Ferrol soña co regreso do Parrulo á máxima categoría do fútbol sala

O Parrulo Ferrol FS está a tan só unha vitoria de acceder á final do play-off de ascenso á Primeira División de fútbol sala. O conxunto dirixido por Gerard Casas logrou vencer na Malata ao Inagroup El Ejido Futsal por dous goles a un no primeiro partido da eliminatoria de semifinais, polo que este sábado podería certificar o seu pase á agardada final cunha vitoria a domicilio (18.30 horas, Pavillón Municipal de Deportes de El Ejido). O conxunto ferrolán fixo os deberes na casa, nun encontro que dominou de principio a fin e no que gozou de innumerábeis ocasións, mais que se acabou decidindo pola mínima. Agora viaxa a terras andaluzas con certa tranquilidade, xa que unha derrota devolvería a eliminatoria a Ferrol para decidir cal dos dous equipos accede á final. O Liceo busca ante o Reus o pase á gran final polo título de Liga Mais non o ve así o seu capitán, Iván Rumbo: “Non temos ningunha tranquilidade, porque todos sabemos como é o deporte nestes casos; cando o mereces, non gañas, e ás veces, sen o merecer, acabas gañando. Esperamos un partido moi duro alí, sabemos que vai ser moi difícil gañar, eles teñen un auténtico equipazo”, admite a Nós Diario. “O equipo está con ganas e confiado en que pode conseguilo, só pensamos no partido do sábado; pensar na vindeira terza feira, por se perdemos, sería un erro. O noso obxectivo é resolver a eliminatoria esta semana e, se non se pode, xa pensaremos na seguinte”, di. Aínda así, o capitán do Parrulo é consciente de que teñen a vantaxe na eliminatoria e de que isto pode influír nos seus rivais: “Temos que xogar un pouco coa súa ansiedade, eles saben que é a súa última bala e, se non gañan, están fóra, polo que temos que aproveitar eses momentos nos que poidan mostrarse algo máis febles”. Gran parte da confianza do equipo vén da súa brillante actuación no primeiro partido da eliminatoria, do que Rumbo destaca: “Estivemos moi ben co balón, dominamos moito o xogo. Porén, aínda sendo moi superiores no partido da casa, só gañamos por un gol, e nun play-off hai moita igualdade e nunca se sabe o que pode pasar”. A hemeroteca xoga a favor do Parrulo, pois nos dous partidos de liga nos que se enfrontaron ambos conxuntos levou un triunfo e un empate. “Estamos moi concienciados de que podemos gañar alí, no partido de Liga xa o fixemos. Vai ser un encontro moi igualado e intenso, como o do sábado, pero o equipo está convencido e ten as armas para facelo”, di Rumbo. Unha gran tempada cun merecido premio O play-off polo ascenso significou, nun principio, un premio para O Parrulo Ferrol pola gran tempada realizada, pero, tras comezar a primeira eliminatoria, converteuse nun novo obxectivo. Nun inicio, as esperanzas do conxunto ferrolán non pasaban por ocupar os postos altos da táboa, senón por loitar por manter a categoría un ano máis. Porén, unha segunda volta que se achegou á perfección permitiulles aos de Gerard Casas gozar dun novo e ambicioso reto. E desde dentro tamén o ven deste modo. Iván Rumbo, que leva xa tres tempadas no club, explica: “Non esperabamos estar na situación na que estamos agora. Era un ciclo novo, pero si é certo que desde a pretempada, cando adestrabamos, víase que o equipo tiña talento, que era moi novo e que tiña que adaptarse todo un pouco para que chegasen os resultados”. Ademais, comenta, "na segunda volta tiña o pensamento de que iamos gozar moito, pero a verdade é que non esperaba este resultado”. Jessica Bouzas segue facendo historia en Roland Garros Esta gran tempada non foi casualidade nin simple sorte, posto que unha das claves do éxito do Parrulo foi o grupo, algo que tamén destaca o seu capitán: “Levamos un tempo, case toda a segunda volta, cun ambiente moi bo, pero tamén é certo que na primeira, cando os resultados non chegaban, o ambiente era espectacular. Agora levamos uns meses cunha alegría nos adestramentos e cunha confianza que se nota. O equipo quere gañar, dá igual o rival que teñamos diante; sempre temos ansias de vitoria”. Confianza plena O bo facer do conxunto ferrolán está dando cada vez máis razóns para crer e confiar no regreso á máxima categoría do fútbol sala estatal, e agora mesmo ese é o único obxectivo. Desde dentro teñen clara a súa postura: “Tentarémolo por todos os medios, non contabamos a comezos de tempada con estar aquí pero agora a ilusión é máxima”, sinala Iván Rumbo. Desde fóra, a confianza tamén é plena, e puido verse no partido de ida, cunha Malata chea até a bandeira, o que para os xogadores "é un xute de enerxía incríbel, porque nos momentos nos que as cousas non van tan ben, ou estamos a pasar por dificultades, empurran moitísimo e son moi importantes para nós”. O CRAT da Coruña tira de canteira para afianzar o seu proxecto na elite Iván Rumbo, o capitán que guía o Parrulo Unha das claves do éxito do Parrulo Ferrol foi o grupo, que soubo combinar á perfección veteranía e xuventude. Dentro do bloque máis experimentado destaca o nome de Iván Rumbo, capitán e máximo responsábel no vestiario. O coruñés, de 37 anos, xa sabe o que é xogar un play-off e será quen guíe os máis novos neste novo reto. A capitanía non está a ser un peso para el: “Creo que encaixamos todos perfectamente, a gran maioría son moi novos e os que somos veteranos tampouco é que nos enfademos moito. É un dos mellores grupos que tiven na miña vida, e levo moitos anos xogando”. Rumbo só pensa en que "vaian pasando os días para seguir xogando e, polo menos, chegar á final e loitar polo ascenso”. Porén, non todo son boas noticias para el: “Non sei por onde irá o meu futuro, pero está difícil que eu siga o próximo ano en Ferrol”.