O Deportivo prolonga a súa boa xeira derrotando o Sabadell na Copa do Rei

Un motivado Centre d'Esports Sabadell acolleu esta quinta feira un Deportivo que semellou comezar moi motivado nos primeiros minutos, mais que se foi apagando pouco a pouco na primeira parte. O principio do encontro estivo marcado por unha homenaxe a Antonio Hidalgo, actual técnico do Deportivo, 15 minutos antes de comezar o xogo, que se daría ás 19 horas. Os cataláns quixeron agradecer a Hidalgo os anos que pasou no Sabadell, sendo unha das lendas do conxunto tras militar tres tempadas e media como futbolista e despois como adestrador, devolvendo aos de Catalunya á categoría de prata. O equipo galego xogou co seu segundo equipamento, de cor vermella.

Os coruñeses saíron ao campo cunha aliñación 4-2-3-1, con Eric Puerto como gardameta; Miguel Loureiro, Noubi, Samu Fernández, Rubén López na liña defensiva; Patiño e Gragera no centro do campo, e Herrera, Mulattieri, Fabián Urzain e mais Eddahchouri na liña ofensiva.

O partido semellou comezar cun Dépor forte, que se encargou de pór a pelota en movemento. Mais pouco durou, pois o Sabadell comezou a gañar máis terreo, creando perigo para os de Hidalgo. Xa no minuto tres de xogo, os de Ferran Costa buscaron o seu primeiro lanzamento a portaría. Desde ese momento o Dépor baixou a intensidade e deixou campo libre ao Sabadell, que rematou con dúas ocasións de gol que non chegaron a nada. Un extraordinario Samu Fernández despexou varios tiros dos de Ferran Costa e a primeira parte rematou sen goles, aínda que as ocasións dos de Sabadell non faltaron e crearon moito perigo para os galegos, cun Dépor con pouco control do encontro e con algunha falta a favor de ambos os dous equipos. O árbitro engadiu un minuto de desconto na primeira metade antes de alcanzar o ecuador do choque.

Unha segunda parte dominada polo Dépor

A segunda parte comezou cun remate de chilena do Sabadell, mais que terminou en saque de porta para o Deportivo, que semellaba estar a ter problemas para sacar o balón de atrás, como sucedeu na primeira parte., mais aumentaba a intensidade e ía xa impondo o seu dominio. O primeiro cambio do Dépor chegaba no minuto 46 de xogo, coa saída de Lucas Noubi por Dani Barcia. O gol coruñés chegou para os de Hidalgo no minuto 54, un tanto que anotaba Cristian Herrera. O Sabadell non baixou a cabeza e continuou coa súa dinámica ante un Dépor moito máis reforzado tras esa mala primeira parte. Tiveron varias ocasións para empatar o marcador, mais non se deu. Foron ocasións claras que os cataláns non souberon aproveitar para anotar un tanto que nunca chegou.

No minuto 67 o Deportivo realizou outros dous cambios coas saídas de Zakaria Eddahchouri e de Fabi para que entrasen Bil Nsongo e Mella. E a dez minutos do final o Dépor lograba o seu segundo tanto cun disparo de Rubén López con asistencia de Herrera. A última substitución do Dépor sería no minuto 84 coa entrada no campo de Damián por Sanu, canteirán por canteirán. E con ese 0-2  favorábel aos galegos o árbitro pitaba o final do partido en terras catalás.

O calendario que espera aos de Antonio Hidalgo

O Deportivo prolonga coa vitoria desta quinta feira unha moi boa xeira de resultados que se está a ver acompañada polo xogo do equipo. Esta é a súa sétima  vitoria consecutiva, cinco en Liga –na que marcha líder– e dous na Copa do Rei, nunha boa tempada na que opta, xa sen lugar a dúbidas, a recuperar o lugar que lle corresponde en Primeira.

O próximo partido dos de Antonio Hidalgo disputarase o vindeiro domingo en Riazor contra o Club Deportivo Castellón. O seguinte encontro será contra a Real Sociedade B o domingo 14,  e rematará o ano o 20 de decembro contra o Andorra para retomar a actividade no vindeiro contra o Cádiz  e As Palmas, nunha tempada que está a ser esperanzadora para os e as deportivistas.