Un Ludogorets en crise recibe o Celta máis en forma do curso

O Celta afronta esta cuarta feira ás 18.45 horas o seu quinto partido de Europa League en Razgrad, Bulgaria, na casa do Ludogorets. Ambos os conxuntos chegan a este duelo en momentos totalmente opostos. O Celta aterra cheo de ledicia tras unha única derrota nos últimos sete partidos, ante o Barcelona, mentres os búlgaros veñen de presentar o terceiro adestrador do curso para reverter a súa mala situación e son trixésimos na Europa League con só tres puntos. Tras unha vitoria traballada a fondo en Gasteiz o pasado sábado (0-1) ante o Alavés, o conxunto dirixido por Claudio Giráldez quere sumar de tres na súa visita a Bulgaria e afianzarse na zona alta da competición europea. Os vigueses ocupan a cuarta posición da táboa nun empate a nove puntos entre catro equipos –Celta, Braga, Aston Villa e Lyon–, e mantéñense na zona que dá acceso á seguinte fase por cinco puntos de vantaxe. A última vitoria en Zagreb por 0 a 3 deixou un gran sabor de boca na parroquia celeste, no que supuxo unha chamada de atención a toda Europa do que este Celta pode chegar a facer. O lateral Javi Rueda seguirá defendendo as cores do Celta outras catro tempadas máis Para o encontro desta cuarta feira Giráldez poderá contar con Williot Swedberg e Hugo Alvárez, xa recuperados das súas lesións e que levan adestrando co grupo toda a semana. Carlos Domínguez, cunha escordadura no nocello semellante ao caso de Hugo e que tamén adestrou co grupo mais sen recibir a alta, non entrou na convocatoria, da mesma forma que Fran Beltrán, que está a superar un proceso gripal. Tamén quedou fóra por decisión técnica Javi Rueda, nome destacado da semana celeste pola súa renovación até 2029. O xogador malagueño chegou a Vigo en 2023 e, tras un breve paso polo Fortuna e unha cesión ao Albacete, este curso está a resultar da confianza de Giráldez, á que respondeu con tres asistencias. Tamén sobresae o nomeamento de Ionut Radu como mellor xogador do mes de outubro do primeiro equipo celeste. O gardarredes rumano está a ser unha das pezas fundamentais do Celta e, malia confesar que aínda se resinte dunha pequena lesión que sufriu na man hai varias semanas, afirmou querer seguir traballando para o ben do equipo e probabelmente saia hoxe de partida. Na lista non entraron tampouco nin Franco Cervi nin Joseph Aidoo, este último por non ser escrito na lista do Celta para Europa. Pola contra, repite na convocatoria o canteirán Ángel Arcos, agardando un posíbel debut, e regresa Manu Fernández. O Ludogorets, amo e señor da liga búlgara Ante o Celta estará o Ludogorets Razgrad, un caso particular no fútbol europeo ao ser o único equipo que leva gañando a súa liga local 14 tempadas consecutivas. Este dominio abafante naceu en 2010, cando o magnate Kiril Petro Domuschiev adquiriu o club e profesionalizouno, conseguindo un ascenso no ano posterior e unha xeira de campionatos domésticos practicamente inigualábel. Ora ben, esta tempada o Ludogorets atópase nunha situación extraordinaria, cuarto clasificado na súa liga a 11 puntos da cabeza. Un Dinamo de Zagreb invicto recibe o mellor Celta da tempada A tempada para os búlgaros comezou truncada cando o adestrador co que gañaron o último título de liga, Igor Jovicevic, deixounos rumbo a Polonia. Os mandos do equipo recaeron no portugués Rui Mota, que foi eliminado na previa de Champions e que non foi quen de sumar máis que unha vitoria e dúas derrotas nos tres primeiros partidos de Europa League. Sumados estes resultados a un mal arrinque de liga, o portugués foi cesado a comezos de novembro e Todor Zhivondov, até ese momento director da academia do club, fíxose co cargo. A día de hoxe, menos dun mes despois da chegada de Zhivondov, xa non será el quen ocupe o banco do equipo verde. O 21 de novembro anunciouse a contratación de Per-Mathias Høgmo como novo adestrador do Ludogorets. Høgmo é un técnico noruegués con ampla experiencia nos bancos tras máis de vinte anos adestrando, frecuentando principalmente o leste de Europa malia unha aventura no Xapón. Aos seus 65 anos suma tres títulos a nivel de clubs: unha liga e unha copa suecas e mais a liga do seu país, e pode presumir de ocupar durante tres anos o cargo de seleccionador de Noruega, conseguindo o ouro olímpico co combinado feminino nos Xogos Olímpicos de Sidnei. Aspas decide en Mendizorrotza e o Celta prolonga a súa xeira triunfal fóra da casa Os conxuntos de Per-Mathias Høgmo acostuman a practicar un fútbol ofensivo desde unha formación de 4-3-3, tal e como puidemos ver no único partido que leva dirixido á fronte do Ludogorets. Este primeiro encontro saldouse cunha vitoria fóra da casa ante o Septemvri Sofia –antepenúltimo clasificado– por 0 a 2 con goles do central Dinis Almeida e do mediocampista Chochev. Do cadro de xogadores búlgaro podemos destacar como o xogador máis coñecido para o público o lateral dereito español Son, con pasado no primeiro equipo do Levante durante tres tempadas (2021-2023) e na Ponferradina outras dúas (2019-2020). O Huvepharma Arena será o estadio que albergará o encontro, cunha capacidade aproximada de 11.000 espectadores. A rexión de Razgrad conta unicamente con 33.000 habitantes pero, sen dúbida, buscarán pórllo o máis difícil posíbel a un Celta que chega nun mellor momento que os locais. O Celta imponse ante un valente Puerto de Vega O rexurdimento de Aidoo, que gaña peso na defensa celeste Joseph Aidoo era, até romper o tendón de Aquiles, un dos xogadores máis importantes na zaga defensiva do Celta que adestraba Rafa Benítez en 2023. O central ghanés mancouse nun partido coa súa selección nacional ante México a comezos de tempada, nun golpe que resultou fatal para a súa carreira. Despois de non atopar continuidade na súa volta aos terreos de xogo, o curso pasado saíu cedido a un Valladolid no que unicamente disputou oito encontros. Ante o seu último ano de contrato como celeste, todo parecía indicar que Joseph Aidoo seguiría sumido no ostracismo, sen chegar a recuperar aquela versión de antes da lesión. Para sorpresa de moitos, recentemente Aidoo saíu da nada contando con tempo de xogo. Apareceu no 11 titular no partido contra Osasuna para disputar 90 minutos, xogou tamén o partido completo ante o Puerto de Vega na Copa e contou cun 18 minutos no tramo final do último encontro ante o Alavés. Esta inesperada reaparición vén da man dun Giráldez ben coñecido por dar oportunidades aos seus xogadores e por ter moitas rotacións. O tempo ditará sentenza sobre se esta volta de Aidoo supón unha decisión pasaxeira do técnico porriñés ou se, pola contra, volveremos ver a un xogador que sumou máis de 100 partidos nas súas primeiras catro tempadas como celeste.