Jessica Mendoza repite co Guardés e é a 10ª renovación para a vindeira tempada

O Mecalia Atlético Guardés xa suma dez renovacións para a vindeira tempada (2025/2026). Buscando dar continuidade ao seu proxecto do curso actual, o último nome que desvelou o equipo para o ano que vén é o da internacional paraguaia Jazmín Mendoza, que chegou como nova fichaxe esta mesma tempada e decidiu apostar por unha segunda na Guarda.

Mendoza, de 23 anos, é un dos activos internacionais máis fortes do elenco guardés. Na actual tempada acumula un total de 38 goles, malia ter perdido varios encontros, coma os dous últimos fronte ao Elche e Málaga, debido a lesións menores, o que proba a súa efectividade no ataque dende o estremo. Ademais, é igualmente unha peza chave na barreira defensiva guardesa, a menos goleada da categoría esta tempada.

A paraguaia aporta xuventude, dinamismo e versatilidade ao equipo da Guarda, calidades que a levaron a chamar a atención da súa selección nacional, a Confederación Paraguaia de Handball, de modo repetido nos últimos anos.

Nela coñeceu á súa compañeira de equipo Pauli Fernández, quen lle facilitou a adaptación ao cadro de xogadoras guardés, onde busca seguir medrando e sumando éxitos, coma a liga regular que o equipo asegurou virtualmente o pasado 5 de abril tras vencer o Costa del Sol Málaga.

Jazmín é a décima xogadora en renovar o seu contrato co equipo e conformar así o equipo 2025/2026 do Guardés, coma xa o fixeran Cristina Cifuentes, Cecilia Cacheda, Blazka Hauptman, Ania Ramos, María Sancha, Carme Castro, Elena Martínez, Estela Carrera e María Palomo.

"Moi ilusionada e feliz"

Jazmín Mendoza declara que se sinte "moi ilusionada e moi feliz" porque se lle dese a oportunidade de renovar o seu acordo co equipo. Mendoza insiste en que "desde que cheguei ao club sentinme moi ben recibida por todas", en referencia tanto ao compañeirismo no cadro de xogadoras coma ao apoio por parte do corpo técnico e a directiva do Mecalia.