O Celta busca consolidar o seu soño europeo ante unha Real en horas baixas

Terza feira e 13, pero se este Celta puido gañar ao Sevilla o sábado tras a expulsión -pódese dicir que polémica- de Marcos Alonso e cun penalti que puña as táboas para acabar impóndose por 3-2, nin lóxicas nin supersticións son máis fortes que os celestes e a súa ‘afouteza e corazón’. A estas alturas da Liga, a falta de 3 xornadas e con 9 puntos en xogo, cada partido é case unha final, algo que non é novo en Balaídos mais que, a diferenza das últimas tempadas, gózase desta volta máis do que se adoitaba sufrir. A loita polo soño europeo fronte á permanencia é un motivo moito máis agradecido e co que o equipo de Claudio Giráldez podería pór a matrícula de honra a unha tempada que, pase o que pase, xa ten o aprobado asegurado. Comeza a batalla polos postos europeos: o Celta defenderá a súa vantaxe contra o Sevilla A esta cita os celestes chegan tras unha nova vitoria que lles permite seguir dependendo de si mesmos para optar a Europa. Esta terza feira, sétimos con 49 puntos -con dous de vantaxe sobre Raio Vallecano e Mallorca-, lograrían o billete para a Europa League oito anos despois dunha última aventura que terminou co equipo caendo en Old Trafford ás portas da final con aquela inesquecíbel xogada de Beauvue e Guidetti. Para este partido Giráldez non poderá contar cun fixo nos seus sempre imprevisíbeis onces, Marcos Alonso, expulsado con cartón vermello por unha man na área no encontro do sábado. Tampouco estarán aínda dispoñíbeis Starfelt e Jailson, por lesión. Con quen si semella que poderá contar o técnico porriñés é Pablo Durán, pois, malia saír en padiola do céspede de Balaídos o sábado por unha contusión costal, todo semellou quedar nun susto. Aínda que non adestrou o domingo, si o fixo esta segunda feira e puido entrar na convocatoria para o partido en Donostia. Na aliñación do Celta para este partido pódense agardar cambios, malia que acertar cos plans de Giráldez sempre é complexo. Con dous encontros tan seguidos, en apenas catro días e no tramo final xa da tempada, ten sentido agardar que Sergio Carreira, Fer López e Alfon, que non tiveron minutos o pasado sábado, poidan regresar esta terza feira ao once titular. “Sabemos que temos que repartir cargas, sobre todo nas posicións máis sensíbeis”, asegurou esta segunda feira Giráldez. Borja Iglesias, que saíu como recambio ante o Sevilla, podería ser tamén quen encabece a dianteira do Celta ante a Real Sociedade, aproveitando así mesmo o seu grande estado de forma, con 5 goles e unha asistencia nos últimos 4 partidos. Rotacións no Celta tras o grande esforzo ante o Sevilla A lesión de Carl Starfelt e a sanción de Marcos Alonso semellan asegurar a presenza no once de tres nomes de referencia da canteira na liña defensiva: Javi Rodríguez, Carlos Domínguez e unha das grandes revelacións deste tramo final da tempada, Yoel Lago. Polo carril esquerdo agárdase a outro dos baluartes imprescindíbeis de Giráldez, Óscar Mingueza, que chega tamén nun gran momento de forma logo de anotar o segundo gol ante o Sevilla. Mais outro dos nomes do momento no mundo celeste é o de Illaix Moriba. Escollido como MVP polo celtismo no último partido, estreouse como goleador e marchou de Balaídos coa afección coreando unha clara consigna: “Moriba, quédate”. Polo momento, semella que el, saíndo desde o inicio ou como recambio, é outra das pezas fundamentais nas que confía Giráldez. “É un xogador que nos dá moitos recursos porque é capaz de moitas cousas. Seguramente sexa o xogador noso que máis terreo abarca nesa liña de centrocampistas”, aseguraba o adestrador celeste en rolda de prensa. Así fica a carreira entre seis equipos polos postos europeos: o Celta parte con vantaxe O equipo celeste terá esta terza feira diante un rival en horas baixas mais con ganas de resarcirse. A Real chega tras unha dura derrota no Metropolitano, sufrindo a grande efectividade goleadora de Sorloth para a vitoria do Atlético de Madrid, grazas aos 4 goles co que o noruegués firmou un póker en apenas media hora de encontro. Unha derrota que deixa os donostiarras cada vez máis lonxe, pero aínda con opcións, de reengancharse á loita por Europa coa necesidade, imperiosa, de gañar ao Celta. Os de Imanol Alguacil sitúanse na duodécima praza, con 43 puntos; 6 menos que o Celta. Coa convicción de que este encontro pode ser a súa última bala, a Real Sociedade recupera a unha peza esencial do equipo como é Zubeldia. A dianteira donostiarra, encabezada por un Oyarzabal e acompañado por Kubo e Sergio Gómez, e desde máis atrás tamén polo ex céltico Brais Méndez, agarda facer dano nun dos puntos fracos do Celta: a facilidade coa que encaixa goles. Un debate, o da portaría celeste, latente nas últimas semanas e sobre o que Guaita semellou acalar as voces críticas con varias intervencións de mérito ante o Sevilla. O soño celeste podería converterse en realidade esta mesma semana. Se os de Giráldez conseguen facerse coa vitoria no Reale Arena e nin Raio Vallecano, nin Mallorca, nin València nin Osasuna gañan, o Celta certificaría a súa clasificación europea de forma matemática, pois o partido da última xornada que enfronta dous equipos metidos nesta loita, o Raio–Mallorca, faría imposíbel que os dous sumasen máis de 4 puntos. O Dépor seguirá un ano máis na Liga F Moi disputada pero xa certificada permanencia do Deportivo que, un ano máis, competirá na Liga F grazas ao empate colleitado ante o Sevilla grazas a un gol de Bennet no minuto 90, o que permitiu que as coruñesas sumasen un punto suficiente para aproveitar os tropezos de Betis e Valencia -ambos xa descendidos-. Riazor acolleu a importante cita das súas xogadoras e máis de 5.000 seareiros e seareiras achegáronse até o estadio para apoiar as branquiazuis, que ante a súa bancada e a falta de unha xornada para o final da Liga aseguran a salvación. O Dépor Abanca confirma a súa permanencia na Liga F tras empatar co Sevilla en Riazor Obxectivo cumprido nunha tempada complexa e convulsa que comezou cunha xeira de malos resultados que remataron por provocar o cese da até entón adestradora, Irene Ferreras, en xaneiro. O seu substituto foi Fran Alonso, quen mellorou os resultados e certificou a salvación, así como a súa continuidade.