O billar 'pool' comeza na Galiza unha nova tempada con boas expectativas

O billar como deporte na Galiza está a medrar cada ano que pasa. O concepto que se tiña antes de que era un 'xogo de bar' mudou grazas ao esforzo dos clubs e da propia federación por dignificar e atraer cada vez máis practicantes. Segundo os datos publicados polo Intituto Galego de Estatística (IGE), os últimos de 2024, en 2015 había 130 homes e 3 mulleres con licenza federativa. O ano pasado a cifra aumentou até 176 homes e 20 mulleres. Tamén se duplicou o número de clubs que pasou de ser 14 en 2015 até 33 o ano pasado. Das tres modalidades de billar que se practican na Galiza e que abordan na Federación Galega de Billar (FGB) -Pool, Snooker e Carambola- a máis popular é a primeira, tamén denominada billar americano. Do seu auxe dan conta os 23 clubs que o practican, entre os que figuran como máis sinalados o CB Teo, o CB Manhattan, o CB Adai, a Academia Poolroom, o CB Rías Baixas e CB Xove. Estas entidades deportivas serán as que acollan desde este mes as probas dos circuítos galegos absoluto, feminino e júnior. A Liga Galega de Billarda consolídase no panorama deportivo Competicións A nivel galego a FGB promove estes tres circuítos que, á súa vez, clasifican aos xogadores e ás xogadoras do país que participen nas Copas de España de Absolutas, Júnior, Femininas e Senior organizadas pola Real Federación Española de Billar (RFEB) no Estado español. Ademais, cada competición ten diferentes disciplinas eon regras diferentes segundo se practique Bola 8, Bola 9, Bola 10 ou 14.1. Está última conta non ten moita presenza na Galiza mais incorporarase este ano dentro do calendario galego. Absoluto e feminino O Circuíto galego absoluto é a competición máis consolidada na Galiza, con case 200 deportistas inscritas, e tamén a primeira en comezar. Fíxoo esta pasada fin de semana e nela estiveron 168 participantes. Ao remate a clasificación permitirá estar presentes nos Campionatos de España que terán lugar en Sevilla (Andalucía) do 18 ao 31 de maio, ademais de clasificar unha selección galega para a competición estatal de seleccións autonómicas. Ademais, unha 5ª Copa de España Absoluta decorrerá do 1 ao 3 de maio de 2025 no CB Teo. Do crecemento do billar pool na Galiza fala tamén o vocal da FGB, e tamén xogador, Adrián Trillo. "Nesta primeira xornada tívose que mudar un pouco o formato para que participara todo o mundo", recoñece en declaracións a Nós Diario. Xosé Fernando Díaz, propietario do café-bar Na Lúa: "Aínda que feche o bar, sempre manteño aberto o salón de billar" De favoritos para esta tempada, ademais de Álvaro García, Telmo Torres, Héctor del Amo e Diego Rey, este membro da federación pon énfase nun xogador moi novo -15 anos- que recen saído do circuíto júnior quedou terceiro no Campionato estatal absoluto: Álvaro Lama-Pereira. O Circuito galego feminino, pola súa parte, clasificará para os Campionatos galegos femininos. A federación apostou forte nos últimos anos, por exemplo traendo a 1ª Copa de España feminina que decorrerá a próxima fin de semana no CB Rías Baixas da parroquia meañense de Dena (comarca de Pontevedra) e os Campionatos de España femininos 14.1, Bola 8, Bola 9 e Bola 10 que acollerá o CB Adai do 8 ao 14 de xuño de 2026. Sobre a situación do billar feminino opina a súa responsábel no CB Adai do Corgo (comarca de Lugo), Belén Encabo. "A nivel galego é moi positiva en comparación co resto do Estado español", indica a Nós Diario. Pon como exemplo que no circuíto estatal de nas copas participan normalmente "unhas 25 xogadoras e delas 40% son galegas". Esta "forza" que ten o billar pool feminino fixo que este ano a Real Federación Española de Billar (RFEB) decidise, "despois de moitos anos", traer a Galiza os campionatos estatais. Entre os nomes que destacan, Encabo apunta a María Teresa Ropero, "unha mallorquina que reside en Compostela desde hai varios anos e participan normalmente en competicións internacionais. "Acaba de xogar os World Games na China, que son o equivalente aos Xogos Olímpicos xa que por agora non somos deporte olímpico, e o mes pasado quedou 8ª do mundo", sinala Encabo. Adrián Trillo Barca: "Galiza, en comparación co resto do Estado, é onde hai mellor billar" Sen instalacións públicas Malia chegar os éxitos neste deporte, desde os clubs e a federación bótase en falta unha aposta máis decidida das Administracións. "Hai axudas para material, como en todos os deportes, mais o que precisamos é que haxa instalacións públicas", considera Trillo. Explica que no caso da maioría de clubs deportivos "como é o caso do fútbol ou a natación" os lugares onde se practican están construídos e mantidos por institucións que "ceden" despois para que se utilicen. "Os clubs non constrúen piscinas ou polideportivos e no noso caso tivemos que facelo para poder medrar", aclara. Na súa opinión por ese camiño estaría que o billar 'pool', e o billar en xeral, seguise avanzando. A canteira do billar pool peta na porta cada vez máis forte O Circuito galego júnior está a coller gran relevancia nos últimos anos debido ao aumento do deporte base neste deporte. Cunha media de 25 xogadores e xogadoras júnior (cando a media estatal é de 50 en activo), os nenos e as nenas clasificaranse para participar nos Campionatos de España júnior que este ano decorrerán no País Valencià e os Campionatos galegos júnior en Lugo. Unha das probas do seu bo momento é a traxectoria do compostelán Lama-Pereira, cunha gran traxectoria júnior ás súas costas entre a que destacan numerosos títulos a nivel galego e estatal, así como presenza internacional. Relevancia galega Pola relevancia do deporte base na Galiza terá lugar a 4ª Copa de España júnior do 1 ao 3 de maio de 2025 no CB Teo (comarca de Compostela). Ademais, a tempada pasada a RFEB realizou nas instalacións CB Teo a I Tecnificación Deportiva de Pool Júnior que formou aos mellores xogadores e xogadoras do Estado español. Outra das experiencias pioneiras na Galiza foi a realización por parte do CB Adai do I Campamento de Verán de Billar do país, aproveitando a súa localización nunha contorna rural lonxe da cidade, algo pouco habitual nos clubs e entidades neste deporte.