Aspas decide en Mendizorrotza e o Celta prolonga a súa xeira triunfal fóra da casa

O Celta continúa a vivir un momento doce lonxe de Balaídos. O conxunto de Claudio Giráldez impúxose este sábado o Alavés en Mendizorrotza por un axustado 0-1, nun encontro tenso e de poucas ocasións que resolveu Iago Aspas desde os once metros. O gol do capitán, que volveu asumir a responsabilidade nos momentos decisivos, permitiu aos celestes sumar a súa quinta vitoria consecutiva como visitantes, unha marca que non alcanzaban desde hai anos.

O Celta, sólido e paciente, agardou o seu momento e atopouno na segunda metade, cando o colexiado sinalou penalti por unha man na área tras revisión do VAR. Aspas, infalíbel, enviou o balón ao fondo da rede.

Nos minutos finais, o Alavés buscou o empate con centros laterais e balón parado, mais o conxunto galego mostrou orde e oficio, cun Andrei Radu novamente determinante baixo paus. Co asubío final, o equipo celeste celebra tres puntos de enorme valor que consolidan a súa reacción fóra da casa e reforzan a confianza dun vestiario que atravesa o seu mellor momento na Liga.

Coa única excepción do encontro inaugural da Liga ante o Xetafe (0-2), o equipo de Giráldez leva 16 partidos oficiais consecutivos vendo porta, unha das mellores racheiras do club nos últimos anos e un signo claro da transformación ofensiva que vive o cadro celeste.

Con esta vitoria, e coa xornada aínda sen rematar, os de Vigo sitúanse con 16 puntos na media táboa e a dous puntos dos postos europeos.

Aspas, goleador

O penalti convertido este sábado non só deu tres puntos: tamén reforzou a posición de Aspas como lenda viva do club, liderando unha das estatísticas máis simbólicas do fútbol estatal: sen contar Real Madrid e Barcelona, e con 165 tantos, Iago Aspas xa é o futbolista con máis goles en Primeira división nun mesmo club nos últimos 60 anos. O moañés continúa ampliando unha marca histórica forxada, única e exclusivamente, coa camisola celeste.