Christian Costoya corre a toda velocidade cara á elite do automobilismo

O automobilismo galego espertou este mes coa noticia da fichaxe, por parte de McLaren, do silledense Christian Costoya para o seu programa de desenvolvemento de pilotos. O anuncio sorprendeu a gran parte dos medios de comunicación do Estado español mais non na Galiza onde se segue a súa carreira desde cativo. Costoya entrará, desta maneira, a formar parte do actual líder mundial de construtores da Fórmula 1 e compartirá espazo co actual campión da F2, o italiano Leonardo Fornaroli, e o e o gañador da Copa do Mundo FIA F3 en Macao (República Popular da China), o neerlandés Richard Verschoor. Con todo, o galego será o máis novo destas incorporacións (15 anos) posto que os outros teñen 21 e 25 anos, respectivamente. A primeira competición na que terá oportunidade de mostrar a súa nova faceta será no Campionato F4 que decorrerá no Circuito Yas Mariña (Emiratos Árabes Unidos) entre o 16 e o 18 de xaneiro. Christian Costoya únese ao Programa de Desenvolvemento de McLaren Comezar de cativo Para coñecer como comezou este piloto, ninguén mellor que a persoa que o introduciu no mundo do automobilismo: Marcos Costoya, o seu pai. O tamén piloto de karts, prendeu a ilusión polos vehículos de catro rodas en Christian cando era un cativo de dous anos. "Comezou a gustarlle e decidimos mercarlle un kart pequeno", explica a Nós Diario. De xogo pasou a algo máis cando con catro anos inscribíronlle na súa primeira carreira."Fóiselle dando bastante ben e cada vez corría máis rápido e era lóxico que participara", relata o proxenitor. O camiño andado por Marcos Costoya facilitoulle a progresión nos diferentes circuítos galegos que existen na actualidade. "É un mundo algo complicado o das carreiras de competición de karting", recoñece Marcos. De inicio tivo claro cales eran os campionatos que lle interesan para o seu fillo e procurar aforrar nun deporte que segue a ser caro de practicar. "Hai algúns que son con motor monomarca e outros que limitan o uso de pneumáticos e é importante decidir cal queres", indica. Christian comezou a correr tamén fóra da Galiza, no Estado español e en Portugal. As vitorias en ambos os dous lugares abríronlle as portas a outras competicións a nivel mundial e así en 2018 tivo a posibilidade de correr en Brasil onde, con oito anos, quedou undécimo. Ao ano seguinte repetiu vitoria na península e accedeu a final en Italia. "Alí é onde se dá a coñecer aos fabricantes italianos", indica Marcos Costoya, malia que quedou en vixésimo segundo lugar. Após da pandemia viñeron os mellores resultados gañando en todas as categorías do kárting e entrou na súa vida Nicholas Todt, o seu mánager. Entrada en McLaren A entrada de Christian en McLaren era vista. "Fixo unha tempada moi boa, primeiro no ránking mundial absoluto do kárting e sempre foi o referente", sinala Marcos. Agora o paso lóxico é F4 e seguir evolucionado cara a F1. "Seguramente a partir de marzo, despois das carreiras en Oriente Medio, terá que ir vivir a Italia por ter que facer alí o campionato", asegura. Arranca motores nas Pontes o Galego de Karting Emoción e adrenalina Christian é contundente cando explica a Nós Diario o que significa para el ser piloto de carreiras. “É recibir un montón de adrenalina, emocións, sobre todo un momento onde o pasas moi ben e es moi competitivo”, afirma. Dos inicios, lembra que era un deporte que realizaba “para pasalo ben” mais cos anos, e os cambios de categoría e de nivel, fixeron que aumentase a competitividade. Niso ten como espello "desde pequeno" a Charles Leclerc pola "súa maneira de ser e como traballa". Sobre a súa entrada en McLaren, Christian considera que será "un cambio bastante grande, sobre todo a nivel de condución, sen esquecer que os circuítos nos que competirei agora son máis grandes e vaime levar un tempo coller confianza". Parabéns da Federación Entre as felicitacións que está a recibir estes días Christian Costoya está a da Federación Galega de Automobilismo (FGA). O seu presidente, Antonio Rodríguez Troitiño, recoñece a súa "amizade persoal" coa familia e amosa o "orgullo que representa para nós e para o automobilismo galego este paso que agora dá". Ademais, valora o salto que dá o piloto silledense "como espello para os que están agora mesmo correndo en categorías inferiores". Neste sentido, lembra que nestes últimos catro anos houbo "un maior seguimento" desta modalidade "á que lle demos un revulsivo, mudando moitas cousas desde a federación após certo abandono anterior". O presidente da FGA recoñece que esta modalidade é cara. "A sorte que tivo Christian, ademais da súa valía, foi que chegou ao sitio xusto, gañando e conseguindo que se fixaran nel para que apostaran pola súa carreira, senón sería imposíbel conseguilo", conclúe. Xesús Ferreiro, campión europeo de rallies históricos: "Hai que coidar a cultura do automobilismo e facer que non se perdan os clásicos" A necesidade na Galiza dun circuíto propio de competición Desde a FGA valoran a transcendencia do paso que deu agora o piloto silledense para continuar a súa continuidade na alta competición e como chegou a conseguir os éxitos na súa traxectoria. "Fíxoo con moito sacrificio, tendo en conta de que aquí, por desgraza, non temos nin un circuíto de velocidade onde se poida correr con fórmulas", sinala a Nós Diario o propio Antonio Rodríguez Troitiño. "Contamos con circuítos para a base por toda Galicia mais non hai para que os nosos deportistas poden chegar á cotas superiores", agrega. Por iso recoñece o esforzo que se fixo con Christian Costoya "para levalo por outros circuítos do Estado español, Portugal, Italia e medio mundo". Aposta rendíbel A FGA tivo varios proxectos de circuíto de velocidade enriba da mesa e agora, segundo apunta o seu presidente, están traballando tamén niso. "Creo que é fundamental a axuda pública e que sexa unha instalación rendíbel, hai que ter en conta que no norte da península non temos ningún", afirma. Preguntado polas características do lugar onde debería estar situado este circuíto, Rodríguez Troitiño pon como prioridade que sexa "moi accesíbel, que teña perto un aeroporto e un hospital dun nivel alto".