O Deportivo Liceo aférrase á épica para remontar ao Barça final polo título de Liga

O Deportivo Liceo apela á épica para remontar a final do play-off polo título de Liga fronte ao Barça. O conxunto catalán fixo valer o factor pista e impúxose aos de Juan Copa nos dous primeiros encontros da eliminatoria no Palau Blaugrana. A final viaxa agora á Coruña (esta sexta feira ás 20 horas),e será a quenda dos herculinos para igualar a contenda e forzar un quinto partido no que se decida quen é o campión. Semella ser unha misión case imposíbel para o Liceo, que regresa de terras catalás con moi malas sensacións tras encaixar doce goles en dous encontros, o último deles cun contundente 6-0. O Barça chega a este punto nun estado de forma extraordinario, e así o destaca o técnico coruñés: “Teñen moita calidade individual. Estamos a falar dun equipo que dominou a liga e que chegou moi ben a este tramo da tempada. Eses xogadores hai que controlalos ben a nivel defensivo, porque son xogadores que, á mínima que lles dás dúas ou tres opcións, poden meter a bóla dentro”. O Liceo aspira a derrotar o xigante do hóckey nunha nova loita polo título de liga A pesar disto, o conxunto galego mantén intacta a esperanza de igualar a eliminatoria, máis aínda cando poderá contar co apoio de Riazor para conseguilo. Un Barça intratábel O conxunto catalán chegou á final do play-off sen coñecer a derrota na súa casa, e continúa a manter ese rexistro na eliminatoria fronte ao Liceo. Antes de comezar a final, o equipo coruñés era consciente disto, pero aínda así viaxou a Barcelona coa intención de sumar. "Afrontamos a serie partido a partido. Sabiamos que o primeiro encontro dunha serie a cinco é máis aberto, porque non hai unha información directa, e eu creo que ese primeiro día estivemos ben, pero o segundo gol non o podemos encaixar e non podemos permitir dous goles nun minuto, porque un equipo como o Barcelona mátate. E logo, con esa diferenza, é moi difícil igualar”, di Copa. Tras perder o primeiro encontro no Palau, nun partido que non deixou tan malas sensacións, o conxunto herculino preparábase xa para o segundo duelo da eliminatoria. “O obxectivo era tentar axustar un pouco máis o marcador, pero estamos a atopar un Barça moi contundente, que colle vantaxe no marcador, e aí complícasenos moito. Sabiamos que podía ser unha eliminatoria longa, e é o que imos tentar agora; tócanos a nós defender a nosa casa”, afirma. En relación a estes dous resultados, Copa subliña que "foron dous encontros diferentes". "Creo que o da sexta feira foi máis por demérito noso, que deixamos escapar o partido. Estamos a cometer unha serie de erros que nos impiden manter o marcador axustado, sobre todo para chegar ao final con opcións”, indica. A modo de conclusión, e como aspectos a mellorar, o técnico coruñés asegura: “Creo que hai un aspecto onde se está a marcar moito a diferenza, que é a contundencia nas áreas, sobre todo nos primeiros minutos dos partidos. O outro día estivemos moi parellos en canto ás ocasións de gol, pero foron as deles as que entraron. Temos que mellorar no aspecto defensivo, porque encaixamos seis goles en cada partido. Confiamos en que agora, na casa, en Riazor e coa nosa xente, sexamos quen de equilibrar ataque e defensa, que é o que temos que buscar, facer un bo partido e tentar pór o 2-1 na eliminatoria”. Última oportunidade Cun 2-0 en contra na final do play-off, o Liceo regresa á súa casa coa intención de converter Riazor nun fortín e forzar o quinto e definitivo encontro da eliminatoria. O partido desta sexta feira será unha auténtica proba de vida ou morte para os de Juan Copa, aínda que o técnico non mostra preocupación: “Eles teñen a presión de ser os favoritos, e polo que se comenta alí para o Barcelona gañar só a Supercopa non é suficiente. É un club moi exixente nese sentido. Fixeron unha moi boa liga regular, quedaron primeiros, e a presión téñena eles”. O Liceo, pola contra, ten "a ilusión de competir polo título, e iso non nos vai pór máis presión da que xa nos poñemos nós mesmos". "Xa salvamos un punto de partido contra o Lleida na casa, o equipo está afeito a este tipo de encontros. Ademais, será en Riazor, coa nosa xente, coa nosa afección, que seguramente nos vai axudar moitísimo”, sostén. O Liceo despídese da Champions ante o seu eterno rival, o Barcelona O factor pista pertence agora ao conxunto herculino, un aspecto clave neste terceiro duelo. “Fainos falta ese xute de enerxía que nos dá a nosa afección. Vimos de xogar tres partidos fóra, con viaxes polo medio, e temos moitas ganas de volver á nosa pista. A nosa xente sempre nos dá ese plus”, subliña o adestrador. O equipo, asegura, "está preparado". "Estamos moi ilusionados porque nos custou moito chegar á final e, evidentemente, imos deixalo todo sobre a pista. Aquí non se rende ninguén, ninguén baixa os brazos, e de momento, que eu saiba, seguimos na final. Queremos que continúe e que a serie se alongue”, salienta. O propio Copa, exemplo de esperanza, lanza unha mensaxe á afección: “Seguimos na final. Temos unha final de Liga en Riazor; que non se despiste ninguén. Gañámonos estar nesta final na pista, pero sobre todo foi grazas á afección, que nos axudou a superar a eliminatoria contra o Lleida, cando fomos cun 2-0 a Reus... e agora estou convencido de que nos van axudar para pór o 2-1 na eliminatoria”, sentencia. Sen sorpresas no plano táctico Son dous equipos que se coñecen á perfección, polo que, no plano táctico, non se agardan moitas sorpresas. Aínda así, o técnico herculino destaca que as claves deste terceiro encontro pasan "pola solidez defensiva, controlar moito máis o catro para catro, onde nos fixeron moito dano, e saber onde lles podemos facer nós dano". "Practicamente non vai variar moito a forma de afrontar o partido, pero o que si pode marcar diferenza é o factor pista. Temos que facernos fortes en Riazor, onde temos un plus, e onde somos un equipo agresivo, que vai á portería e que defende ben coa nosa xente”, sinala Juan Copa. O reto é exixente e a marxe de erro, inexistente, pero o Liceo mantén intacta a súa ilusión e afronta este terceiro duelo en Riazor con plena confianza.