A canteira do atletismo galego individual cítase na Coruña

Máis de medio milleiro de nenas e nenos en representación de 59 clubs, tomarán parte durante esta fin de semana no Campionato Xunta da Galiza sub-10 e sub-12 individual que nas pistas Universitarias de Elviña, na Coruña. Neste campionato, que comezará o sábado as 10 horas e rematará ao día seguinte ás 20:30 horas, participarán atletas que naceran entre os anos 2014 e 2016. 

Desde a Federación Galega de Atletismo (FGA) sinalan que estarán presentes deportistas federados que lograsen esta tempada as marcas mínimas de participación estabelecidas para cada proba até un máximo de dúas probas individuais e unha de remudas. A nivel de programación, a categoría sub-12 competirán pola mañá e a de sub-10 en xornada de tarde.

Enfoque pedagóxico

Por tratarse das categorías máis de base que existen no atletismo galego, a federación informa que a  competición estará enfocada desde un punto de vista pedagóxico e de motivación para que "a través da propia competitividade se poida dar importancia aos grandes valores que emanan do deporte".

Ademais, como ben sendo habitual nestas categorías, aproveitarase pola parte de técnicos e técnicas para falarlles de cuestións e consideracións relacionadas co regulamento.

A entidade federativa galega  recoñece tamén que este "é un dos campionatos máis importantes de todo o calendario anual galego, na que a canteira máis nova do noso atletismo estará tomando parte". Por ese motivo salienta "o gran traballo que tanto adestradoras como adestradores están levando a cabo por todos os recunchos da nosa comunidade grazas aos cales, hoxe podemos presumir de contar cunha gran base sólida e numerosa de atletas de futuro".