Lucía del Campo, a futura médica que despunta na elite do rugby estadounidense

O futuro do rugby galego está asegurado coa viguesa Lucía del Campo, que actualmente milita nas Lindenwood University Lions de Saint Charles, Missouri (Estados Unidos). Con tan só 18 anos, a xogadora galega conquistou o pasado sábado o seu segundo anel de campioa estadounidense de Rugby XV na máxima división universitaria. Dous triunfos que se suman a un palmarés xa de por si brillante no que destacan tamén 7 Ligas galegas de Rugby XV, 2 Copas da Galiza de Rugby 7s e un subcampionato estatal de Rugby 7s coa camisola da Irmandiña. Esta é a súa terceira tempada nos Estados Unidos, e máis concretamente na Universidade de Lindenwood, onde compite para o equipo de rugby da universidade mentres o compaxina cos estudos de Medicina. “Sempre quixen compatibilizar o rugby cos estudos, e Estados Unidos era un dos únicos sitios que me podía ofrecer iso”, explica, en conversa con Nós Diario. Cando a contactou o adestrador para trasladarlle o proxecto que tiñan e a exitosa traxectoria do equipo, Del Campo, satisfeita coa oferta, non puido “dicir que non, pois parecía un soño”. “Decidín vir, e a verdade é que nunca mirei cara a atrás”, di. Balaídos vibra cun Celta imparábel que ratifica a súa candidatura europea E as grandes expectativas coas que afrontaba este novo reto cumpríronse nada máis chegar. “Instaleime nos Estados Unidos e no meu primeiro ano, antes de voltar no Nadal á casa, xa tiña un título nacional”, apunta. Un ano despois, na súa segunda tempada, non conseguiu revalidar o título ligueiro, pero isto supuxo, como ela mesma destaca, “unha motivación para conseguilo este ano con este grupo de rapazas tan especial que o deu todo sobre o verde”. A adaptación de Lucía del Campo ao seu novo equipo e á liga estadounidense foi rápida, pois desde o primeiro momento tornou nunha das pezas clave das Lions para a consecución destes dous títulos en tres anos. A pesar de todo, a viguesa afirma que atopou grandes diferenzas no tocante ao estilo de xogo: “A Liga dos Estados Unidos é moito máis física que a do Estado español, e tamén diría que é moitísimo máis estruturada aquí, mentres que en Europa [xógase] un rugby máis creativo. A min gústanme ambos [estilos], teñen as súas diferenzas e cada un ten o seu encanto”. Unha futura médica na elite do rugby A maiores de estar competindo na máxima división do rugby estadounidense, Lucía del Campo pensa xa no seu futuro ligado ao ámbito sanitario. A viguesa atópase actualmente rematando un curso á carreira de Medicina mentres prepara o exame de acceso a esta facultade. “Quédame un ano en Lindenwood con este equipo e logo terei que ver cal é o meu seguinte paso”, precisa. Unha vez aprobado ese exame e certificado o seu ingreso en Medicina, terá que valorar as opcións que se lle poñan enriba da mesa e decidir un novo destino nesta aventura polos Estados Unidos. Nesa futura decisión, Del Campo terá que avaliar que lle ofrecen tanto a nivel de estudos como no aspecto deportivo, que na actualidade son os seus piares fundamentais. Tan esenciais son na súa vida, agora mesmo, tanto o rugby como a medicina, e a viguesa apenas goza de tempo de lecer fóra das aulas e os estadios. “É moi difícil compaxinar ‘pre Medicina’ cun deporte de alto rendemento, a clave está en saber estruturar moi ben o teu tempo. E sobre todo agora, de cara ao final, cando se xunta a época de exames coas fases finais do campionato”, admite. Cristina Cantero, adestradora do Celta: "Tivemos máis problemas no eido psicolóxico que no do baloncesto" Como compatibilizar a Medicina e o deporte? Con todo isto, e aos seus apenas 18 anos, ten un gran dilema sobre que quere para o seu futuro: seguir medrando na elite do rugby ou pensar, nun futuro máis afastado, na Medicina. Aínda é cedo, e a decisión, polo tanto, non parece estar asegurada: “O rugby é un deporte amateur e realmente non hai moitas xogadoras que poidan vivir diso; de feito, seguramente poidas contalas cos dedos dunha man”, di a viguesa, quen por outra parte recoñece que este deporte lle dá “moitísimo” e que lle “alimenta o corazón”. “O deporte ao final non me vai dar para comer, teño que dar prioridade ás dúas cousas. É moi difícil, porque cando estás así, tan perto dunha final nacional, con todo o que viviches, con todo o que traballaches, non poñelo como prioridade é complicado, pero ao final os estudos tamén están aí e hai que aplicarse nas dúas cousas”, sostén. Outra das opcións que valora de cara ao futuro é a combinación de ambas as súas paixóns. E como sería iso posíbel? Exercendo como responsábel dos servizos médicos dun equipo de rugby profesional e, deste modo, continuar polo camiño da Medicina mais sen desvincularse do deporte. “É unha saída que eu sei que me encantaría, e aínda que non sexa nun equipo profesional, sería incríbel”, salienta. Ademais, argumenta que, “desde o punto de vista sanitario, o rugby é un deporte moi interesante, pois ao ser tan físico e brutal para o corpo é curioso observar como os médicos tratan todos os tipos de lesións que se dan constantemente”. Unha paixón que comezou con 8 anos Os comezos de Lucía del Campo no rugby remóntanse a 2014, cando a viguesa só tiña 8 anos. “Inicieime no rugby un pouco por mor do meu pai e do meu irmán, que ten dous anos menos e que empezou cando tiña 5. Estabamos no Cuvi de Vigo e díxenlles que eu tamén quería probar. Isto foi un venres, e o sábado, no adestramento da mañá, vestinme coa roupa do meu irmán e alá fun probar. E xa non mirei atrás”, lembra. Desde aquela, Del Campo pasou polas categorías inferiores do Vigo Rugby Club, desde M10 até M18, sendo unha das primeiras xogadoras galegas en participar na M18 mixta, que compatibilizaba co equipo sénior feminino e coas diferentes categorías das seleccións galegas tanto mixtas (M14 e M16) como femininas (M18 e sénior), chegando a disputar unha Copa da Raíña de Rugby 7 co CRAT da Coruña e a ser convocada en múltiples ocasións coa selección estatal. O Pontevedra CF celebra o ansiado retorno á categoría de bronce convertido nun 'mataxigantes'