O Celta, a piques de evitar vendas dolorosas antes do 30 de xuño

O Celta está asinando unha tempada moi por riba das expectativas marcadas en agosto e incluso superior ás visións máis optimistas. Claudio Giráldez recoñeceuno hai unhas semanas en rolda de prensa, aínda que o técnico sinalou que a súa confianza no equipo sempre foi altísima, polo que tampouco lle estaba a sorprender o rendemento dos seus xogadores. Con todo, no club vían "moi difícil" repetir o sétimo posto en Liga conseguido o curso pasado e asinar unha gran Europa League ao mesmo tempo. A realidade estalles dando unha alegría.

A falta de dous meses para que remate a tempada, os vigueses marchan sextos no campionato doméstico e teñen a tiro o quinto posto, que case seguro dará acceso a xogar a Champions League na 26/27. Ao mesmo tempo, disputarán os cuartos de final da competición continental fronte o Friburgo en abril. O bo facer sobre o terreo de xogo tamén ten repercusión na economía, e é que na Sede fregan as mans co diñeiro conseguido estes meses e xa ven o próximo mercado de fichaxes dun xeito moi distinto a como o facían a principios de ano.

A economía do Celta é sólida. Moitos clubs envéxana e incluso LaLiga encargouse de póla como exemplo para outras entidades. Hai tempo que os vigueses non teñen débedas e son dos poucos que puideron aumentar notabelmente o seu límite salarial nos últimos anos, crecendo case un 30% nese aspecto. Con todo, os últimos exercicios foron malos e remataron en números vermellos, con perdas de case 30 millóns de euros nas tres últimas tempadas. Para evitar que iso ocorrese na presente, na Sede orzamentaron ingresos extraordinarios por 32 millóns de euros antes do 30 de xuño. E cando o fixeron, pensaron principalmente na venda de xogadores, algo que xa tiveron que facer tanto en 2024 como en 2025.

Co traspaso de Gabri Veiga en 2023, o Celta asumiu unha serie de gastos que antes non tiña e que o ‘obrigaban’ a xerar uns ingresos que non conseguiu obter. Por todo iso e para que o burato non fose maior, o club vendeu Strand Larsen en 2024 por 30 millóns de euros e fixo o mesmo hai case un ano con Fer López, que asinou polo Wolverhampton a cambio de 23 millóns de euros. Este ano, a cifra fixada na Sede ascendía até os 32 ‘kilos’ e moitos xa debuxaban que nomes poderían saír para conseguir esa cantidade. Con todo, a realidade mudou por completo en Vigo e no club xa deixan entrever que están a un paso de poder evitar a marcha das súas estrelas.

Eses 32 millóns iniciais reducíronse case á metade entre o avance do equipo na Europa League e algúns movementos do mes de xaneiro. A cifra hoxe en día, iso si, non é exacta xa que na Sede aínda descoñecen a cantidade concreta que a UEFA lles dará finalmente polo chamado Value Pillar, que é unha cifra que se obtén combinando o valor de mercado da televisión e o rendemento histórico do club para premiar os equipos que máis axudan ao valor global do torneo. A Real Sociedade, por exemplo, conseguiu un pouco máis do que pensaba a tempada pasada por chegar até oitavos de final na mesma competición.

Friburgo

O Celta gañou esta tempada máis de 18 millóns de euros pola súa participación en Europa. Inicialmente orzamentara uns 10, polo que todo o que estea por riba desa cantidade son ingresos extraordinarios, xusto os que necesita conseguir na famosa cifra a alcanzar antes de que remate xuño. A iso hai que engadir o conseguido por venda de entradas e outros aspectos nos duelos ante PAOK e Olympique de Lyon das eliminatorias. Agora toca medirse ao Friburgo, unha eliminatoria que tamén deixará algo de diñeiro en Vigo e que pode fechar as portas de maneira definitiva a ter que asinar unha grande venda nos próximos meses.

Se o Celta consegue eliminar os alemáns o 16 de abril en Balaídos, asegurarase 4,2 millóns de euros por disputar as semifinais, unha cantidade á que tocaria sumar outras partidas que poderían disparar os ingresos por riba dos 5 millóns de euros, deixando esa obrigación de vender futbolistas nuns 10 ‘kilos’. E en Vigo pensan que poden chegar a esa cantidade sen ter que desprenderse dos seus xogadores máis importantes ou valiosos, senón asinando algúns traspasos menores por futbolistas de rotación. Sen dúbida, un alivio de cara ao mercado de fichaxes e ao equipo da tempada que vén.

Xaneiro

O mes de xaneiro tamén axudou moito á economía do Celta. O club tiña previstos poucos movementos no pasado mercado, pero a realidade foi distinta. É certo que realizou gasto nas contratacións de Fer López, Matías Vecino e Álvaro Núñez, pero os beneficios foron maiores coas saídas. Fran Beltrán e Luca de la Torre deixaron cantidades pequenas que permitiron ao club cadrar as súas amortizacións, mentres que a venda de Tadeo Allende ao Inter Miami deixou beneficios no presente e no futuro, xa que o Celta gardou unha elevada porcentaxe dun futuro traspaso do arxentino. A maiores, a saída de Bryan Zaragoza cara á Roma deixou en Vigo uns 3 millóns de euros, ademais dun forte aforro no seu salario entre febreiro e xuño.

Seis xogadores internacionais desde o banco dos celestes

O Celta afronta hoxe o seu último adestramento da semana antes de que o vestiario desfrute duns días de descanso. Con todo, algúns xogadores si que terán que competir a partir de hoxe coas súas respectivas seleccións, e tres deles xogarán entre hoxe e a próxima terza feira a súa presenza no Mundial que se disputará no verán. Son os casos de Starfelt e Swedberg con Suecia e de Ionut Radu con Romanía.

A parella nórdica xogará hoxe ante Ucraína a semifinal da repesca mundialista, e, se consegue vencer, xogará a súa participación na Copa do Mundo ante o gañador do duelo entre Polonia e Albania. O porteiro, xa recuperado das molestias no xemelgo, terá esta tarde un difícil partido en Turquía. Se logra vencer en terras otomanas, o último encontro para clasificarse será ante o gañador de  Kosovo-Eslovaquia.

Non son os únicos internacionais que ten o Celta neste paro de seleccións. Borja Iglesias volveu ser convocado co combinado estatal, Fer López coa Sub-21 e Jones El-Abdellaoui coa Sub-23 de Marrocos. Quen finalmente non viaxou con Guinea foi Ilaix Moriba, que sofre unha tendinite no xeonllo e o corpo médico decidiu que o mellor para a súa recuperación era permanecer en Vigo para tratarse cos fisioterapeutas do club.