As carreiras nocturnas mostran a outra cara do atletismo popular no verán

Co verán a actividade deportiva non para, e entre os deportes que non descansan está o atletismo. Alén das grandes competicións en recintos exteriores, as probas populares teñen cada vez máis aceptación e demanda, e nesta época tamén se adaptan ás circunstancias meteorolóxicas. É o caso das carreiras nocturnas como a que decorrerá este sábado polas rúas do casco histórico e a Alameda de Compostela dentro dos circuítos de carreiras saudábeis CorreSan. O evento contará con seis categorías diferenciadas con saídas e distancias diferentes. Ao feche desta edición a inscrición máis numerosa era a de Adultos (687 deportistas), que percorrerán 5 quilómetros e ten prevista a súa saída ás 22.30 horas, e a de Adultos dentro do campionato do circuíto CorreSan (473 deportistas), que sairá á mesma hora. Séguelles Escolares 2 (117 e 113, respectivamente), que partirán ás 22.05 horas. Por último, na categoría Escolares 1 hai 116 e 108, respectivamente, con saída ás 21.45 horas. Un calendario diverso que reflicte o crecemento do trail running na Galiza O percorrido, como noutras ocasións, terá a súa saída e chegada na praza do Obradoiro e contará con dúas distancias: a máis grande ten 2.500 metros aproximadamente e a máis pequena dispón de 750 metros. Lúdicas e seguras A singularidade deste tipo de carreiras chama a atención para quen non está afeito. Desde a Federación Galega de Atletismo, Claudio Hornillos explica a Nós Diario que, de inicio, estas probas non contan con ningún criterio técnico específico nin forman parte dunha programación particular. "Este tipo de competicións populares, con estas características, forman parte das actividades lúdicas que buscan os concellos galegos", asegura Hornillos. Neste sentido, lembra que as datas en que teñen lugar habitualmente, como a de Compostela, concéntranse no verán, "un momento en que aumentan as persoas visitantes, sexan turistas ou mesmo tamén emigrantes que pasan as súas vacacións coa familia". Con todo, a realización de noite tamén está relacionada coas altas temperaturas, que son cada vez máis habituais nos últimos anos nos meses de xullo e de agosto. "Tendo en conta que participan deportistas de idades moi variadas, as noites quedan como o momento ideal para correr sen perigo pola calor que hai de día", aclara. Na organización destes eventos, nos que colabora a Federación na maior parte das veces como acontece na desta fin de semana, non hai moitos cambios con respecto ás carreiras diúrnas. "É certo que hai menos iluminación, como é lóxico, durante os percorridos, mais como os trazados son normalmente por zonas urbanas non hai problema", sinala Hornillos. Con todo, recoñece que algúns concellos optan por botar man de máis presenza de voluntarios e voluntarias. "Facelo polo interior de vilas e cidades sempre é a mellor opción, por iso na Federación non contamos con probas que se realicen en zonas afastadas que poden ser perigosas sen a iluminación correcta", sostén. O circuíto de carreiras Corresan de Santiago achégase aos parques Outra das dúbidas que teñen moitas persoas é se as probas nocturnas contan con marcas oficiais que se contabilicen para as diferentes distancias. "Si, o funcionamento é o mesmo que en calquera outra das probas diúrnas", aclara. Outras probas Alén desta de Compostela, a Federación tamén colaborou na que decorreu o pasado 5 de xullo, a X Carreira Pedestre Concello de Cee (Nocturna), na comarca de Fisterra. Nela, sobre unha distancia de 10.000 metros, quedaron en primeiro lugar Víctor Ramos Sambade (Triki Team), cun crono de 00:30.14, e Tina Fernández Barreiros (SD Compostela Atletismo), cun tempo de 00:38.02. A semana anterior foi a carreira nocturna de Nigrán (comarca de Vigo), con dúas distancias diferentes: 5.000 e 10.000 metros. Na primeira gañaron Javier Rodríguez Casalmorte (Independente), cun reloxo de 00:17.56, e Rebeca Filgueira Conde (Triatlon Poio), que fixo 00:22.04. Na segunda chegaron en primeiro lugar á meta Pablo Pérez Lovaco (independente), con 00:35.15, e Leticia Barbosa Vieira (ADAS O Barco de Valdeorras), que rematou o percorrido en 00:40.06. Ademais, outras vilas e cidades da Galiza contan tamén con carreiras nocturnas moi concorridas. É o caso da cidade olívica, que reuniu este mesmo ano 650 deportistas de todas as idades na IX Nocturna Correndo por Vigo. Por último, completa o calendario deste tipo de carreiras a XX Nocturna de Celanova (na capital da súa comarca homónima), que decorreu o pasado 15 de xuño con saída e chegada na praza maior desta vila. Noutro caso, como é o de Ferrol no mes de setembro, tamén conta con este tipo de carreiras mais aínda non confirmou a data concreta en que terá lugar. Correlingua leva a festa do galego a once localidades: consulta aquí o programa completo Antolín Rey apadriña a Rinlo-Ribadeo Non todas as carreiras nocturnas decorren por vilas e cidades. Un exemplo é a Nocturna Rinlo-Ribadeo, que o 23 de agosto chega á súa sétima edición. A proba, organizada polo Club Atletismo Ribadeo, percorrerá 9 quilómetros unindo ambas as dúas poboacións. Nesta edición, o evento terá como padriño o ultrafondista Julio César Antolín Rey, un dos corredores máis recoñecidos no panorama internacional. O atleta, que completou 21 maratóns e máis dun cento de medias maratóns, participou en probas que xa son todo un clásico deste deporte a nivel internacional como son a Marathon des Sables (Marrocos), a Gobi March (Mongolia), a Atacama Crossing (Chile) ou a Ultra-Trail du Mont Blanc, organizada en Francia.