Compostela premia as mellores atletas, clubs e iniciativas locais na súa VII Gala do Deporte

O Auditorio da Galiza vestiu esta segunda feira de gala para acoller a sétima edición dos Premios Santiago Deporte, un evento que recoñeceu o labor e os logros de destacados e destacadas deportistas, clubs e entidades da capital galega durante a tempada 2023-24 e o ano natural 2024. A cerimonia, foi retransmitida por streaming e contou coa presenza de representantes do Goberno local e da corporación, xornalistas, persoas galardoadas e representantes do ámbito deportivo da cidade. Durante a gala, conducida por Pablo Ríos, entregáronse un total de doce galardóns que recoñeceron o traballo de deportistas, clubs, patrocinadores e entidades educativas comprometidas co fomento do deporte e os hábitos de vida saudábeis. Unha cerimonia que puxo en valor a dedicación e o esforzo destas grandes protagonistas do deporte local. Aroa Fernández, xogadora do BM O Porriño: "Afrontamos as semifinais con máis ilusión que presión; imos a por todas" A gala abriuna a concelleira de Deportes, Pilar Lueiro, quen salientou que “o deporte é do mellor que temos no noso concello; non só polo número de persoas implicadas, tamén polos valores que representa e polo tipo de vida e sociedade que queremos ter”. “Nun mundo onde cada vez é máis difícil atopar lugares de interacción entre iguais, onde desenvolver o sentimento de pertenza que todas e todos necesitamos ter, o deporte convértese nun lugar seguro onde fomentar, tamén, hábitos de vida saudábeis”, engadiu. Lueiro anunciou as mencións especiais a Andrés Viqueira, presidente do Club Atlético Fátima, e –a título póstumo– a José María Caneda, ex presidente da SD Compostela, que recolleu Enrique Fernández Otero Quico. O propio Quico foi galardoado co premio honorífico á traxectoria deportiva pola súa dedicación ao fútbol e a súa implicación co barrio de Conxo. Estes premios tiveron tamén a súa compoñente emotiva, salientando a importancia do legado que deixaron estas figuras no deporte compostelán e, especialmente, na historia do fútbol local. O subdirector de 'Nós Diario' Yuri Carrazoni, e a directora adxunta de 'Radio Líder', Ángela Mosquera, entregaron o premio a María del Pilar Taboada. (Foto: Arxina) Na categoría absoluta feminina, a atleta Esther Pedrosa foi distinguida polo seu impresionante palmarés e a súa continua actividade deportiva aos seus case 64 anos. Pedrosa conquistou máis de 20 campionatos galegos en diversas modalidades de atletismo e participou en máis de 15 competicións mundiais. No último ano logrou senllas medallas de bronce en 1.500 metros, 3.000 metros e cross nos Mundiais Máster disputados en Gotemburgo (Suecia). O seu exemplo de constancia e superación foi especialmente aplaudido na gala. O futbolista compostelán Borja Iglesias, actualmente no Real Club Celta, recibiu o premio ao mellor deportista masculino en categoría absoluta. Iglesias foi o único xogador do equipo celeste en participar en todos os encontros ligueiros até o momento no presente curso. E a pasada tempada proclamouse campión da Bundesliga e da Copa de Alemaña co Bayer Leverkusen, co que non chegou a disputar demasiados minutos. Agora, ás ordes de Claudio Giráldez, está a recuperar o seu mellor fútbol. O premio recolleuno no seu nome a súa nai, Maite Quintás. Na categoría de deportista feminina de base o premio foi para a ciclista Alejandra Neira Domínguez, do Club Baqué. Neira coroouse campioa cadete do Estado tanto en ruta como na proba contra o reloxo e formou parte da selección estatal júnior, consolidándose como unha das grandes promesas do ciclismo nacional. A súa progresión deportiva nos últimos anos fai prever un futuro brillante para ela, que recibiu