O Dépor viaxa a Albacete para buscar a súa quinta vitoria consecutiva en Liga

O Deportivo da Coruña e o Albacete enfrontaranse hoxe en terras manchegas (Carlos Belmonte, 18.30h) no partido correspondente á 16ª xornada ligueira, á que ambos os conxuntos chegan con dinámicas ben distintas. Os coruñeses rexistran unha boa xeira de resultados este mes, no que os seus catro encontros se contaron por vitorias –ante Zaragoza, Cultural, Córdoba e Ceuta–, anotando 10 goles e encaixando apenas dous. Gañar hoxe suporía sumar unha quinta vitoria consecutiva –sexta, se contamos o choque copeiro do 30 de outubro ante o Sámano (1-5)–. Esta sexta feira os xogadores de Antonio Hidalgo adestraron nas instalacións de Abegondo pola mañá antes de viaxaren en avión pola tarde até Madrid, desde onde se desprazaron en autobús a Albacete. O Dépor goza do seu mellor momento de forma do curso e lidera a táboa, con 29 puntos, nun triplo empate –do que sae vencedor pola diferenza de goles– co Racing e As Palmas. O Albacete, pola contra, suma tres triunfos e outras tantas derrotas nos seis últimos desafíos de Liga, nun inicio de tempada algo errático no que aínda non soubo atopar a regularidade e no que se sitúa no décimo terceiro posto con 19 puntos, dous por riba do descenso –que marca o Andorra– e a tres do play-off de ascenso –co Castellón ocupando a sexta praza–. O Dépor mantense na loita polo liderado cunha nova vitoria en Riazor O conxunto galego terá que prescindir do dianteiro Luismi Cruz, que ten unha pequena lesión, aínda que o club espera que poida incorporarse antes de que remate o ano. No relativo ao defensa Lucas Noubi, o técnico explicou esta sexta feira que semella que a lesión non vai ser tan grave como se pensaba nun principio e que se esta sexta feira non notou molestias, poderá xogar hoxe. E Zakaria Eddahchouri xa está adestrando co grupo, ao igual que o defensa catalán Arnau Comas. O último encontro entre galegos e manchegos disputouse en maio deste ano en Riazor e rematou cunha goleada por 5 a 1 en favor do Deportivo, con dous goles dun Yeremay Hernández que esta tempada está a despregar todo o seu potencial, outros tantos de Zaka e un de Iván Martínez, quen no verán foi traspasado ao Arouca luso. Mais se un Dépor-Albacete quedou especialmente gravado na memoria colectiva coruñesa foi o da tempada 2021-22, nunha final polo ascenso a Segunda que o Albacete do ex deportivista Rubén de la Barrera remontou –tras un gol inicial de Mario Soriano– asestando o derradeiro e decisivo golpe na prórroga. O deportivismo soña con voltar a Primeira tras un inicio de liga ilusionante Todo parece apuntar a unha posíbel vitoria do Dépor, mais Hidalgo destacou que o equipo non quere, nin debe, tomar demasiadas confianzas porque lles pode pasar unha mala factura. A pesar diso, viaxa con moitas ganas para enfrontarse a un Albacete dirixido por Alberto González. Botando a vista ao calendario ligueiro, o Deportivo enfrontarase na casa ao Castellón o domingo 7 –logo de visitar o Sabadell, na quinta feira, en Copa–. O seguinte encontro disputarano tamén en Riazor, contra o filial da Real Sociedade, o domingo 14, para logo rematar o ano xogando fóra da casa contra o Andorra o sábado 20 antes do tradicional paro polo Nadal. Paula Novo, xogadora do RC Deportivo: "O ano pasado soubemos sufrir e loitar, agora queremos estar o máis arriba posíbel" “Neste tramo de Liga estamos facendo moitas cousas ben” O adestrador do conxunto coruñés puxo en valor na rolda de prensa desta sexta feira a boa xeira de resultados que leva o equipo e destacou que Albacete "ten uns mecanismos moi traballados, e debemos saber como atacar para sacar adiante o partido”. Ademais, Hidalgo salientou que nesta Liga “todos poden gañar a todos” porque é “unha competición con igualdade máxima” na que un exceso de confianza pode chegar a ser perigoso.