O deporte feminino segue a gañar peso: as licenzas aumentaron en 90% en dez anos

A presenza das mulleres no deporte federado vai parella á súa cada vez maior visibilización. Os éxitos deportivos e a maior atención dos medios de comunicación ás competicións onde participan así como algunhas campañas fixeron que as cifras aumentaran nos últimos anos. Así, na Galiza había 85.634 mulleres federadas en 2024, último dato ratificado polo Instituto Galego de Estatística (IGE). Se dos 64 deportes representados por organismos federativos escollemos os 20 que representan os máis practicados por este sector da poboación ese ano, a cifra sería de 76.564 licenzas, 89,95% máis que en 2014 cando eran 40.308. A primeira conclusión que se ten após analizar esa listaxe é que os deportes de equipo seguen a ser os que contan con máis número de mulleres federadas na Galiza. Domina o fútbol, con 8.370 (+333,45%); seguido do baloncesto, con 7.767 (+71,27%), e voleibol, con 6.332 (+217,08%). Os seguintes deportes en ter máis mulleres federadas son a patinaxe, con 5.442 (+44,16%); o atletismo, con 4.949 (+118,69%); o balonmán, con 4.370 (+52,85%); a hípica, con 3.950 (+41,42%); o golf, con 3.570 (+17,51); o montañismo e a escalada, con 3.054 (146,29%); o pádel, con 3.044 (+998,92%); a natación, con 2.783 (+14,10%); a ximnasia, con 2.344 (+327,74%), e o judo, con 2.327 (+147,82%). Só un deporte dos primeiros 20 con máis mulleres federadas na Galiza reduciu o seu número entre os anos 2014 e 2024: o surf, con 1.392 (-23,68%). Peleteiro e Toimil acceden á final nos Europeos Desde a Secretaría Xeral para o Deporte da Xunta da Galiza avanzan a Nós Diario que 2025 fechou con 87.591 licenzas femininas, un total de 1.961 máis que a cifra que tivo o ano anterior. Ademais, salientan desde este organismo que na actualidade hai máis deportistas de alto nivel (DGAN) representando as distintas disciplinas. En concreto son 1.773 –o dato máis alto da serie histórica 2011/2024–, 42% das cales son mulleres (740) e cun 58% restante homes (1.033). Outro dato interesante, de cara ao futuro, é a participación no programa Xogade da Xunta, destinado a nenas e nenos de entre 6 e 16 anos. Na última tempada fechada (2024/2025) participaron un total de 146.662 pertencentes a un total de 39 federacións galegas adheridas. 60% eran nenos (88.094) e 40% nenas (58.528). No caso da actividade deportiva escolar, as porcentaxes alcanzan case a paridade: 49% (32.880) de nenas, e 51% (34.937) de nenos. Outros ámbitos Noutro ámbito do deporte, o que está relacionado de maneira directa coa xestión e os aspectos técnicos, a situación é diferente a día de hoxe. Segundo o III Estudo sobre Mulleres Directivas e Profesionais no Deporte Federado español, realizado coa colaboración do Consello Superior de Deportes do Goberno estatal, o último a día de hoxe e publicado en outubro de 2025, a situación non é moi positiva nas federacións galegas. Así, a presenza de mulleres en xuntas directivas é de só 29% (42% a nivel estatal); en comisións delegadas, de 15% (mesma porcentaxe estatal); en comités, de 23% (30% na media do Estado español), e só en secretarías xerais/xerencias conseguen ser 49% (39% no Estado). No mesmo informe, sinálase que só 37% son xuízas/árbitros (27% no caso estatal) e non pasan de 29% as que teñen a función de adestradoras/técnicas (25% no Estado español). Antía Jácome: "Non todas as deportistas poden dicir que van participar nuns Xogos Olímpicos" A importancia dos éxitos Para a xerente do Clúster da Industria do Deporte e o Benestar da Galiza e tamén deportista, Sofía Toro, “a muller foi incorporándose pouco a pouco ao sector do deporte, iso si, foi primeiro na práctica deportiva”. Neste sentido, apunta que “cada vez é máis fácil que as mulleres practiquen o deporte que máis lles gusta, calquera tipo de deporte, creo que niso, nos últimos anos estívose avanzando moito”. Comprende os datos que hai de número de licenzas femininas en deportes como o fútbol e explica que a presenza da muller é moito maior nel “pola visibilidade que se lle está a dar á liga feminina dese deporte, coas retransmisións de partidos por televisión e tamén a repercusión que tiveron grandes eventos o mundial de 2023 ou tamén a Liga de Nacións en 2024 e 2025”. Sofía Toro competiu na modalidade de match race, onde formou equipo coa patroa ourensá Támara Echegoyen e a asturiana Ángela Pumariega. As tres regatistas conseguiron ser campioas olímpicas nos Xogos Olímpicos de 2012 en Londres nesta modalidade. Na súa experiencia deportiva na elite, Sofía Toro viviu de maneira directa estas diferenzas que se ven tamén na práctica do deporte profesional nas diferentes competicións, mesmo algunhas internacionais. “Cando fomos aos Xogos Olímpicos de Londres en 2012, á volta foi a primeira vez que as mulleres viñemos con máis medallas que os homes e iso tamén foi un gran impulso”, asegura a regatista coruñesa. A medalla de ouro nesa cita "abriu o camiño" que tamén conseguiu que se fixeran visíbeis "para que o resto de rapazas que nos viron ou souberon do que fixemos se animaran a facer deporte". A visibilidade das xogadoras que son referentes Entre as razóns que se dan para explicar este aumento da participación das mulleres no deporte a máis repetida é a da importancia de que haxa carreiras de éxito femininas. Nunha primeira listaxe de exemplos de galegas que conseguiron rachar o teito de cristal deportivo non pode faltar Teresa Portela (piragüismo) participante en sete Xogos Olímpicos, sendo prata en Toquio 2020 ademais de acumular 17 medallas en Campionatos do Mundo e 17 en Campionatos de Europa. Outro exemplo é o historial de Ana Peleteiro (atletismo), co seu bronce en Toquio 2020, tres medallas en Campionatos do Mundo e cinco en Campionatos de Europa. As imperdíbeis de París 2024: 26 deportistas e eventos a seguir na cita olímpica deste verán Do fútbol á ximnasia Outras deportistas galegas que crearon escola foron Teresa Abelleira (fútbol), actual xogadora do Real Madrid e campioa do Mundo Absoluta en 2023; Támara Echegoyen (vela), que participou en catro Xogos Olímpicos, sendo campioa olímpica Londres 2012; Susana Rodríguez Gacio (tríatlon adaptado), que foi campioa olímpica en Toquio 2020 e París 2024, e Melania Rodríguez (ximnasia), que conseguiu ser bicampioa mundial en 2023 e 2025. Ademais, en deportes como o baloncesto, hai exemplos como o de Blanca Millán e o seu papel no Baxi Ferrol.