Marta Domínguez, campioa estatal de squash: "Os Xogos Olímpicos son xa a miña principal prioridade"

—Como viviu este Campionato de España que conseguiu gañar esta pasada fin de semana? Para min foi unha inmensa alegría. É certo que non era o primeiro, e non vives o momento especial da primeira vez mais sempre o vives con intensidade por ser unha vez ao ano. Nunca sabes en que condicións chegarán as túas rivais. Este ano foi para min especial por vir despois de perder en 2025 nunha final moi complicada e dolorosa e neste tiña como obxectivo principal levar o título. Estou moi feliz do resultado e da confianza que me dá para o resto dos torneos que veñen agora. —Como foi a preparación para o Campionato? A motivación é sinxela, sempre queres gañar. Por este motivo adestrar e coidarme cada día non me custa moito. Con todo, o día a día é de sacrificio, non só meu senón tamén de todo o equipo que me acompaña. Sen ese apoio sería imposíbel. Marta Domínguez, campioa estatal de squash: "Para min volver á casa, a Pontevedra e Galiza, é un xute de enerxía" O ano pasado tiven unha lesión en setembro que me complicou os adestramentos até decembro, mais cando continuei coa parte deportiva –a de preparación física non a deixei en ningún momento– foi un traballo diario. É certo que eu son a xogadora mais sen o seu traballo non o conseguiría. Estou moi agradecida ao club Rías Baixas e ao traballo do preparador físico, Pedro Vicente, do adestrador Damián Arosa, e do xogador que adestra comigo, Juan Simal. —Canto tempo dedica semanalmente aos adestramentos para conseguir ter estes resultados? Varía, depende das competicións que teña. Viaxo moito polo mundo, polo que hai días que tamén necesito algo de descanso que tamén é importante. O adestramento non son só horas na pista e no ximnasio, un deportista ten tamén que coidar a alimentación. Hai un montón de detalles que ao final marcan a diferenza no terreo de xogo. É sacrificado mais, ao mesmo tempo, vitorias como a desta fin de semana son reconfortantes —Semella que o squash é un deporta cada vez máis popular. Cal pode ser a razón da popularidade desta disciplina? Creo que por ser un deporte fácil de aprender, nada complicado como outros. Ademais é moi divertido. En pouco tempo fas o traballo físico que necesitas. Ademais, creo que agora coa inclusión do squash nos Xogos Olímpicos a partir dos Ánxeles 2028 moita máis xente coñéceo polos medios de comunicación. Oxalá aínda sexa un deporte máis practicado, é o que necesitamos. Polo de agora segue a ser minoritario e, canto máis medre, mellor será para nós. —Que se podería facer para que o squash sexa un deporte moito máis coñecido? A participación nos Xogos Olímpicos e a implicación da Federación axudará. Tamén as xogadoras e os xogadores temos que demostrar a nosa responsabilidade niso. Por último, teñen un papel fundamental os medios de comunicación. Que se coñeza ten moita relación, ao final, con ter información que chegue á xente. Eu considérome unha privilexiada de poder axudar nesa parte. Se os meus resultados axudan a que o xogo teña máis visibilidade sería xenial. A galega Marta Domínguez repite título de campioa estatal de squash —Falou varias veces dos Xogos Olímpicos nesta entrevista... É o maior soño posíbel para min. É certo que para poderse clasificar un día nos xogos olímpicos o traballo diario será imprescindíbel. Canto máis arriba estea no ránking mundial, maior posibilidade de poder xogar nos Ánxeles no ano 2028. É a maior experiencia que pode ter unha deportista e para min, desde logo, é desde xa mesmo o obxectivo principal. Os retos para 2026 de Marta Domínguez A viguesa Marta Domínguez, actual número 58 do ránking mundial de squash, ten por diante un ano de moitos e importantes retos. A vindeira segunda feira viaxará aos Estados Unidos de América (EUA) para participar en dúas competicións que forman parte do circuíto mundial e despois o seu reto será, con toda probabilidade, trasladarse até Australia. “Isto non para. Gustaríame tamén poder xogar en maio no Mundial, o meu obxectivo de cada tempada. Agora mesmo estariamos dentro”, explica a Nós Diario. Para o mes de agosto conta tamén con poder estar presente no Mundial universitario, “un evento no que hai dous anos quedei campioa e querería revalidar ese título tan especial para min”, agrega. Para estar en forma para afrontar todos estes compromisos, a xogadora adestra e tamén conta co descanso necesario esta semana no seu domicilio.