Un Dinamo de Zagreb invicto recibe o mellor Celta da tempada

O Celta afronta esta tarde (18.45 horas) ante o Dinamo de Zagreb, no Estadio Maksimir (Zagreb, Croacia), o seu cuarto partido da fase inicial da Europa League. Faino ante un conxunto croata dirixido por Mario Kovacevic que suma 7 puntos, un máis que os celestes –novenos–, e marcha cuarto na clasificación xeral. Será o segundo desprazamento fóra de Balaídos para o Celta neste curso europeo após a derrota en Stuttgart (2-1). Nesta ocasión, os celestes percorrerán pouco máis de 2.500 quilómetros para chegaren até a capital de Croacia. Alí agarda un Dinamo cun estadio entregado onde arredor de 35.000 persoas acompañarán o seu equipo. O equipo de Claudio Giráldez chega a este partido no seu mellor momento da tempada. Suma catro vitorias consecutivas, dúas nos últimos minutos en Liga –Osasuna (2-3) e Levante (1-2)–, a vitoria ante o Puerto de Vega (0-2) na Copa do Rei e a da última xornada europea na casa fronte ao Niza (2-1). Os resultados por fin acompañan un equipo que empezara a tempada con sensacións agridoces e especialmente cunha gran carencia de gol. Xogadores como Ferran Jutglà ou Bryan Zaragoza están comezando a dar os primeiros gromos verdes que se agardaban tras as súas ilusionantes fichaxes, e xa acompañan os Mingueza, Ilaix e compañía que tiran do equipo por costume. Cambios obrigados no Celta Ora ben, o Celta afronta o partido cun problema capital en canto ao seu cadro de xogadores: non poderá contar co seu indiscutíbel na portaría, Ionut Radu. O gardarredes romanés sufriu unha escordadura no dedo polgar da súa man dereita nun adestramento, o que lle impide acompañar o equipo nesta cita continental. Sen dúbida esta baixa resulta especialmente sensíbel para un Celta que atopara un auténtico baluarte baixo os paus no que ía de tempada, influíndo directamente no resultado con paradas salvadoras en varios partidos e cun sobrio xogo de pés. A baixa de Radu, ademais, resulta perigosa pola falta dun substituto claro. De partida podemos agardar que o seu posto sexa ocupado por Iván Villar, quen presumibelmente partía a temporada na posición de segundo porteiro e é o máis experimentado para un duelo como o desta noite. Villar foi precisamente quen xogou o partido copeiro, por diante de Marc Vidal e o canteirán Marcos González, os outros dous porteiros que tamén viaxan a Croacia. Porén, o cangués o ano pasado transmitiu certas dúbidas cando xogou, polo que haberá que ver cal será a aposta de Giráldez e como reacciona no campo. O Celta chega a croacia coas baixas de Radu, Rueda e Swedberg En canto ao resto da convocatoria celeste non hai ningunha sorpresa. Á baixa de Radu súmanse as de Javi Rueda e Swedberg por lesión. Sempre é difícil atinar o once que sacará Giráldez en calquera partido, pero quizais poderiamos apostar por Iván Villar na portaría, acompañado por Marcos Alonso, Carl Starfelt e Manu Fernández na defensa. O medio campo é o máis difícil de adiviñar, aínda que poderían saír de partida Ilaix Moriba xunto a Damián ou Sotelo, mentres nos carrís posibelmente repitan Mingueza e Carreira, igual que ante o Levante, e arriba, seguindo a liña dos últimos encontros europeos, pode ser a quenda de Aspas con Durán e Bryan. Esta cuarta feira o conxunto celeste sufriu un cambio de plans froito dunha avaría no avión que ía levar o equipo á capital croata. O voo, nunha xornada marcada en Vigo polo temporal, adiouse até as 15.30 horas, impedindo ao Celta adestrar en terras croatas como estaba programado. A situación solucionouse cunha sesión matinal en Afouteza previa á viaxe desde Peinador. As chaves do Dinamo En canto ao rival, o Dinamo de Zagreb é un equipo a ter en conta nesta Europa League, e máis xogando no seu campo. O Estadio Maksimir de Zagreb é coñecido por acompañar o equipo especialmente nesta clase de partidos, cun ambiente que contaxia aos xogadores e llo pon difícil ao equipo visitante. Entre a súa sonora banda de animación aparecen os Bad Blue Boys, un grupo ultra de ideoloxía ultradereitista. A capacidade máxima do campo é hoxe de perto de 25.000 persoas, aínda que se agarda un importante desprazamento de afeccionados celestes ao campo. O xogo do Dinamo de Zagreb é atrevido e propositivo, especialmente cando xoga como local. Habitualmente comeza cun esquema de 4-3-3 onde destacan algúns dos seus mediocentros, como Gonzalo Villar, murciano con pasado na Roma ou no Xetafe, ou Ismaël Bennacer. E arriba non anda falto de talento ofensivo. Luka Stojkovic é unha das súas referencias nunha liña de ataque na que sobresae o nome de Cardoso Varela, xogador de tan só 16 anos que xa se converteu no cuarto máis novo en anotar un gol na Europa League. O Dinamo é cuarto na Europa League con sete puntos de nove posíbeis Canda outros sete equipos o Dinamo de Zagreb permanece invicto no que vai de Europa League. Será esta tarde ás 18.45h que o Celta tentará arrebatarlle esa condición para, ademais, superalo na táboa clasificatoria no caso de vencer. O partido poderase ver na Galiza por Movistar+. A portaría, un problema endémico en Vigo O Celta leva xa varias tempadas arrastrando un problema capital: a defensa da súa portaría. Nos últimos cinco anos o equipo viu pasar polos seus paus até seis porteiros distintos, sen que ningún chegase a manterse por máis de dúas tempadas e sen chegar a ser un indiscutíbel nos onces. No pasado quedan os Marchesín, Guaita, Dituro e Rubén Blanco, que no caso dos tres primeiros chegaron a Vigo xa cunha idade avanzada, practicamente no ocaso das súas carreiras, e no caso de Dituro en calidade de cedido. Daqueles barros, estes lodos. Esta quinta feira non estará dispoñíbel Ionut Radu, quen si pareceu disipar por fin as dúbidas na portaría cun soberbio inicio de curso, por lesión e o seu substituto será previsibelmente Iván Villar, un porteiro que non foi quen até o de agora de gañar a confianza de ningún dos ocupantes do banco celeste. Precisamente esta tempada as redes celestes estaban moi ben protexidas por un Ionut Radu que chegou neste mesmo verán do Venezia e que sorprendeu a quen non o coñecían coas súas grandes actuacións. Ora ben, o tempo ditará sentenza sobre se a súa posición na portaría celeste será duradeira ou, pola contra, repetirá o mesmo patrón de recambios nunha das posicións máis importantes do terreo de xogo e todo un crebacabezas para o Celta.