A Escudaría A Coruña busca afianzar o seu liderado no circuíto de 'ecorralies'

A novena edición do Ecorally A Coruña xa está en marcha polas estradas galegas. Desde a cidade herculina, onde antonte tivo lugar a cerimonia protocolaria oficial, partiu onte a primeira hora para percorrer, até o sábado que remata, un total de 574 quilómetros. Algo máis de 50 equipos, cunha importante representación internacional, visitarán 38 municipios galegos. Entre eles o representante galego, a cargo da Escudaría A Coruña organizadora do evento, parte como clara favorita. A proba será decisiva para o Campionato de España de Enerxías Alternativas (CEEA) do Real Automóbil Club de España (RACE) 2025. Válida por segundo ano consecutivo, será a penúltima cita do certame estatal que se fechará en outubro nas Canarias. O CEEA chega moi aberto, con tres vencedores diferentes nas tres anteriores citas dentro das categorías de eléctricos e híbridos, así como diferencias mínimas entre os primeiros clasificados na de híbridos enchufábeis, polo que o resultado desta sábado será de grande importancia para o desenlace do campionato. A UE decide esta sexta feira se fai permanentes os aranceis ao coche eléctrico chinés Dominio galego Desde a Escudaría A Coruña mostran a súa satisfacción polo desenvolvemento do campionato e agardan poder dar continuidade na casa aos bos resultados. O director técnico e membro da organización, Alejandro Torres, lembra a Nós Diario que chegan "dominando os eléctricos con Alejandro Laquidain Soret e tamén os híbridos enchufábeis con Ángel Manuel Santos Avalle, ademais de ser segundos nos híbridos con Jesús Ángel Domínguez". Ademais, destacan na grella o campión mundial Michal Žďárský, o piloto do Rally Dakar Fran Gómez Pallas ou o medallista olímpico en piragüismo Carlos Arévalo. Por clubs, a Escudaría A Coruña lidera as tres modalidades, un dato que enche de orgullo a organización do evento. Na competición tamén se sinalan as marcas e, neste caso, en híbridos vai de líder Hyundai mentres que en híbridos e híbridos enchufábeis domina o campionato estatal a xaponesa Toyota. Dous días de competición O Ecorally comezou onte pola mañá saíndo desde a praza de María Pita da Coruña. Neste espazo urbano a organización habilitou puntos de recarga eléctrica para facilitar a loxística dos equipos e garantir a eficiencia da competición. Tivo un primeiro reagrupamento en Compostela ao mediodía para voltar á cidade herculina pola tarde, pasando por Santa Comba (O Xallas) e Curtis (As Mariñas). Este sábado comezará a segunda etapa ás 10 horas, partindo tamén desde María Pita, rumbo ás Pontes (comarca do Eume) ás 12.10 horas. O evento finalizará na propia cidade herculina ao redor das ás 18.15 horas. Mañá saberanse os resultados da proba e entregaranse os trofeos na praza María Pita. A comercialización de vehículos de combustión ficará prohibida na UE a partir do ano 2035 Funcionamento Cada participante tivo acceso ao percorrido de cada etapa media hora antes do comezo. Circulando por estradas con tráfico, a organización sinala aos participantes a velocidade que teñen que empregar en cada tramo. A idea é manter a igualdade nas condicións de participación, exixindo aos pilotos respectar con precisión os tempos estabelecidos pola organización. Para iso fíxanse unha serie de "tempos ideais" consecutivos para medir o movemento dos coches dun control horario a outro e tamén para medir a súa capacidade de conducir a través de todos os tramos de regularidade cunha velocidade constante e precisa. "Se dicimos que a media de velocidade é de 37 km/h esa é a que ten que ser", clarifica Torres. A comprobación para colocar as puntuacións de cada participante e logo facilitar a clasificación realízase a través de controis secretos nas estradas "que valoran se o vehículo circulou a esa velocidade e tendo en conta só unha décima de segundo como marxe", conclúe. Por iso o responsábel da proba resume en tres as dificultades que teñen que superar os participantes para obter unha boa puntuación: "Saber como realizar o percorrido que non coñecen, realizar as medias de velocidade que se lles marque e procurar consumir pouco". Desde 2016 A Escudaría A Coruña fundouse oficialmente o 3 de outubro de 1969 como a primeira na Coruña dedicada exclusivamente ao automobilismo deportivo en xeral. Foi sede da Federación Noroeste de Automobilismo e da delegación na Coruña do Colexio de Oficiais do Noroeste, e organizadora da primeira proba do primeiro Campionato da Galiza de Automobilismo o 9 de febreiro de 1975. En 2016, ademais, foi pioneira en realizar unha proba de ecorally. A idea, explica Torres, partiu da Federación española. 16 pilotos de elite correrán nas Pontes o RallyShow da Deputación da Coruña Esta "aventura" foi crecendo co paso dos anos e tamén evolucionou en méritos e responsabilidade. "Desde o ano pasado formamos parte da Copa do Mundo de Especialidades e estamos dentro da Federación Internacional do Automóbil (FIA), a máxima autoridade dentro do automobilismo mundial", conclúe o director técnico da proba. A regularidade e a eficiencia fan gañar un ecorally A regularidade é a máxima dun ecorallye. Esta competición ten na regularidade na condución a súa fórmula para decidir quen son mellores pilotos, vehículos e marcas que participan. A idea parte da promoción de vehículos fabricados con novas tecnoloxías e deseñados para aforrar enerxía e emitir a menor cantidade posíbel de substancias contaminantes e CO2. Ademais, as etapas realízanse con tráfico real, unha das principais diferencias en relación a outro tipo de probas automobilísticas. "Os participantes circulan por estradas abertas ao tráfico, non se fechan en ningún momento", explica Alejandro Torres en conversa con Nós Diario. Aforro de enerxía No Ecorallye da Coruña, ademais, engaden a eficiencia enerxética como unha das condicións que puntúan. "Tamén se ten en conta quen consome menos, non se trata de acelerar e ir rápido", aclara o director técnico da proba. Neste tema están moi interesadas as marcas que participan na competición que, segundo indica Alejandro Torres, "son case todas as que hai na actualidade no mercado mundial". Para elas, sinala, "o Ecorallye da Coruña é o test perfecto en estrada e con condución real que lles indica como funcionan".