O Atlético Guardés promete loitar e "non renderse nunca" na nova tempada

O Club Balonmán Mecalia Atlético Guardés presentouse esta quinta feira, un ano máis por estas datas, en sociedade. Ante un auditorio de San Bieito –nesta localidade do Baixo Miño– entregado, representantes da directiva e dos diferentes equipos fixeron balance da pasada tempada e valoraron o momento actual, ademais de daren a coñecer algunhas novidades, como o novo equipamento do primeiro equipo ou a composición da base, entre outras. Precisamente en representación deste último departamento do club, no acto interveu a nova coordinadora da canteira, Lucía Cruces. A tudense chegou este ano ao cargo tras dous como xogadora e adestradora de distintas categorías da base. Nun breve discurso de agradecemento inicial á directiva por confiar nela, tamén lembrou Fabio Lima, o seu predecesor, "por deixar o posto tan traballado e tan sinxelo para coller a remuda". Ademais, declarou a súa intención de "continuar coa liña metodolóxica común" que se estaba a implantar en todos os equipos da base, fundamentada na combinación "do desenvolvemento deportivo coa formación integral das xogadoras". O Atlético Guardés estrease ante a súa afección co São Pedro do Sul e o Bera Bera Ana Seabra Nunha segunda parte da presentación o protagonismo pasou ao primeiro equipo. Por iso principiou falando a súa adestradora, Ana Seabra, como responsábel despois de dúas tempadas á fronte do corpo técnico. "Comezamos este novo ciclo con motivación, esperanza e moita ambición, co compromiso de ser, coma sempre, un grupo traballador, competitivo e que nunca se rende", asegurou na súa intervención. A adestradora portuguesa deixou claro que os obxectivos desta tempada son "consolidar a identidade do club, formar valores nas xogadoras máis novas, competir con respecto e dedicar cada esforzo a unha vila que xa demostrou merecer o mellor de nós". Neste sentido, describiu o enfoque do equipo como "centrado no traballo diario" e na unión do grupo cara a un propósito común. "Sabemos que non sempre gañaremos, pero podo garantir que nunca deixaremos de loitar. A confianza será a base do noso camiño", sinalou. María Sancha En representación das xogadoras do primeiro equipo participou no acto a súa nova capitá, María Sancha, que leva cinco tempadas defendendo as cores do Guardés e esta será a primeira na que estará no cargo que herdou de Míriam Sempere. Emocionada e ilusionada, a palentina tivo unhas primeiras palabras de agradecemento "á directiva do club, ao corpo técnico e a todas as miñas compañeiras pola confianza que depositaron en min". "Ser a capitá é un orgullo e unha responsabilidade que me motiva e ilusiona. Hai cinco anos, cando cheguei aquí, nunca imaxinei que estaría falando nesta presentación como capitá", afirmou, en galego, ao comezo do discurso. A capitá do Guardés pediu á afección miñota, "aínda que quizais ás veces as cousas non saian como queremos", a confianza no seu "compromiso de deixarnos a pel, loitar, suar e baleirarnos en cada adestramento e cada partido para poder deixar o club no máis alto, onde merece estar". Guardés, Gran Canaria, O Porriño e Braga xogarán o Memorial Julio Gilsanz No seu discurso non faltou unha especial lembranza "ás pequenas empresas, patrocinadores e autoridades locais, posto que sen elas este club non podería saír adiante como o leva facendo tantos anos". Tampouco esqueceu nomear na súa intervención a peña O Inferno, "pola súa insaciábel e incansábel maneira de animarnos, por estar ao noso carón alá onde imos, axudándonos a erguernos e acompañándonos sen parar de tocar". Jesús López Rematou o acto en nome de toda a directiva da entidade miñota o presidente do club, Jesús López. A súa disertación comezou coa lembranza de Juan Rodríguez, presidente honorífico da entidade deportiva falecido xusto un ano atrás, a quen "tivemos no recordo durante toda a tempada, buscando facelo sentirse orgulloso do club polo que con tanto agarimo e esforzo traballou durante moitos anos". Por iso, recordou que, "se podemos celebrar o décimo cuarto ano consecutivo na elite do balonmán feminino español, é grazas ao seu legado". Por último, o presidente declarou a súa ilusión pola nova tempada, mais tamén moito esforzo debido á volta á EHF European Cup. Loou os méritos deportivos das xogadoras mais lamentou o seu 'non' á Europa League por motivos económicos. "Con moita mágoa tivemos que rexeitar a praza na maior categoría que nos correspondía, pero quixemos apostar polas nosas posibilidades na EHF European Cup –terceira competición continental–, aínda con todo o que supón", confirmou. Para rematar, insistiu na importancia de competir e de seguir medrando, "pero non podemos facelo sen unha masa de xente e de patrocinadores detrás", dixo.