Indignación no celtismo: a alcaldesa de Mos converte a presentación da nova cidade deportiva celeste nun mitin do PP

A Cidade Deportiva Afouteza foi esta quinta feira escenario do acto simbólico de colocación da primeira pedra da segunda fase do proxecto GS360, que desde agora pasa a chamarse Celta360. O evento, chamado a marcar o comezo dunha nova etapa na historia do club co inicio da nova cidade deportiva, converteuse nunha fonte de controversia debido á actitude mantida por parte de representantes do PP.

A alcaldesa de Mos (comarca de Vigo), Nidia Arévalo, converteu o acto do Celta nun mitin a prol do Partido Popular ao lembrarse "do presidente [Alberto Núñez] Feixoo". "Todos sabedes que son moi insistente e moi intensa, e teño a sorte de poder dicirvos que estes últimos tres días falei con el en persoa e por teléfono e fixo todo o posíbel para poder estar, mais non foi fácil", aseverou a rexedora.

"El envíavos unha forte aperta, por suposto, mais tamén lle gustaría tanto estar que seguro que en algún momento estará, e eu, pois vou dicir o que penso e o que me gustaría, e o que me gustaría é que dentro de dous anos cando rematemos todo isto o presidente Feixoo veña inaugurar estas instalacións como presidente do Goberno de España", manifestou Arévalo. "Queridos todos, remato dando as grazas", concluíu a súa intervención.

Estas foron as palabras de Arévalo ante deportistas de elite, diferentes autoridades, patrocinadores vencellados ao proxecto e persoal do club que non quixo perder o acto, así como ante máis de 200 celtistas que acudiron á presentación desta nova fase, mais que probabelmente non contaban cunha declaración política tan evidente por parte da rexedora popular.

O emprego da alcaldesa deste acto para promoción do líder estatal do Partido Popular enervou os ánimos de moitos e moitas seareiras do conxunto celeste, que manifestaron nas distintas redes sociais o seu enfado e indignación polo emprego das cores do Celta dunha forma partidista e que moitas consideraron fóra de lugar.

O evento

O evento comezou cunha introdución da presentadora galega Esther Estévez, quen foi a encargada de conducir unha tarde moi especial, dividida en tres momentos: pasado, presente e futuro. O recordo da orixe do club chegou da man de Juan de Castro, neto de Manuel de Castro Handicap. O presente estivo representado por deportistas de talla mundial como Rodrigo Corrales, xogador de balonmán; Teresa Portela, piragüista; María Araujo, xogadora de baloncesto; e o relevante preparador físico, Pepe Casal. O futuro foi narrado por Lara, capitá de As Celtas, e Damián, xogador do primeiro equipo celeste, ambos exemplos perfectos de como a canteira e o traballo abren camiños reais cara á elite e do tanxíbel que é pasar da bancada ao campo.

Tras este bloque, Esther deu paso a Carlos Cao, director de infraestruturas do club; Marco Garcés, director de fútbol; e Claudio Giráldez, adestrador do primeiro equipo, para falar sobre a competitividade do Celta, sobre o seu futuro e a mellora deste en canto a instalacións e tamén na parte profesional e persoal de todos e todas os e as futbolistas.

"Hoxe iniciamos esta segunda fase de Celta360 e facémolo cunha mestura de emoción, ilusión e, sobre todo, de orgullo… Estamos ilusionados e preparados para afrontar o que este proxecto representa para o club e para o deporte galego… Celta360 reforzará esa conexión coa comunidade, porque agora si, con esta segunda fase, será un lugar aberto para todos os celtistas e para toda a comunidade", afirmou Marián Mouriño.

A presidenta do club tamén quixo facer referencia ao que significa este proxecto para o Celta, recollendo no seu discurso cada punto dos anteriormente mencionados e destacando que a creación da nova Cidade Deportiva Afouteza foi posíbel grazas ao apoio do persoal, dos patrocinadores, da Comunidade de Montes de Pereiras, do celtismo e das institucións, que tamén tiveron o seu momento. 

Nidia Arévalo, alcaldesa de Mos, asegurou que "entre todos conseguímolos… Grazas por confiar en Mos e en min… Este será un legado para os nosos fillos e para os nosos netos"; algo que revalidou Alfonso Rueda, presidente da Xunta de Galiza, que bautizou este proxecto como "unha aventura para todo o mundo… Imos xuntos no mesmo barco… Este é o futuro do Celta, pero tamén do deporte na Galiza… Isto transcende o fútbol… Isto non é máis que o principio". O ramo púxoo o escritor Defreds, cun emotivo texto que deu paso ao cóctel de feche.