Da fortaleza do Poio á febleza do Burela: o futsal galego chega ao ecuador da tempada

A Primeira División de fútbol sala chega ao paro polo Nadal con escenarios ben dispares para os catro equipos galegos con representación: o Poio Pescamar, o Burela, o Ourense Envialia e o Castro Bloques Cando. O Poio é o mellor situado nesta altura, quinto na competición, e as de Castro de Rei fican na metade da táboa. Por outra parte, o Ourense ocupa o undécimo posto, buscando afastarse dunha zona de perigo na que se atopa inmerso o Burela. As mariñás, ademais, despedíronse de forma precipitada da Copa da Raíña, nos dezaseisavos de final, e continúan vivos o Poio, o Ourense e o Castro. O CD Burela, en crise e con risco de descenso O CD Burela non está a ter unha boa tempada polo momento. Na liga está na corda frouxa, en situación de descenso. Ademais, o conxunto mariñao foi eliminado na Copa da Raíña xa en setembro, apenas ao inicio da competición, en dezaseisavos de final contra o Leganés. E é que esta non está a ser unha boa tempada para as de Belén Feal. No marco da Copa de Galiza enfrontaranse ao Poio, que está a ter unha boa xeira de resultados. O fútbol sala feminino galego pendente da participación na Copa No mercado de fichaxes, rematado en outubro, o conxunto sufriu moitas baixas: Julio Delgado, técnico do equipo co que o club logrou nove títulos consecutivos.; Irene Samper; Débora Lavrador, Noelia Montoro, e Carolina Pedreira, que ficharon polo Poio; Cris Lourés, Caridad e Patri Ortega, fichadas polo Castro Bloques Cando, ou a histórica Emilly Marcondes, que fixo as maletas tamén ao ser fichada polo Melilla, algo que deu un duro golpe ao equipo, pois a xogadora brasileira foi nomeada mellor xogadora do mundo de fútbol sala o ano pasado nos prestixiosos premios Futsal Planet Awards. O equipo de Burela reforzouse con outras xogadoras como Cris Blanco, Sandra Pumares ou Irene Suárez, así como a nova adestradora, Feal, ante a marcha de Delgado. A eses problemas súmanse os apuros económicos do club, que este mesmo ano foi denunciado ante a Real Federación Española de Fútbol por impagamentos nos salarios. Isto vén derivado da quebra do que foi durante máis de 20 anos o patrocinador oficial: Pescados Rubén. O balón bota a rodar para os equipos galegos da elite do fútbol sala estatal O Burela non se atopa no seu mellor momento a pesar da boa tempada pasada, na que se proclamaron campioas da Copa da Raíña e conseguiron un meritorio segundo posto en liga, alén da súa vitoria na Copa Galiza. Agora o equipo encóntranse nunha situación na que se xoga o descenso a Segunda División, un cambio notábel dun ano a outro. Bo comezo para o Poio Semella que o Poio Pescamar si está a gozar dunha boa tempada. As de Luis López-Tulla mantéñense vivas, e con forza, en todas as competicións. Na Primeira División arrastran só dúas derrotas, resultado dos dous últimos encontros fronte ao Melilla e o Futsi. Estas derrotas foron as culpábeis de que, por primeira vez a estas alturas, non estean entre os catro primeiros equipos, situándoas nun quinto posto que as deixa, con todo, a só un punto de distancia respecto aos play-off, que xogan os catro primeiros clasificados. Na Copa da Raíña o conxunto de López-Tulla venceu en oitavos ao Futsi, clasificándose por segundo ano consecutivo para a fase final. Tamén están a xogar a Copa Galiza: en outubro superaron o Estrela Futsal cunha destacada vitoria en cuartos e o Burela será o seu próximo rival na competición no próximo mes de marzo. Caridad García, porteira do Burela FS: "Gañar a Copa foi unha recompensa polo sufrimento de toda a tempada" Botando a vista atrás, no mercado de fichaxes que fechou en setembro pasado o equipo aos mandos de Luis López-Tulla, que leva xa catro tempadas como técnico do conxunto e que renovou este ano, fixéronse algunhas fichaxes importantes: Zaide, de Ourense Ontime; Noelia Montoro, Débora Lavrador e Carolina Pedreira, do Burela; Carolina Bravo; Yanira, e Pato, do Pescara (Italia). Non obstante, tamén houbo baixas importantes: Elena Aragón, Rocío Molina, Sandra Buzón, Irene García e Laura Uña, que ficharon tamén por outros equipos. A tempada pasada as de Poio quedaban nunha sétima posición na liga e no relativo á Copa da Raíña, o conxunto perdera en semifinais contra un forte e complicado Burela, moi afastado do actual. O club suma xa doce tempadas consecutivas en Primeira División, clasificándose sempre entre os oito mellores conxuntos. Ademais até o momento conquistaron catro Copas da Galiza, un subcampionato da Copa da Raíña e dous subcampionatos da Supercopa estatal. A situación do Ourense Ontime, pouco cambiante O Ourense Ontime sitúase neste final de ano nun undécimo posto en liga que non termina de dar seguridade. As de Carlos Navarro non continúan competindo na Copa da Raíña tras ser eliminadas en oitavos polo Móstoles (5-4). Si que continúa competindo no marco da Copa Galiza, na que en marzo do ano que ven disputarán o seu encontro contra o Castro Bloques Cando. No mercado de fichaxes, contaron con novas xogadoras: Ana Pino, Marta de los Riscos, Ana Romero e Marángeles Pino –as catro do Futsal Alcantarilla—, mais tamén tiveron que prescindir de Rafinha, Sara Soares, Ludimila, Vero Mateos e Zaide, que fichou polo Poio. Ademais, renovouse a Carlos Navarro, técnico do equipo, que substituíra Bea Seijas a principios deste ano. Galiza domina no fútbol sala feminino con tres representantes nas semis da Copa O ano pasado as ourensás lograron un noveno posto en liga, mais perderon nos cuartos de final da Copa da Raíña contra o Burela, ao igual que foi derrotado o Poio na mesma competición ese ano. Un Castro na primeira metade da táboa As de José Carlos Martín atópanse por riba da metade da táboa de clasificación na liga, nun meritorio sexto posto. Ademais, seguen loitando pola Copa da Raíña, colándose por terceiro ano consecutivo nos cuartos de final. E enfrontaranse en marzo ao Ourense na Copa Galiza. Esta tempada o equipo sufriu as baixas de xogadoras como Julia Dupuy, Jeni Souza, Julia Melz e Laura Boix, entre outras. O club contou tamén con novas fichaxes como o propio técnico, José Carlos Martín; Caridad, Antía, Patri Ortega e Cris Lourés, do Burela; e Julia Oliveira. A tempada pasada, O Castro Bloques chegou a cuartos de final na Copa da Raíña, perdendo contra o Teldeportivo, e logrou o sexto posto en liga. Ademais, chegou a xogar a final da Copa Galiza contra o Burela, partido que perdería en penaltis. Un futuro incerto no que haberá que loitar O Poio terá que loitar por subir na táboa da liga e poder xogar os ansiados play-off polo título. O Ourense e o Castro por manterse nesas posicións ou melloralas para aspirar tamén ao trofeo, e o Burela para evitar ese descenso a Segunda nun contexto no que o club atravesa unha profunda crise que se está a reflectir tamén no terreo de xogo.