Fontán e Domínguez dominan en C2 500 e súmanse ao éxito galego do selectivo

O piragüismo galego segue dando alegrías. A última esta quinta feira mesmo no encoro do Portillón de Castro, na parroquia pontevedresa de Verducido, cando se confirmou a presenza de deportistas da Galiza no equipo estatal que acudirá ás Copas do mundo de Szeged (Hungría) e Brandenburgo (Alemaña) en maio. Este segundo selectivo estatal de Sprint Olímpico estivo centrado nas probas de equipo de 500 metros, deixando certificada así a participación de boa parte das candidatas e dos candidatos para os compromisos internacionais dos vindeiros días. Carlos Arévalo e Rodrigo Germade marcan o mellor crono en Milán Tal e como estaba previsto pola organización, clasificábanse as dúas primeiras embarcacións de cada final para estar na selección que viaxará a Hungría e Alemaña, citas nas que se terminará de escoller quen acudirá ao Campionato de Europa e tamén ao Campionato do Mundo. Galiza, por diante Na final de C2 500 masculino, a embarcación formada polo padexeiro vilagarcián Manuel Fontán (Club Náutico O Muíño) e o madrileño Diego Domínguez (Club Fluvial de Lugo) impuxéronse cun tempo de 1:39,54. A segunda posición, tamén clasificada, foi para Daniel Grijalba e o pontevedrés Adrián Sieiro (Club Náutico O Muíño), con 1:40,37, mentres que Cayetano García de la Borbolla e o pontevedrés Martín Jácome (Escola de Piragüismo Cidade de Pontevedra) completaron podio con 1:41,99. A xornada para a competición masculina concluíu co K2 5, onde Adrián del Río e o cangués Rodrigo Germade (Club Fluvial de Lugo) lograron o triunfo cun tempo de 1:29,70, seguidos de Enrique Adán e Carlos García, con 1:30,13, e Alberto Llera e Íñigo Peña, terceiros con 1:31,17. Presenza feminina No C2 500 feminino, o triunfo foi para María Moreno e Viktoriia Yarchevska, cun rexistro de 1:55,84. A parella formada pola pontevedresa Claudia Couto (Kayak Tudense) e María Corbera terminou segunda, con 1:58,63, asegurando tamén a súa presenza internacional, seguida da dupla formada por Elena Gómez Millán e Ana Cantero, con 2:01,58. A loita contra vento e marea da incombustíbel Teresa Portela A final do K2 500 feminino estivo marcada pola igualdade e resolveuse coa vitoria de Lucía Val e Bárbara Pardo, que cruzaron a meta en 1:43,31. A segunda praza foi para a pontevedresa Carolina García (Club Fluvial de Lugo) e Nerea García, con 1:43,54, mentres que Miriam Vega e Laia Pelachs finalizaron terceiras con 1:47,43. A listaxe individual Estes nomes súmanse aos que xa conseguiron pasar o selectivo individual no pasado mes de marzo no encoro de Trasona (Asturias). Nesa cita Pablo Graña (Club Náutica Rodeira) demostrou o seu dominio na distancia curta da canoa ao gañar na final do C1 200. Ademais, Manuel Fontán logrou a segunda posición no C1 1000 metros. Ademais, haberá participación feminina en C1 200 coa pontevedresa Antía Jácome. En Kaiak, tamén pasaron o selectivo nesa ocasión Carlos Arévalo en K1 500 e Teresa Portela rematou encabezando a clasificación final feminina após a suma de resultados nas probas de K1 500 e K1 200 nas que participou. Teresa Portela non participou no selectivo de K2 Unha das ausencias destacadas este selectivo foi a de Teresa Portela. A padexeira de Aldán renunciou a concentrarse en Sevilla (Andalucía) por conciliación familiar mais após o seu bo rendemento no selectivo de Trasona, o ente federativo outorgoulle unha exención para optar ao K2. Porén, faltoulle a presenza da súa compañeira Carolina García que se decidiu por loitar un oco na aliñación do K4 500.