O Fabril peta na porta do primeiro equipo tras o seu gran rendemento

O Deportivo Fabril está facendo as cousas moi ben en Segunda RFEF. Son líderes en solitario do seu grupo, contan con 41 puntos tras 20 xornadas, o que os fai o segundo equipo con máis puntos de todos os grupos da categoría, só por detrás do Raio Maxadahonda do grupo 5. Os de Manuel Pablo están imparábeis nos últimos meses, levan invictos oito partidos, desde a xornada 12 sumou cinco vitorias e tres empates. O filial deportivista perdeu só tres partidos en toda a tempada –fronte á Ximnástica Segoviana, a UD Ourense e o Real Oviedo Vetusta–. Os de Manuel Pablo ademais de conseguir bos resultados no ámbito da clasificación, son moi produtivos no traballo nas dúas portarías. No aspecto defensivo concedeu 11 goles en contra, é dicir, practicamente encaixan un gol cada dous partidos. No aspecto ofensivo levan 34 goles a favor, o que fai unha media de case dous goles por encontro. O total fai unha diferenza de +23 goles, converténdose así no equipo con mellor diferenza de goles de todos os grupos da categoría. Un exemplo de solidez defensiva e de efectividade goleadora que se reflicte na clasificación e na boa dinámica do conxunto de Manuel Pablo esta tempada. As estatísticas de predición de puntos dan como gañador do grupo, e polo tanto un dos ascendidos, ao Deportivo Fabril, xa que, se as dinámicas seguen igual, a liga remataría cun empate a puntos entre Fabril e Oviedo Vetusta que colocaría o filial deportivista como primeiro pola diferenza de goles. Iso fai máis relevante aínda o partido do domingo que os enfronta nun encontro na Cidade Deportiva Requexón, en Oviedo, que promete ser apaixonante e bastante decisivo na loita polo ascenso directo a Primeira RFEF. As estrelas de Manuel Pablo O filial coruñés conta con xogadores tan prometedores que empezan a entrar no debate do primeiro equipo. Na punta de lanza xogan Bil Dornol Nsongo e Mario Najera, indiscutíbeis para Manuel Pablo, ambos os dous desputaron todos os partidos no que vai de tempada e contan cun total de 19 goles, 11 de Nsongo e 8 de Mario Najera. Malia que por separado ningún dos dous é máximo goleador do grupo, non hai ningún outro equipo que conte cunha dianteira tan produtiva de cara a gol coma a do camerunés e o logroñés. Manuel Pablo conta con dous pezas defensivas fundamentais como son Damián Canedo e Samuel Fernández, a parella de centrais que fan da area do Fabril un auténtico fortín. Ademais de dous grandes centrais, o conxunto branquiazul ten un seguro baixo paus como é Hugo Ríos que logrou nove portarías a cero en 18 partidos. O acceso ao primeiro equipo O paso dun filial a un equipo profesional adoita ser difícil e máis cando hai varias categorías de diferenza. Pero, no caso do Deportivo da Coruña é distinto, a relación de Antonio Hidalgo co Fabril é moi boa. De feito, a gran maioría das pezas inamovíbeis do equipo da Liga Hypermotion veñen procedentes do filial, como poden ser Yeremay, Mario Soriano ou David Mella. Pero ademais Antonio Hidalgo axúdase das categorías inferiores para completar o cadro de xogadores, aínda que non sexan titulares indiscutíbeis. Isto vese reflectido nos casos de Noe Carrillo ou Rubén López, que adoitan a axudar o equipo entrando desde o banco.