As marcas mínimas e unha nova cota española indignan á natación galega

A natación galega está en pé de guerra. Clubs, técnicos e a propia Federación Galega de Natación (Fegan) rexeitan a imposición de marcas mínimas para participar en competicións oficiais e pagar unha nova cota estatal para ter dereito a estar presentes fóra da Galiza. Estas medidas, anunciadas pola Real Federación Española de Natación (RFEN), removeron un sector queimado após anos de loitar por saír adiante con poucos apoios institucionais e coa etiqueta de estar no grupo dos deportes minoritarios. As redes sociais foron, nesta ocasión, a canle de comunicación que trasladou este malestar. A semana pasada, a través de Instagram, o presidente do CN PortaMiñá, Fernando Timiraos, publicou unha carta dirixida a Fernando Carpena, presidente da RFEN, que tivo máis de 60.000 reproducións. Nela afirmaba que con estas medidas a Federación "deixa de ser un organismo que impulsa o deporte para converterse nunha entidade recadadora" cunha decisión que "afecta clubs, familias, nadadores e adestradores". Pontevedra decidirá os mellores nomes da natación galega "A natación é un deporte moi practicado, mais é minoritario desde o punto de vista económico, a nivel de patrocinios ou de repercusión", explica Timiraos a Nós Diario. Por iso denuncia un duro panorama para entidades como a súa e as familias que a integran, que pagan "licenzas, dereitos de competición, arbitraxes..." e agora, di, aludindo á RFEN, "desmárcanse con outra cota que deberemos pagar se competimos, por exemplo, en Asturias". Marcas mínimas Após esta carta, o presidente do CN Mos, Adrián Trillo, publicou outra na que afondaba na decisión da RFEN de impor unhas marcas mínimas para os tres campionatos estatais da tempada 2025-26. "Eliminan a conversión de tempos entre piscinas de 25 e 50 metros pondo unhas 'mínimas b' que non representan a realidade da nosa natación", critica. "Están a pedirse para participar no Campionato de España, tempos de clasificación para un Campionato de Europa", apunta Timoraos a Nós Diario. Para o responsábel do PortaMiñá ,son cronos "inasumíbeis para nadadoras e nadadores de 17 e 18 anos que, con eses impedimentos, acaban por abandonar". Neste sentido, o actual director técnico do CN Vigo Rías Baixas, Enrique Pérez, após anos no mundo da natación mesmo ocupando até hai ben pouco a presidencia do club, confesa a Nós Diario que non entende "os criterios que teñen para pór atrancos á chegada das rapazas e dos rapaces" ao Estatal. Mateo García, a gran promesa da natación galega, fía o seu éxito ás augas abertas Entende que "poden endurecerse con respecto a outras tempadas; ou compites nunha piscina de 50 metros ou están practicamente condenado a non participar na de 25 metros". Con esta medida, Pérez cre que se pasará "dunhas probas con 250 deportistas a ter 50", pois "quedarán polo camiño moitos". Entre as eivas que observa este técnico, unha das principais ten a ver coa falta de piscinas de 50 metros: "Non temos as mesmas condicións que o resto do Estado, só temos tres públicas: a de Pontevedra, a de Ourense e a de Cervo". Desde a Federación Galega de Natación (Fegapen), o seu presidente, Juan Carlos Brión, coincide cos clubs en rexeitar as marcas mínimas "por ser exaxeradas". En declaracións a Nós Diario, afirma que o único que fan é "botar os rapaces e as rapazas fóra", alertando de que as mínimas en natación "xa son moi duras, cando noutros deportes nin as piden". Por este motivo, demanda que se faga "unha progresión", pois "agora é unha brutalidade". Máis gastos Quen tamén expresou a súa desconformidade coa RFEN é a presidenta do CN Redondela, Olalla Leiro. "Non ten sentido pagar unha cota de participación estatal, que son 65 euros, mesmo sen saber se poderán chegar a competir nela polos tempos que piden", asegura a Nós Diario. Trillo engade que, ademais de pagar as licenzas e as cotas, que poden chegar aos 600 euros, "as familias, após os gastos viaxe e de estancia para ver os seus fillos, teñen que pagar unha entrada á piscina para poder facelo". Brión tamén coincide en que non se poden "cargar máis gastos ás familias", polo que ten previsto propor a busca doutras opcións na asemblea que terá lugar pasadomañá. "Non entendo que saque [a RFEN] unha norma así sen que pase por unha asemblea, ímolo corrixir", asegura. Miguel Martínez remata 12º e non estará na final do Mundial de Natación Resposta da RFEN Preguntada a RFEN por Nós Diario a respecto das queixas, o organismo afirma que traballa "en colaboración coas diferentes comisións deportivas e territoriais para a elaboración das normativas", e cre que as achegas "de calquera" teñen que realizarse "polas canles estabelecidas". Por último, conclúe que a promoción da base "é unha responsabilidade compartida coas federacións autonómicas e os clubs". No momento de escribir esta reportaxe e tras a consulta deste xornal, a RFEN enviaba unha nota aos clubs asegurando que "suavizará" a marca mínima, propondo "un sistema de cupos". Ademais, en relación á cota de actividade estatal, apuntou que o que publicaron “non se entendeu ben” e que, "de momento", non se aplicará ningunha medida: "O 1 de xaneiro non entrará en vigor nada". Mala xestión sen atender á base Na súa carta, Fernando Timiraos sinalaba tamén as razóns que tería a RFEN para querer recadar máis. O presidente do PortaMiñá critica que na súa estrutura haxa "un dispendio excesivo entre directores técnicos, xerentes e un gran número de altos cargos que cobran unhas boas nóminas". Tamén o presidente da Federación Galega coincide con Timiraos en que a RFEN "ten unha débeda moi importante que quere paliar obrigada polo Consello Superior de Deportes". Brión explica que desde o Ministerio obríganlle a ter un "plan de viabilidade" do que saen decisións como estas cotas. Pola contra, a queixa de Timirais, que comparten outros clubs, é que "se dedican a 30 ou 40 nadadores, a elite que non reflicte para nada o que é a natación real".