Fútbol amateur contra profesional, un partido de Copa que vai máis alá do resultado

Esta quinta feira é o día máis especial e importante de toda a historia do humilde San Tirso SD, equipo da parroquia de Mabegondo, en Abegondo (comarca da Coruña), un concello con pouco máis de 5.500 habitantes. O San Tirso é un dos oito representantes galegos e un dos dez equipos de categoría rexional que participan nesta edición da Copa do Rei. Actualmente compite na Preferente Norte e vén de proclamarse vencedor da Copa da Coruña, a Copa Deputación e a Supercopa da Galiza, fitos que o levaron a ser o representante do fútbol amateur galego no torneo do KO. Para poder medirse cun equipo de Primeira División os de Abegondo debían, primeiro, superar unha eliminatoria previa fronte a un conxunto de categoría rexional doutra comunidade autónoma. O rival do San Tirso para esta fase previa foi o Selaya (Cantabria), co que empatou nos 90 minutos regulamentarios (1-1) e logrou vencer nos penaltis (5-3) para, desta forma, selar o seu pase á Copa. “Non mo cría, foi como un soño feito realidade e até que pasaron uns días non asimilei o que fixeramos. Sen dúbida, foi un dos momentos máis felices da miña vida a nivel deportivo e será algo que nunca esquecerei”, lembra, en conversa con Nós Diario, Iago Meijide, xogador do San Tirso, sobre aquel partido no que lograron a clasificación. Adiado o Pontevedra CF-Levante UD da Copa do Rei polos efectos do temporal Iago é un rapaz da Coruña que compaxina os seus estudos co fútbol, que para el é “unha paixón”. “Sempre estou esperando o próximo adestramento ou partido. Síntome como un neno pequeno cando xogo e aínda que estea pasando un mal día o fútbol cámbiamo por completo”, afirma. Ao igual que este mozo, o resto de compañeiros que completan o cadro de xogadores compaxinan o fútbol co traballo ou os estudos, polo que este partido será un premio para todos eles. O histórico encontro disputarase no estadio de Riazor dado que o seu campo, O Monte, non cumpre cos estándares da competición, algo moi especial para moitos deles, naturais da Coruña. “Xogar no estadio da túa cidade un partido é algo co que todos soñamos, e xa o foi cando xogamos a final da Copa da Coruña contra o Vitoria alí. Agora xogar en Riazor contra unha Primeira División é outro gran soño”, comenta o centrocampista do San Tirso. Os días previos ao partido están sendo un tanto especiais para moitos deles. “Estou a facer as mesmas cousas que sempre, pero é verdade que cando pensas que esta semana xogas contra un equipo de Primeira un partido de Copa empezan a entrar os nervios e as ansias de que chegue ese momento de saltar ao campo e gozar o máximo posíbel”, salienta. Un dos momentos máis especiais destes encontros é o intercambio de camisetas cos xogadores rivais. Iago Meijide recoñece que non sabe a quen lle pedirá a camiseta, pois no Espanyol “hai varios xogadores” cos que lle gustaría facelo, entre os que cita Edu Expósito ou Javi Puado. “Aínda así, toque a que toque gardareina con moitísima ilusión e será un gran recordo deste día tan especial”, di. A galega Uxía Romero, subcampioa de Europa júnior de halterofilia Un premio a moitos anos de traballo e sacrificio Esta tamén será unha oportunidade única para o seu adestrador, Fabio Rodríguez, que valora este encontro como “un premio a moitos anos de traballo e sacrificio”. “Isto é algo que vai quedar sempre para o recordo”, destaca. Tamén é algo complicado para el, porque ten que lidar vivir este soño da Copa do Rei con “manter os pés” na terra e seguir rendendo a un bo nivel na súa liga. “Esta semana foi un tanto complexa, adestramos na terza feira de cara ao partido de liga do domingo e na cuarta fixemos pouca sesión en campo e centrámonos máis en analizalos un pouco a eles, aínda que realmente a estratexia do Espanyol será totalmente distinta á que teñen en liga debido á diferenza de categoría e de nivel. Centrarémonos en orientar os perfís dos xogadores e o que vai atopar cada un enfronte máis ou menos”, apunta o preparador do conxunto abegondés. Como adestrador, Rodríguez é consciente da exixencia deste encontro e de que hai moitas posibilidades de que acabe en goleada, polo que o que máis lle preocupa non é o resultado, senón “quen queda sen xogar, porque é un día no que todo o mundo quere estar e o máis probábel é que non se volva repetir algo así, polo que para min, iso é o máis doloroso”, apunta. Pensando xa no devir da tempada, o técnico valora este partido como “un máster de adestramento en canto a aspectos defensivos”. Desde o club coinciden en que o obxectivo xa se cumpriu e que agora só queda desfrutar deste choque, que o máis probábel é que non se repita. “Vai ser un partido onde imos sufrir no deportivo, pero que temos que desfrutar. Desde a directiva din que a xesta xa a fixemos, agora ao club o que lle importa é que veña xente e poder facer unha boa caixa, malia que nos metan 3, 4 ou 8 goles. Hai que ser realistas e sensatos, o premio gordo xa o conseguimos”, salienta Rodríguez.