivo, denuncia que o deporte náutico galego depende de Portos do Estado, capitanías e Augas da Galiza "e é imposíbel practicalo neste escenario hoxe aquí", malia que se presume "de que somos un referente". Pola súa parte, a responsábel da segunda, Nuria Rodríguez, coincide con Bea. "Seremos coellos de Indias no tema da limitación de mandatos", indicou a Nós Diario. No seu caso é unha das federacións "pequenas" que Rodríguez leva 22 anos presidindo. "Unha como a miña non é un doce, non ten nada que ver co fútbol e co balonmán", aclarou. En relación ás obrigas administrativas da lei, alertou de que "organismos como o meu non teñen moita capacidade para facer todo o que nos piden, agardemos que nos axuden". Aínda que non estivo esta terza feira no Parlamento galego, o presidente da Federación Galega de Tenis, Xosé Mosquera, ao saber da mudanza aprobada, engadía outra dificultade. "Nós temos o límite en dous mandatos e non hai problema mais si que, no futuro, cada vez será máis difícil atopar persoas que se queiran dedicar", sinalou. Por iso, recordou que non todas as federacións son iguais e confirmou que estamos diante dunha situación "moi complicada de solucionar". O deporte de alto nivel segue a bater récords, con 1.712 licenzas Federacións e oposición contra a falta de consenso Desde a oposición, e tamén desde as federacións consultadas, unha das eivas de partida da reforma lexislativa aprobada esta terza feira estaba relacionada coa falta de consenso co sector. "Non houbo consenso, chegounos despois a través dos grupos parlamentarios", asegurou Nuria Rodríguez. Para Alfredo Bea, a Secretaría Xeral para o Deporte "nunca foi de grandes diálogos, sempre ou case sempre nos decatamos pola prensa". Xosé Mosquera, pola súa parte, foi máis contundente e afirmou que "nun sistema democrático se ti modificas algo que afecta un sector determinado ti tes que falar con el". Por iso, o responsábel do tenis galego sinalou que "se non saben que problemas temos non poden solucionar os que están pendentes". Neste sentido, pon como exemplo as axudas que recibe da Xunta o tenis galego para torneos internacionais de promoción, aqueles nos que participou Jessica Bouzas, que foron en total "de 7.000 euros anuais". Sen deporte feminino Entre os temas ausentes na reforma da Lei do Deporte, un dos que se destacaron na Cámara foi a ausencia do deporte feminino, unha das peticións do BNG. "Non aparece por ningures mais cando hai medallas son os primeiros en saír na foto", criticou na sesión plenaria o deputado Daniel Castro.