Comeza a pretempada cun mercado moi movido

Após as vacacións, cos clubs empezando a moverse no mercado de fichaxes, a representación galega nas categorías profesionais do fútbol estatal volta ao traballo. O primeiro en incorporarse será o Celta, que desde estaterza feira e até mañá convocou os xogadores para pasar as pertinentes probas médicas. Os adestramentos comezarán pasadomañá ás 10.30 horas na Cidade Deportiva Afouteza, en Mos. Coa camiseta celeste estrearanse Andrei Radu e Ferran Jutglà, e continuará a portala Ilaix Moriba após o acordo alcanzado finalmente co Leipzig para o seu traspaso. Claudio Giráldez prepara o asalto a Europa sen algúns dos xogadores que marcaron a pasada tempada, caso de Alfon e Fer López, e sen outros que xa non contaban para o técnico porriñés como Guaita, Jailson e Manquillo. Ademais, voltarán –polo de agora– ao vestiario celeste seis xogadores cedidos a tempada pasada: Javi Rueda, Unai Núñez, Carlos Dotor, Joseph Aidoo, Carles Pérez e Manu Sánchez. O Celta suma o Stuttgart aos rivais que probará este verán na pretempada Tras remataren cesión, na dirección oposta, marchan Iker Losada e Borja Iglesias, ambos os dous do Betis. O futuro do compostelán dará moito do que falar este verán dado o interese do Celta por contar cos seus servizos, aínda que o club andaluz non está disposto a deixalo ir sen unha contraprestación económica. Antes de comezar a Liga Giráldez preparou cinco amigábeis, ante Braga (19 de xullo), Stuttgart (26 de xullo), Grasshopper (29 de xullo), Vitória (1 de agosto) e Wolverhampton (9 de agosto). Altas, baixas, cesións, renovacións e chegadas desde a canteira nos tres equipos profesionais galegos. Un Dépor con novo técnico Na Segunda División, o Deportivo anunciou a súa volta ao traballo o 7 de xullo e comezará a competición coincidindo coa mesma data que en Primeira. Entre as principais novidades está a chegada do novo adestrador, Antonio Hidalgo, en substitución de Óscar Gilsanz. O técnico catalán terá como obxectivo prioritario o ascenso, e para conseguilo o club herculino reforzouse coa incorporación de Jairo Noriega e a agardada renovación da súa grande estrela: Yeremay Hernández. Ante as baixas de Hugo Rama, Pablo Martínez e Jaime Sánchez incorporou, despois de estar cedidos, a Rubén López, Davo, Raúl Alcaina, Martín Ochoa, Luis Chacón e Diego Gómez. Ademais, o Dépor segue apostando pola canteira e sobe ao primeiro equipo Kevin Sánchez e Alberto. Non seguirán unha vez rematada a súa cesión Juan Gauto, Rafael Obrador nin Nemanja Tošić. O Dépor aposta na canteira e trae de volta o centrocampista Jairo Noriega Polo de agora, os coruñeses teñen dous amigábeis no calendario para botar a andar o equipo. Serán conxuntos da Championship –Segunda División inglesa–, os días 30 de xullo ante o Watford e 2 de agosto ante o Middlesbrough. Forte aposta na canteira coruñesa Na Liga F, as xogadoras do Deportivo están convocadas para se reincorporaren ao traballo de pretempada o 14 de xullo na Cidade Deportiva. Comezarán por someterse ás probas rutineiras a cargo dos servizos médicos do club ese mesmo día 14, e o seguinte, en Abegondo. Xa o 16, Fran Alonso dirixirá o primeiro adestramento sobre o céspede. O mercado estival protagonízano Olaya Rodríguez, procedente do Real Madrid, e Inês Pereira, cedida de novo polo Everton. O club decidiu prescindir dos servizos de Ayaka Noguchi, Ana de Teresa, Francisca Lara, Patrícia Hmírová, Elyse Bennett e Blessing Nkor. Neste caso apostou pola canteira, subindo do filial Paula Monteagudo e Elena Vázquez. A Liga comezará para elas o vindeiro 30 de agosto.