O Liceo busca ante o Reus o pase á gran final polo título de Liga

O Hockey Club Liceo volve estar un ano máis nas semifinais do play-off polo título, logo de remontar a eliminatoria fronte ao Pons Lleida. O conxunto herculino perdeu o primeiro partido dos cuartos de final na casa, pero foi quen de vencer a domicilio para devolver a eliminatoria ao Pazo dos Deportes de Riazor, onde se volveu impor ao conxunto catalán e, deste modo, asegurou o seu posto na seguinte rolda. Sobre este primeiro duelo do playoff, o seu técnico, Juan Copa, aclarou: “Pasamos unha eliminatoria durísima fronte a un equipo moi forte como o Lleida, que xa sabiamos que nos ía levar ao límite. Tres partidos con finais moi igualados, cunha situación de cinco para catro en todos, que se complicou co feito de perder o primeiro. Pero creo que o equipo sae moi forte e reforzado desta eliminatoria mentalmente”. Agora afronta as semifinais contra o Reus Deportiu Virginias, nunha nova eliminatoria que se decidirá ao mellor de cinco encontros. O primeiro deles disputarase esta sexta feira na Coruña (Pazo dos Deportes de Riazor, 20.30 horas) e o segundo tamén será en terras galegas, este domingo ás 12.30 horas. Os dous seguintes xogaranse en Catalunya e, se fose necesario un quinto partido, o finalista decidiríase na Coruña. O CRAT da Coruña tira de canteira para afianzar o seu proxecto na elite Para este enfrontamento, o Reus parte cunha lixeira vantaxe, xa que tivo máis días de descanso ao resolver a súa eliminatoria en dous encontros, en lugar de tres. Polo tanto, o factor físico será clave de cara a estas semifinais, aínda que Copa non lle deu moita importancia, pois sinala que “o físico non me preocupa moito, xa que temos unha rotación moi ampla, os oito que están a xogar están a achegar moitísimo. Un día aparecerá un, e outro día aparecerá outro, pero o importante é o equipo, sempre por riba de calquera xogador”. Onde si quixo pór máis énfase o técnico herculino foi no aspecto mental, do que destacou: “Vainos facer falta estar fortes mentalmente porque, evidentemente, agora temos un óso duro diante, como é o Reus, que vén dun ano espectacular, cun título como a Copa do Rei e facendo unha moi boa fase regular”. Pola contra, o Liceo terá a vantaxe do factor pista neste duelo, ao quedar segundo clasificado, un posto por riba do Reus, que foi terceiro. A diferenza da anterior eliminatoria, onde os coruñeses tamén contaban con esta vantaxe, Juan Copa apunta que agora van "tentar facer o que non fixemos no primeiro partido contra o Lleida, que é pensar primeiro na sexta feira e intentar defender e protexer a nosa casa”. Modo play-off activado O Liceo xa se atopa no tramo clave da tempada, e todo o conseguido na liga regular xa é pasado. Tras superar a primeira rolda nun formato ao mellor de tres partidos, os de Juan Copa deberán gañar tres encontros fronte ao Reus para ter un oco na final, na que estará ou ben o Barcelona ou o Parlem Calafell. Sobre este cambio de formato, o técnico coruñés explicou que "hai cousas que non podemos controlar e unha delas son os formatos. Creo que vimos de superar unha eliminatoria durísima, porque sendo a tres partidos, perdes o primeiro na casa, que é o que nos pasou, e de súpeto perdes a vantaxe de pista. Iso fai que teñas que afrontar os dous seguintes partidos como dúas finais”. O balonmán crece na Coruña da man dun OAR que xa é de Prata Pero esta situación foi valorada positivamente por Copa, xa que comentou que viven "ben nesa situación baixo presión. Defendemos a eliminatoria en Lleida, onde creo que fixemos un gran partido, e a terza feira, igual, fixemos outro gran partido. O equipo está ben, e aí é cando aparece unha versión moi boa do Liceo, con esa solidez que tanto estamos a pedir de ter sempre, e sendo capaces de levar os partidos cara a onde nós queremos”. A rivalidade entre Liceo e Reus durante toda a tempada foi notábel na loita por ese segundo posto, que acabou caendo do lado dos coruñeses. Porén, nos enfrontamentos directos, a estatística favorece os cataláns, que se impuxeron nos tres encontros disputados entre ambos. Pero isto non é relevante de todo para Juan Copa, xa que agora enfróntanse nunha situación diferente, a do play-off, e o xeito de afrontar estes encontros é totalmente distinto, polo que remarca que o seu obxectivo na liga regular non era gañar ao Reus, senón "quedar o máis arriba posíbel. Primeiro era difícil porque o tiña ben atado o Barça, pero traballamos moi duro nesa loita co Reus por quedar segundos e, por iso, creo que fixemos unha liga regular moi boa”. Neste formato de play-off, o Liceo está a desenvolverse ben, xa que logrou alcanzar as semifinais nos catro anos nos que se implementou. De feito, Juan Copa asegurou que están a "interpretar ben" este play-off, "e iso é o que temos que facer". "Empezamos con dous partidos na casa, coa nosa xente, e imos tentar golpear primeiro e presentarnos o domingo con ese un a cero", conclúe o adestrador do Hockey Club Liceo. Novos retos: A oitava tempada de Juan Copa no Liceo O técnico coruñés pasou á historia do club ao converterse no segundo adestrador con máis partidos dirixidos no Liceo, do que destacou que "loitou moito para poder chegar a este banco, e aguantar nel é complicado, pero creo que sei perfectamente o que é o ADN deste club. Son da Coruña, ninguén mo ten que explicar”, e engadiu: “Son oito anos consecutivos, se estou tanto tempo é porque se está valorando que o traballo que estamos a facer é bo. É certo que tivemos aí uns anos dun ciclo gañador moi bo, e o obxectivo é volver a ese punto”. As claves do 'novo' Celta: da decidida aposta pola canteira á unión coa xente Un ano máis, a tempada do Liceo recibe unha boa nota que o coloca entre os mellores conxuntos de todo o Estado. O propio Copa confirma isto e subliñou que foron "de menos a máis, como sempre". "Creo que competimos e estamos a competir por todos os títulos, que é o que nos pide a nosa afección e a camiseta, xa que o ADN do Liceo pasa por insistir en todo”, engade. A campaña chega ao seu fin e o Liceo continúa con opcións de conseguir un título. De feito, a confianza é plena para rematar o ano ao grande. “Somos moi positivos [...], nós sempre aspiramos ao máximo, porque aspirando ao máximo e insistindo é cando podes chegar á excelencia que, evidentemente, é gañar un título, e é nesa loita na que estamos”.