Lois de Jesús, promesa e esperanza do ciclismo galego

Lois de Jesús (Redondela, 2006), ciclista en idade júnior pertencente ao club Picusa Academy, acaba de ser chamado polo conxunto portugués Tavfer-Ovos Matinados-Mortágua para dar nel o salto á competición profesional no ano 2025. Con tan só 18 anos, Lois convértese nunha das grandes promesas e esperanzas do ciclismo galego. Con 7 anos subiuse a unha bicicleta para non baixar xa dela. A súa andaina en equipos comezou en 2013, na Escola de Ciclismo de Redondela (comarca de Vigo), que logo pasaría a chamarse Equipo Ciclista Cidade de Pontevedra, onde competiu até 2021, cando marchou ao Equipo Ciclista Teis, onde estivo durante os dous anos de categoría cadete. Xa en 2023, Lois deu o salto primeiramente ao Team Farto, para logo fichar polo Picusa Academy (equipo porriñés) onde remataría de formarse como ciclista en categoría xuvenil e onde comezou a competir en carreiras máis importantes. A XXII Volta á Galiza busca sorprender e propón unha proba "equilibrada" Na súa corta traxectoria –obviamente por unha cuestión de idade– ten xa na vitrina títulos como o de ganador do Trofeo Balnco Villar ou a Carreira da Ascensión, ademais de aportar aos logros do seu equipo até o momento, o Picusa, en copas como a UCI en Francia ou as probas disputadas en Portugal. “Foi algo inesperado, a verdade. Eu non agardaba pasar a un equipo e competición profesional sendo tan novo, pero a verdade é que é algo que afronto con moitísima ilusión. Teño moitas ganas de competir co equipo”, sinala Lois de Jesús sobre a súa fichaxe polo Tavfer-Ovos Matinados-Mortágua, en conversa con Nós Diario. “Penso que é o mellor para o meu futuro, para rematar de formarme e aprender o oficio e ademais, penso que [o ciclismo portugués] está en auxe”, explica sobre este paso na súa carreira. Lois é un “ciclista clasicómano”, autodefínese. “Prefiro as carreiras dun día con subidas curtas, de 15 minutos aproximadamente”, explica a respecto do seu estilo sobre as dúas rodas o redondelán. O Tavfer é un equipo que se caracteriza polo traballo cos velocistas e o dominio do sprint. Nun deporte como este, o material que emprega ten tamén unha importancia transcendental. A bicicleta coa que competiu durante este ano Lois de Jesús é unha Factor O2, que conta co equipo Shimano Ultegra Di2, o que lle dá unha enorme calidade nos cambios de marcha. Ademais, esta bicicleta destaca por ter un cadro lixeiro e resistente que permite unha maior facilidade á hora de enfrontar ascensos, dando maior axilidade, ao tempo que se combina con descensos controlados. Conta con freos de disco, o que lle dá seguridade á freada sexa cal sexa a condición climática e do terreo. Todo isto unido a un deseño aerodinámico que corta o vento con facilidade. O ciclismo toma Pontevedra co gallo do seu Gran Premio: todos os detalles da proba Agora mesmo cambiou de máquina (ao rematar a tempada, as bicicletas de competición devólvense aos equipos). Xa está a adestrar coa súa, unha TCR Advanced Pro1 Di2, que conta cunha boa relación rixidez-peso que, unida a un tubo aerodinámico deseñado empregando modelos de dinámica de fluídos computacional (CFD) e probas de túnel de vento, dan como resultado unha bicicleta lixeira de competición cunha capacidade de aceleración explosiva ao tempo que un pedaleo seguro. Porén, o ano que vén volverá cambiar de modelo para subir a unha Scott Adict, unha marca suíza das máis prestixiosas do mundo do ciclismo profesional que ademais introduciu no ciclismo profesional unha das innovacións máis significativas, a creación do guiador aerodinámico, estreado por primeira vez no Tour de Francia de 1989 polo ciclista Greg Lemond, que resultaría ganador da proba. No equipo luso encontrarase cun galego aos mandos, Gustavo César Veloso, ciclista profesional entre 2001 e 2021, gañador de títulos recoñecidos como a Volta a Catalunya; que agora se atopa na Dirección Deportiva do Tavfer. “Agardo ter unha rápida adaptación á categoría e ao equipo, aínda que este ano é para iso. Por iso, cantas máis carreiras faga durante esta tempada, e incluso cantas máis situacións distintas ocorran, que me caia, que pinche, axudar en tarefas de equipo… mellor para poder adaptarme ao equipo, á competición e, por suposto, como obxectivo a longo prazo para chegar o máis alto posíbel na miña traxectoria profesional”, explica Lois desde a ilusión por afrontar esta nova etapa. Quizais máis axiña que tarde, siga de perto os pasos do seu ídolo desde a infancia, Alejandro Valverde ou un dos referentes mundiais do ciclismo actual: Tadej Pogacar, quen fai “cousas sobrehumanas sobre a bici”, como di Lois. Galiza, un territorio ideal cun clima complexo Non é por cliché, Galiza ten un problema coa auga e o frío se falamos de ciclismo. “Galiza é para min o lugar ideal para adestrar porque temos toda clase de terreos e, ademais, únenselle unhas vistas impresionantes cando vas na bici, con portos de montaña preciosos e estradas planas na costa. Pero ten un único gran fallo: a choiva e o frío durante o inverno”, explica Lois de Jesús. “Agora mesmo [o ciclismo galego] pasa unha mala época no ciclismo de escolas. Desde hai 10 ou 15 anos para aquí, ao mellor pasaron a ser case a metade de rapaces e rapazas competindo nas carreiras de categorías base”, analiza sobre a situación Lois, e apunta: “Penso que os equipos deberían organizar algunha carreira máis en liña en lugar de tantos circuítos”. Sete galegos están na elite profesional, Coa chegada de Lois, serán 7 os ciclistas galegos na elite profesional masculina deste deporte e, a meirande parte deles, compiten en Portugal. Todos están no país luso. No mesmo equipo polo que vén de fichar Lois de Jesús, o Tavfer, compiten o cambadés Ángel Sánchez Rebollido e o verinés Andrés Taboada. Mais tamén o pontevedrés Guille García Janeiro (no Sabgal), o moañés Delio Fernández (Tavira) e o chapeleiro Samuel Blanco Prol (Tavira) pedalean en equipos portugueses. A excepción é a do limiao Carlos Canal, que compite no Movistar Team. Canal é un dos grandes nomes do ciclismo galego. En 2019 proclamouse campión de España de ciclocrós e mountain bike cross country na categoría júnior para fichar ese mesmo ano polo equipo continental profesional Burgos-BH e xa en 2021 competiu na Volta a España antes de, en 2022, pasar a formar parte do Euskaltel Euskadi. Foi este mesmo ano, 2024, cando asinou polo Movistar. Galiza quizais bota en falta un equipo como aquel “Xacobeo Galicia” que competía nos Circuítos Continentais (UCI) e que fora o primeiro equipo ciclista profesional galego, nado en 2006 e cunha curta vida logo de desaparecer en 2010. Aquel proxecto impulsado pola Xunta da Galiza, que pretendía lanzar un Euskaltel Euskadi galego, contara ademais co apoio económico do histórico xogador do Celta de Vigo Karpin, precisamente por iso o equipo competiu baixo o nome “Karpin Galicia” un par de tempadas. Porén, o nacemento este 2024 de proxectos como o equipo junior do Picusa Academy, pretende ser unha nova oportunidade para o ciclismo galego.