O Gran Premio Albariño volta a Cambados para pór o foco no ciclismo de base

Cambados (O Salnés) acollerá este sábado unha auténtica festa do ciclismo galego de base. A vila de Cabanillas vivirá de novo outra edición, e xa van 55, do Gran Premio do Albariño-Memorial Ernesto Falcón Padín, unha das citas destacadas para abrir o verán para o deporte de dúas rodas. A proba, organizada polo Club Ciclista Cultural Cambados coa colaboración do Concello e da Federación Galega de Ciclismo, bateu este ano o seu récord de participación con 200 ciclistas, o máximo permitido para este tipo de eventos. Comezará ás 18 horas na Avenida da Galiza e decorrerá nun circuíto urbano de 1,1 quilómetros pola zona de beiramar. Rodarán por el diferentes categorías que van desde principiantes, promesas, infantís e alevíns até júnior e cadete. En declaracións a Nós Diario, o tesoureiro do club CCC Cambados, Antonio Casal Rey, apunta que a importancia do Gran Premio ten a ver coa súa propia historia. "Con estas características é a máis antiga da Galiza; quizais tamén das máis antigas do Estado. É principalmente unha carreira das escolas de ciclismo que, ademais, permitía a sub-23 e a elite feminino participaren por non contar con tantas carreiras", agrega. A Federación Ciclismo Galego dá a coñecer o calendario anual de 2025 Clubs participantes Sobre as inscricións deste ano, Casal móstrase satisfeito polo traballo realizado e salienta que hai máis de 30 clubs confirmados de distintos puntos da Galiza, mais tamén do resto do Estado español. No apartado galego destaca a presenza, por número de inscricións, de clubs como o Cortizo padronés e o Froiz de Poio. "Ademais, veñen outros que fan un gran traballo de base, como o Barbanza, o Vigo, o Teis, o Betanzos, o Compostelano, o Cambre, o Armenteira –en Ponteareas– e tamén o Ribadumia", informa. A proba, sobre a mesma distancia, constará de varias voltas ao circuíto dependendo das diferentes categorías, partindo de 4 e 5 voltas nas máis pequenas e até 25 ou 30, que realizan nas categorías júnior e feminina. Ruta entre viñedos Unha das novidades desta edición do Gran Premio, mais como unha actividade independente, será a realización pola mañá, ás 11 horas, dunha ruta cicloturística entre viñedos. "É unha actividade que se realiza en colaboración coa Concellaría de Turismo e que pon o foco nas persoas que lles gusta a bicicleta mais non a teñen como deporte de competición", sinala Casal. A proba da tarde será "unha carreira acelerada, e o que facemos agora pola mañá é todo o contrario", explica. A intención é promocionar a actividade ciclista entre as familias, "sobre todo entre a xente do municipio", ademais de incitar a que "haxa novas incorporacións ao mundo do ciclismo nun futuro". As inscricións funcionan de diferente maneira que no Gran Premio, mais teñen unha listaxe agora mesmo de 80 persoas apuntadas, "coa intención de chegar ás 110 o propio día". O percorrido contará con 20 quilómetros en total, aínda que desde a organización aseguran que está pensado para que se adapte a todo tipo de participantes, polo que exixencia física é baixa. Lois de Jesús, promesa e esperanza do ciclismo galego Resistencia deportiva O mérito do CCC Cambados residiu todos estes anos na resistencia como entidade deportiva. A finais do ano pasado esta histórica proba estivo a piques de desaparecer e varios medios de comunicación aseguraron daquela que podería rematar noutro municipio da comarca do Salnés despois de tantos anos. A explicación, confesa o propio tesoureiro da entidade, "foi fundamentalmente económica". O club, que na actualidade conta con 80 persoas asociadas, depende case totalmente das achegas da súa masa social e dalgúns patrocinadores para realizar as súas actividades. No momento de preparar esta edición do Gran premio atopáronse con parte das facturas municipais de 2023 e 2024 sen pagar. "Para nós 5.000 euros é moito diñeiro mais tamén entendemos que se hai outras facturas superiores por parte de provedores estean por diante das nosas”, aclara Casal. "Ao final o problema solucionouse e a proba poderá disputarse na vila como se fixo desde a súa creación", engade. Sobre o futuro do club, este directivo do CCC Cambados quere ser cauto e evita lanzar grandes promesas públicas que despois sexan difíciles de cumprir. "Cando chegamos hai catro anos o club estaba a piques de desaparecer. Daquela o obxectivo era mantelo e consolidar o Gran Premio Albariño, a actividade que deu sona ao club, e é o que estamos facendo", conclúe Antonio Casal.