O Porriño, listo para a segunda volta

O BM O Porriño vén de fechar a primeira volta da competición en quinta posición cun total de 18 puntos e uns excelentes resultados, nove vitorias e só catro derrotas. O adestrador das galegas, Ismael Martínez (Cangas, 1983), analiza en conversa para Nós Diario as aspiracións do equipo de cara a 2026 e fai balance do que supuxo 2025. Tras a última derrota das porriñesas, o 2 de novembro no derbi contra o Guardés, semella que algo cambiou no Porriño, pois só coñecen a vitoria como resultado. Gañáronlle ao Sporting La Rioja, ao Granollers, a Lanzarote Zonzamas e a Morvedre. Para o técnico, as razóns son moi claras: “Pasa porque o equipo está nun momento bo e no que está traballando moi ben. Aproveitamos moito a parada para pulir cousas e recuperar xente e creo que nos partidos de despois da pausa, sobre todo no de Granollers, o rendemento foi especialmente bo e creo que é a liña que temos que coller”. Un BM O Porriño en construción busca reinventarse para regresar ao máis alto Non obstante, conseguir manter esta liña de rendemento non vai ser tarefa fácil, principalmente polo partido de debut da segunda volta ante Bera Bera, líder invicto da categoría. Aínda así, Ismael Martínez amosa o seu optimismo e pon en valor as capacidades das xogadoras: “Xa lles ganamos o ano pasado e empatamos hai dous, é unha pista que non adoita dárselles ben e temos que aproveitar todas as opcións que nos dean. Evidentemente elas son favoritas, como en calquera partido que xoguen no Estado, pero imos explotar ao máximo as nosas opcións”. Misión cumprida no Porriño Botando a vista atrás e facendo balance dos resultados acadados esta tempada, o técnico do BM O Porriño valora con sobresaínte a actuación do seu equipo: “Creo que é inmellorábel, ao final estivemos varios partidos con até sete baixas nunha plantilla de catorce. Creo que ningún equipo aguantaría e a realidade é que o ano pasado foi incríbel e este ano sen ser tan brillante estamos cun punto máis ao remate da primeira volta. É espectacular o que está facendo este grupo de xogadoras, un grupo novo e de pouca idade ao que penso que non lle podemos pedir máis”. Ismael Martínez sinala como é fundamental e unha excelente virtude das xogadoras o feito de crer e confiar no que se lles propón, pois a cantidade de malabares, ou como el di “cousas catalogadas como moi extravagantes”, para tentar suplir as xogadoras que faltaban foron innumerábeis. Como expón o técnico, mesmo chegaron a xogar por momentos con tres pivotes. Todo isto sumado ao excelente rendemento defensivo e ás achegas da portaría son, a ollos de Isma, as chaves desta boa dinámica. Con todo, para o adestrador segue habendo puntos débiles que precisan de solución inmediata, pois en porcentaxe de lanzamento sinala como son un equipo de descenso: “Estamos en postos de play down se só contase a porcentaxe de lanzamento de cara á portería”. Aínda así, salienta como xa foron corrixindo moitas desas debilidades, destacando a melloría no referido ás perdas de balón, pois son xa o segundo equipo que menos perde nesta estatística. Ano novo, mesmo obxectivo Fiado con todo isto achégase 2026 e xunto con el a segunda volta dunha liga que non agarda por ninguén. Para Ismael Martínez é difícil igualar o rendemento da primeira: “E complexo, ímolo intentar, pero pedirlle máis a este grupo en liga regular vai ser moi difícil. Estamos nunha posición realmente boa, só perdemos con equipos de arriba, a ver se recuperando a xente somos quen de competir un pouquiño mellor contra os máis fortes. A este equipo o que creo que se lle pode pedir son as competicións curtas, a Copa da Raíña ilusiónanos moito e, sobre todo, chegar nunha boa posición ao playoff para intentar dar a badalada”. De todas formas, se falamos de pedir, o adestrador do BM O Porriño ten moi claro o que demandarlle a este novo ano: “Se fose como 2025 sería marabilloso, creo que intentar desfrutar como este último ano, tratando de sacar resultados e sobre todo se puidese chegar algunha sorpresa en forma de título sería incríbel, mais é realmente complexo”. Rubensa Indupor BM O Porriño e SAR Rodavigo disputan o comezo da Copa Galiza de balonmán O éxito dun vestiario unido Xa por último, se por algo destaca o conxunto porriñés é pola unión dentro do vestiario, así o declara Ismael Martínez ao ser preguntado por como se encontra este: “Moi unido, a verdade é que as adversidades unen moito e tivemos moitas e moi grandes neste comezo de competición e isto fíxonos máis fortes e estar máis unidas, cun espírito de resiliencia moi grande e esa é a principal virtude deste vestiario”. A por Europa e a Copa do Rei Unha vez analizada a situación en liga do Porriño, destacan as súas ansias por poder participar en Europa a próxima tempada, “oxalá poder falar dun Porriño europeo outra vez”, declara Martínez. Teñen tamén por diante a Copa do Rei, mais son conscientes da dificultade de facerse cun título dese nivel.