o premio con grande emoción e agradecemento. Olivia Gutiérrez e Joel Santana, as dúas novas perlas do histórico David Gómez O recoñecemento ao mellor deportista masculino de base recaeu en Iván Gutiérrez Mosquera, do club Ximnasia Rítmica Compostela. Gutiérrez obtivo a medalla de bronce no Estatal individual de ximnasia rítmica e mais en ximnasia acrobática en parella mixta alevín, ademais de proclamarse campión galego individual e por conxuntos en rítmica. O seu esforzo e dedicación foron recoñecidos con grande entusiasmo polo público asistente. No ámbito do deporte adaptado, Emilio Agüera Vozmediano, atleta de tríatlon do Club Santiago Inforhouse, foi recoñecido tras proclamarse campión estatal de Dúatlon na clase PTWC. O seu compromiso co deporte adaptado e a súa traxectoria en competicións nacionais e internacionais fixérono merecedor deste recoñecemento. Agüera representa un exemplo de superación e dedicación, sendo unha inspiración para moitos e moitas deportistas. O Club Hóckey Raxoi foi distinguido como o mellor club deportivo, mentres que o premio ao mellor equipo recaeu no equipo feminino do Club de Rugby Santiago. O compromiso destes dous conxuntos co desenvolvemento do deporte local foi un dos aspectos máis destacados da gala. Na categoría de mellor centro educativo, o gañador foi San José de Cluny, polo traballo dos seus equipos de baloncesto. Un recoñecemento que foi entregado por Yuri Carrazoni, subdirector de Nós Diario, xunto á directora adxunta de Radio Líder en Compostela, Ángela Mosquera. Na de adestrador ou adestradora máis destacada a elixida foi María Fernández Cañabate, polo seu traballo no club Ximnasia Rítmica Compostela. A gala tampouco esqueceu o traballo dos e das árbitras, premio que levou Judith Trasancos Blanco, colexiada de baloncesto. O galardón ao mellor patrocinador deportivo foi para a empresa Limpiezas Salgado SL, en recoñecemento ao seu apoio continuo ao desenvolvemento do deporte na cidade. O compromiso do tecido empresarial coas iniciativas deportivas foi resaltado como un dos piares fundamentais para o crecemento e a consolidación das diferentes disciplinas en Compostela; como tamén o é a acción social e as actividades arredor do deporte, polas cales se premiou a ADB Fontiñas, unha iniciativa do colaborador de Nós Diario Adrián Dios Vicente, polo seu traballo cos mozos e mozas de Malí e Senegal refuxiados na cidade. E tamén se lle dedicou, un ano máis, un agradecemento á Policía Local e a Protección Civil polo seu papel nos eventos deportivos. De invisíbeis a referentes: o 'break' crece malia caer do programa olímpico A "boa saúde" do deporte na capital galega Goretti Sanmartín foi a encargada de fechar a gala parabenizando unha por unha todas estas “persoas magníficas, claras merecedoras deste recoñecemento que lles concedemos e activos indispensábeis nesta tarefa común que temos todas nós, desde as administracións ás entidades e ás deportistas, de implicármonos para construír esa Compostela máis xusta, máis igualitaria, máis orgullosa”. Tamén recordou que “o deporte é aprendizaxe, esforzo, solidariedade, apoio, disciplina, afouteza, perseveranza, compañeirismo, referencialidade, comunidade, decisión, visión de conxunto e implicación”. A rexedora destacou dous fitos dos Premios do Deporte: “O primeiro, recoñecermos persoas e entidades que nos axudan a facer de Compostela un concello mellor promovendo a saúde, a participación cidadá, a creación de redes de apoio social e a dinamización dos barrios e parroquias. A segunda, celebrar o vivo e forte que está o tecido deportivo do noso concello, que goza dunha boísima saúde e que non deixa de darnos motivos para sentirnos orgullosas, colectivamente, de todo o que conseguimos”.