Cando o salvamento e o socorrismo tornan en competición: así son as exixentes probas

Esta fin de semana os areais do Orzán (A Coruña) acollerán o Campionato Galego Absoluto de Praia de Salvamento e Socorrismo, unha disciplina deportiva pouco coñecida que cada vez ten máis seguimento. Trátase, neste caso, do evento máis importante da tempada por reunir o mellor de todo o país na que está considerada como a máxima categoría. Coas inscricións xa fechadas, este ano participarán 129 deportistas que pertencen a once clubs con sede no territorio galego. A competición comezará o sábado 6 ás 10 horas cunha sesión de mañá na que decorrerán as probas (segundo a súa denominación oficial) de carreira con ski de salvamento, nadar surf, rescate con tubo de salvamento e relevo ocean. Tras un descanso, pola tarde continuará coa carreira con táboa de salvamento, rescate con táboa de salvamento e bandeiras. Presenza galega asegurada no mundial de Socorrismo Para o domingo 7, as probas contan con iniciarse algo máis cedo, ás 9.30 horas, comezando co sprint praia para seguir co relevo sprint praia, ocean mixto e, por último, rematar co relevo ocean mixto. Desde a Federación de Salvamento e Socorrismo da Galiza (Fessga) teñen todo preparado para que estas once probas se desenvolvan no mesmo escenario do ano pasado coa espectacularidade que acostuman mostrar ao público que se achegue ao lugar. Probas en area e en mar A cargo da organización do evento figuran dous directores deportivos da federación: Sergio Quintela e Daniel Vila. O primeiro explica a Nós Diario que procederon con antelación a distribuír a praia do Orzán en dúas zonas de competición: a de mar e a de area. Para quen asista por primeira vez á cita, Quintela achega como serán as diferentes probas que se poderán ver. "A primeira, denominada carreira con ski de salvamento, emprega unha especie de piragua preparada para traballar nas ondas e mesmo 'surfealas' e chegar rápido até a area", asegura. A segunda consistirá "en percorrer unhas boias nadando e aproveitando as ondas co corpo como en surf" para dar paso ás probas de relevos. "A primeira emprega un tubo de salvamento no que sería o máis semellante a un rescate na praia” e a outra unha táboa de salvamento, “que agora é moi común por pórse de moda nas praias galegas”. Para Quintela, a parte máis dura de toda a competición é a que se denomina ocean, sexa ou non mixta, “por ter que facer o mesmo deportista tres probas seguidas”. Na zona da area decorrerán as probas de bandeiras, “onde dezaseis deportistas terán que agardar un sinal para coller as bandeiras, quedando fóra quen non colla ningunha”. Outra das probas en terra é o sprint praia, “unha carreira de 90 metros como en atletismo, que tamén ten o seu equivalente en relevos de catro participantes”. Denuncian a crecente privatización dos servizos de socorrismo Entre os once clubs que estarán presentes neste campionato galego, un dos favoritos, por numero de participantes será, outro ano máis, o Club Salvamento e Socorrismo Carballo (Sysca). Diante terán tamén entidades potentes neste deporte como son o Club Acuático Umia, de Caldas de Reis, ou o Club Salvamento Arteixo (Salvar) da comarca da Coruña. Este último tivo unha boa actuación nas categorías de base a pasada fin de semana no Ézaro, en Dumbría, e contará con serias opcións para levar varias medallas. Entre as deportistas destacadas que estarán no Orzán competiran, en ski, Helena Torreiro (Salvar); en nadar surf, Rosalía Marín (Salvar); en carreira con táboa, Ariadna García (Salvar); en ocean, Celia Lima (Umia) e en bandeiras, Marta Lasarte (Club Salvamento de Sada, SASA). Pola súa parte, na categoría masculina parten como favoritos, na proba de bandeiras, Javier Agrelo e Samuel Quintela (Sysca); na de ocean, Hugo Martínez (Sysca) e Mario Chacón (Salvar); e en Sprint, Pedro Mesejo (Sysca). Como anécdota, aínda que de interese, o campionato deste ano contará coa presenza, fóra de competición, da galega Lara López. Esta promesa do salvamento e do socorrismo, fichou esta tempada polo club cántabro Noja Playa, e volve á Galiza coa intención de prepararse para os campionatos do mundo que terán lugar entre o 23 de agosto e o 2 de setembro. Éxito deste deporte "Vivimos unha boa época no salvamento e socorrismo galegos", asegura Quintela, "cada vez hai máis licenzas e chegan rapazas e rapaces doutros deportes", agrega. Proba disto é que os últimos datos facilitados pola Secretaría Xeral para o Deporte indican que neste ano 2024, dos 1.173 deportistas que teñen o recoñecemento de alto nivel, a de salvamento e socorrismo conta con 80 e estaría en cuarto lugar, por tras de piragüismo (172), fútbol (82) e atletismo (82). Desde a Federación consideran que unha das razóns do éxito ten que ver con contar durante todo o ano cunha liga estábel, "sexa no inverno ou no verán". Isto facilita que os clubs poidan organizarse e "prever as súas competicións". O bo momento apréciase, ademais, na participación de varios deportistas coa selección estatal.