Joel Ribeiro deixa o júnior da patinaxe artística galega no máis alto do podio

O gondomarés Joel Ribeiro despídese este ano da categoría júnior para incorporarse en 2026 á sénior. Faino após unha tempada espectacular na que conseguiu, na categoría individual, ser campión galego, campión estatal, campión de Europa e medalla de bronce no Campionato do Mundo. “A verdade é que foi unha tempada incríbel”, recoñece o deportista de Gondomar (comarca de Vigo) a Nós Diario. Da última competición, o Mundial de Beijing, na China, sinala que “iamos a por todas para tentar defender o mellor posíbel o traballo que realizamos durante todo este ano e acabamos contentos tamén”. Con anterioridade, Ribeiro conseguiu o ouro no Europeo que decorrera na cidade italiana de Trieste. "Foi unha competición moi boa, a verdade, e o resultado non podía ser mellor", explica o patinador. "Mais, á parte diso, a sensación coa que acabamos esta competición tamén foi moi boa por rematar ambos os dous discos sabendo que demostrara todo o traballo da tempada", agrega. Lucas Yáñez: "Non me poño límites, quero ser campión do mundo absoluto" O mérito dun club “Estou moi orgulloso e agradecido co equipo que me acompaña cada día na pista. Ao final, as medallas tamén en parte son deles”, entende. Nese sentido, a progresión deste patinador non se podería entender sen a achega do club que preside David Figueroa. Desde decembro do 2013 o Club de Patinaxe Artística de Gondomar converteuse nunha referencia desta modalidade deportiva na Galiza, sobre todo polos seus logros nos apartados nos seus éxitos nas modalidades de libre, só danza (individual), show e cuartetos. "Obviamente é unha satisfacción persoal saber que me esforcei e que co sacrificio viñeron os resultados, mais penso que nada disto sería posíbel sen o meu adestrador, David [Figueroa]", confesa Ribeiro. Na memoria deste patinador está como comezou coa patinaxe nas escolas da Deputación de Pontevedra na súa localidade cando tiña seis anos. Alí coñeceu a David Figueroa, o técnico que impartía as aulas e a “primeira persoa” que lle puxo uns patíns. Ese momento marcou a súa vida deportiva até hoxe que continúa ao seu carón. Preguntado polo “segredo” dun club que leva gañados tantos títulos e é un referente a nivel estatal con varios trofeos internacionais, Ribeiro volta a sinalar o seu adestrador, que, ademais, preside a entidade que creou. “Trabállase moito e, sobre todo, confíase sempre en David, as súas ideas e a súa forma de funcionar”, indica. “Eu creo que é algo que nos fai moi únicos e que nos diferencia moi facilmente na pista. Caracterízanos a nosa forma de patinar e eu creo que vén da forma de traballar con el”, agrega o de Gondomar. Adestramentos semanais Os adestramentos son unha parte fundamental no deporte en xeral e na práctica da patinaxe artística tamén. Agora, coa tempada rematada, Ribeiro recoñece que hai “unha relaxación”, mais en breve comezarán a preparar novas coreografías. No verán, os adestramentos son cinco días á semana, “dúas horas pola mañá” e despois outros dous días, pola tarde, teñen aulas de preparación física “en que tentamos conseguir resistencia”. Nadia Iglesias conquista para Galiza o primeiro campionato europeo de patinaxe artística Outro dos temas importantes nesta disciplina deportiva son as coreografías. “En individual temos dúas, e nunha delas a Federación Internacional de Patinaxe, estipula un tema predeterminado para cada categoría”, explica Ribeiro. No caso da segunda, o tema é libre. “Cadaquén decide a música e o que quere representar”, indica o gondomarés. Aquí interveñen David Figueroa e Llorenç Álvarez, este último o encargado esta tempada que acabou de facer as dúas coreografías. "Entre todos pensamos a idea, a música e os maillots tentando que en pista se vexa o mellor posíbel o que tentamos representar", aclara. E, cos resultados conseguidos, semella que o equipo acertou este ano en todas as competicións.