O Obradoiro activa o 'modo play-off' e só pensa no ansiado retorno á liga ACB

O Monbus Obradoiro comeza esta sexta feira a carreira final polo ascenso á Liga ACB. O conxunto da capital rematou a tempada regular na quinta posición, o que lle asegurou a clasificación para esta fase e o factor cancha na primeira eliminatoria. Os de Félix Alonso estrearanse nos cuartos de final ante o Súper Agropal Palencia ás 20 horas no Multiusos Fontes do Sar, no primeiro encontro dunha serie que se resolverá ao mellor de cinco partidos –os dous primeiros en Compostela; os dous seguintes, en Palencia, e, no caso de ser necesario, o quinto decidirá a eliminatoria de novo en territorio galego. O Obradoiro afronta este momento crucial dunha tempada na que toda unha cidade que respira baloncesto soñou con voltar á elite tras un duro descenso o curso pasado. Un sentimento que se trasladou tamén ao vestiario. “Estamos todos desexosos de comezar e de poder gañar este primeiro partido no Fontes do Sar. Traballamos moito para chegar até aquí; conseguimos esa vantaxe de campo, que era un dos obxectivos que nos marcamos hai un par de meses. É un momento ilusionante da tempada e sabemos a responsabilidade que temos”, asegura a Nós Diario o seu capitán, Álvaro Muñoz. Moncho Fernández, adestrador: "O baloncesto galego goza de moi boa saúde. Galiza é basqueteira" O equipo chega "moi motivado", afirma o aleiro abulense. "É certo que tivemos algún momento de dúbidas ao longo da tempada, pero creo que a vitoria no último partido da Liga contra o Tizona, con aquela canastra sobre a bucina de Alex Barcello, deunos un grande impulso", destaca. E, como ao longo dos últimos anos, a calor da Caldeira de Sar resulta imprescindíbel. "O apoio que sentimos da cidade é indubidábel, a xente está moi ilusionada e temos a sorte de poder disputar estes dous primeiros partidos na casa, onde a nosa afección seguro que vai responder”, agradece o xogador. Unha adaptación complexa A transición do Obradoiro da Liga ACB á Primeira FEB foi un tanto complicada, xa que durante a primeira volta o equipo non logrou atopar a regularidade necesaria para se manter nos postos altos da táboa. Esta situación provocou a saída de Gonzalo Rodríguez e a chegada de Félix Alonso como substituto no mes de decembro. Ao técnico leonés sumáronse outras incorporacións destacadas como as de Vladimir Brodziansky, Lucas Faggiano ou Alex Barcello, entre outros, o que deu ao equipo un impulso clave nunha segunda volta na que se logrou asentar na parte alta da clasificación, chegando a encadear un total de 11 vitorias consecutivas. Para Álvaro Muñoz, esta boa xeira de resultados ten unha explicación sinxela: “Fomos capaces de adaptarnos todos e de pór o beneficio do equipo por diante do individual, porque a nosa fortaleza está precisamente no colectivo, xa que, normalmente, cando alguén tiña un día un pouco peor, sempre aparecía outro máis inspirado. Creo que por aí pasan as nosas opcións no play-off, somos un equipo moi completo”. A pesar de realizar unha segunda volta case perfecta, o conxunto compostelán non rematou a liga regular da mellor maneira posíbel. Nos últimos tres encontros encaixou dúas derrotas, nas que o equipo se mostrou especialmente errático. “É certo que houbo unha pequena baixada no rendemento. Unha vez que perdemos o partido de Fuenlabrada, sabiamos que iamos quedar quintos practicamente si ou si, e no encontro contra o Gipuzkoa non acabamos con boas sensacións. Non sabería dicir un motivo concreto, pero pode ser que xa estivésemos coa mente posta no play-off; nese sentido puidemos equivocarnos”, recoñece o capitán, xa centrado unicamente na eliminatoria ante o Palencia. Cristina Cantero, adestradora do Celta: "Tivemos máis problemas no eido psicolóxico que no do baloncesto" Un duelo entre dous equipos chegados da ACB O rival do Obradoiro nestes cuartos de final do play-off é o mesmo equipo que o acompañou no descenso a pasada tempada. Nesta ocasión, ambos os conxuntos volverán competir por un mesmo obxectivo, o regreso á Liga ACB. Sobre esta eliminatoria, Álvaro Muñoz sinala que é "a máis dura, ou polo menos a máis igualada, polos obxectivos dos dous equipos", polo que serán partidos "moi disputados e que se decidirán por detalles”. “Estamos a falar, facilmente, de dous equipos feitos para ascender. Quizais nós poidamos partir como favoritos polo factor cancha e pola calidade do cadro [de eliminatorias], pero se pensamos así estaremos errando. O que temos que facer é centrarnos a fondo en gañar o partido [de mañá] e marcarnos obxectivos a curto prazo”. O Multiusos Fontes do Sar acollerá os dous primeiros encontros desta eliminatoria, o primeiro, a sexta feira ás 20 horas e o segundo o domingo ás 18.15 horas. Para o capitán obradoirista, esta fin de semana pode marcar o rumbo da eliminatoria. “Se gañamos estes dous primeiros partidos na casa imos pasar de rolda case seguro, polo que os afrontaremos dándolles a importancia que teñen. A de Sar é unha pista que aperta moito; a de Palencia tamén, así que, neste caso, o factor cancha ten aínda máis relevancia”, augura. O aleiro advirte de que o play-off "é como unha montaña rusa; poden pasar moitas cousas". Por iso, chama os seus compañeiros a "estar tranquilos mentalmente", e se nalgún momento o partido ou a eliminatoria en conxunto se complica, non se poden baixar os brazos. "Non nos podemos vir abaixo, non é a fin do mundo. Ao final, trátase de gañar tres partidos; hai que estar preparados para o que poida ocorrer", sentencia.