As pistas de futsal feminino volven desfrutar de cinco equipos galegos de primeiro nivel

O Pescados Rubén Burela quere seguir co seu dominio na competición gañando outro campionato de liga. “Queremos loitar por todos os títulos, medrar pouco a pouco. Manter o soño que estamos a vivir e chegar o máis lonxe posible”, declara a Nós Diario Julio Delgado, adestrador do equipo burelés. “Estamos facendo algo incríbel, cun dominio moi grande sobre todas as competicións e ese soño imos tentar alongalo”, desexa o técnico. O Burela incorporou para esta tempada tres xogadoras: Carolina Pedreira e Débora Lavrador, procedentes do ENCE Marín Futsal, e Dinha, que vén desde o Santa Luzia. “A exixencia, a presión que hai en Burela, é difícil de asimilar nos primeiros intres. Nós tratamos de axudalas ao máximo para que se vaian integrando o antes posíbel”, explica. "A exixencia que hai en Burela é difícil de asimilar", di Julio Delgado. Con 13 puntos de 15 posíbeis grazas a catro vitorias e un empate, o Burela comeza con moi bos números nestas primeiras cinco xornadas. “Seguir traballando cada sábado é o noso principal obxectivo”, indica Delgado. A Primeira División do fútbol sala estatal feminino é unha competición cada vez "máis igualada". "Cada ano é máis complexo conseguir os tres puntos. A semana pasada tivemos que remontar un 2-0, na anterior tivemos que suar para sacar os tres puntos ante un equipo recentemente ascendido… isto quere dicir que cada partido require estar ao 100%”, concreta o técnico. Da Galiza para o mundo: a elite do futsal internacional fala galego O Poio Pescamar FS vai morder esta tempada O Poio Pescamar sitúase quinto na clasificación despois destas primeiras cinco xornadas, a tres puntos, precisamente, do Burela. “Queremos gañar todos os títulos que están en xogo. Ese é o noso obxectivo final, pero tamén nos marcamos obxectivos intermedios como chegar a fases finais, como a da Copa da Raíña, poder xogalas e, ogallá, gañalas”, sinala a este xornal Luís López Tulla, adestrador do Poio FS. Esta tempada o Poio participa en todas as competicións, incluída a Supercopa, e en todas elas “o obxectivo é gañar”, tal e como avanza o técnico poiense. A respecto da tempada pasada, Lara Balseiro, Carla Ayensa, Saki e Rocío Gómez deixaron as filas do conxunto poiense que, en contrapartida, incorporou cinco xogadoras: Miri Esteban, procedente do Segosala da Segunda ivisión; Rocío, procedente do fútbol 11 de Almería; Èlia Gullí, procedente do Amarelle; Carmen Noreña Chuli, que vén tamén do Amarelle, e Candela Soria, chegada do Ourense Ontime. “As sensacións da pretempada foron moi boas. Fixémolo ben e, dentro de que somos un equipo ao que non é doado adaptarse a nivel táctico, xa que traballamos con moita información, o certo é que a nivel anímico é moi fácil a incorporación. O staff faino doado”, explica o adestrador. Aínda que os primeiros partidos da tempada custaron especialmente ás do Poio, nos últimos dous partidos encadearon dúas vitorias. “Queremos gañar esta fin de semana e chegar ao paro con tres vitorias seguidas”, desexa López Tulla. "Para gañar cada partido hai que sufrir", admite Luís López Tulla. “Este ano o calendario é asimétrico, a orde da primeira volta non coincide co da segunda, e iso vai a ser un cambio”, comenta. O equipo enfrontouse nos primeiros impases da liga con equipos recentemente ascendidos e a priori máis accesíbeis, pero a realidade é que “cada partido hai que gañalo e para facelo hai que sufrir. Este ano todos os clubs reforzaron os cadros de xogadoras, melloraron na preparación dos partidos… e iso subiu moito o nivel da Liga, o cal é tamén unha boa noticia, polo que conseguir os obxectivos é máis complexo, aínda que a satisfacción sexa maior tamén cando se acadan”, precisa o técnico. Ourense Ontime FSF O club da cidade das Burgas conta este ano con Bea Seijas, toda unha icona do fútbol sala feminino, nas rendas do equipo da Primeira Iberdrola. A ferrolá, que xogara como ala-feche e que se retirou precisamente no Ourense en 2019, enfróntase agora a un novo reto desde o banco. O balance do equipo ourensán nas cinco primeiras xornadas ten marxe de mellora. Unha vitoria, un empate e tres derrotas colócanas na duodécima posición con catro puntos, dous postos por enriba da liña do descenso grazas á diferenza favorábel de goles, pero empatado a puntos co Guadalcacín e o LBTL Futsal Alcantarilla, este último xa en postos de descenso. Dúas son as caras novas que chegaron para reforzar o equipo no verán. Andrea Carid Spi volve a Ourense —equipo co que xa gañara a Copa— sete anos despois da súa marcha. E desde Poio incorpórase Carla Ayensa. Porén, foron baixas no equipo Candela Soria, Iria Saeta, María Arias e Clara Fernández. O HC A Coruña, moito máis que un equipo de hóckey Ademais da incorporación para coller o temón de Bea Seijas, xunto a ela chegan Isidro Grela como segundo adestrador, Roberto Abad como preparador físico, Andrés González como fisioterapeuta, Zelta Iglesias como delegada de equipo, Vane Barberá como adestradora de porteiras, Carlos Rúa como delegado de campo e Silvia Vázquez como auxiliar. O Castro Bloques Cando quere seguir medrando As primeiras cinco xornadas colocan o equipo de Castro de Rei na metade da táboa como oitavo clasificado grazas aos seis puntos colleitados nas dúas vitorias fronte a tres derrotas nos cinco primeiros encontros ligueiros. Con Chipi como adestrador, o Castro Bloques cando incorpora a Laura Boix, procedente do César Augusto de Zaragoza da Segunda División; Estela Cantero, desde o Amarelle e á arxentina Julia Dupuy, capitá da selección sub-20 da Arxentina e que militara a pasada campaña tamén no Amarelle. Estas xogadoras súmanse á disciplina do Castro que, aínda que se marca como obxectivo a salvación, non quere renunciar a sumar máis puntos e subir na clasificación respecto á pasada campaña, na que remataran na duodécima posición con 33 puntos. Aprender a perder… e sobre todo a gañar: o debate dos resultados avultados no baloncesto base O Marín Futsal busca máis O ENCE Marín Futsal remataba a pasada campaña coa polémica dos cánticos —pouco afortunados— adicados ás xogadoras do Viaxes Amarelle tras certificar as marinenses a súa permanencia. A directiva do futsal tivo que celebrar a permanencia pedindo desculpas por aqueles feitos. Agardando que esta tempada non se vexa empanada por cuestións semellantes, o equipo dirixido por More sitúase antes do comezo da xornada 6 na décima posición, con dúas vitorias e tres derrotas, ao igual que o FSF Castro, pero cunha diferenza de goles máis desfavorábel. Ademais da chegada como adestrador de Dani Álvarez, More, tamén se incorporaron para enfrontar esta campaña cinco xogadoras. Miriam Ruiz dende o STV Roldán, Margarita dos Santos dende Gondomar, Patri Corral do FSF Castro, Gisela Martínez da UD Ceuta e Morgana Ravadelli da UD Ceuta. Pola contra, More non poderá contar con Carolina Pedreira, Débora Lavrador, Ana Cunha, María Estévez, Inés Mayán e Adriana; que deixan as filas do Marín.