Aroa Fernández, xogadora do BM O Porriño: "Afrontamos as semifinais con máis ilusión que presión; imos a por todas"

—Este domingo disputarán unhas semifinais da EHF European Cup na súa primeira participación nunha competición continental. Que supón para o equipo? Estámolo vivindo con moita ilusión, con moito esforzo por parte de todo o equipo, tanto xogadoras como corpo técnico, e con moitas ganas de seguir sumando e de chegar aínda máis lonxe. —Botando a vista atrás, contaban con chegar até aquí? Desde o inicio marcámonos o obxectivo de chegar o máis lonxe posíbel, por iso decidimos participar na European Cup. Aínda así, a nosa filosofía sempre será ir partido a partido, sen precipitarnos nin mirar máis alá do próximo encontro. —Como xestionan os nervios e a presión de ver a final tan perto? Creo que xogamos con máis ilusión que presión, aínda que sempre hai ese certo nerviosismo ao estar ás portas de algo tan grande. De momento, todo vai ben, estamos moi contentas co camiño que percorremos até aquí e agora só temos que saír a dalo todo e ver que pasa. —A diferenza doutras eliminatorias nas que xogaron os dous encontros nunha mesma sede, desta vez disputan un partido na casa e outro fóra. Como o afrontan? O noso obxectivo é conseguir a máxima renda posíbel no Porriño. Queremos aproveitar o ‘factor casa’ e o apoio da nosa xente para lograr a maior vantaxe posíbel. E logo, cando viaxemos á República Checa, ter ese pequeno colchón que nos dea algo máis de tranquilidade para afrontar a volta. —O primeiro encontro será na casa, coa súa afección, que xogará un papel moi importante. Si, xogar na casa sempre é un luxo. O apoio da nosa afección é un plus para nós, dámoslle moitísima importancia porque sentimos que é como se xogásemos cunha xogadora máis. —O seu rival é o Lázně Kynžvart da liga checa. Cales serán as claves desta eliminatoria que comeza este domingo co partido de ida? Vai ser un partido moi duro. Teñen xogadoras moi grandes e cun gran físico, destacan polo seu excelente lanzamento exterior, definen moi ben os espazos en ataque e son capaces de facer transicións moi rápidas no xogo. As claves estarán en minimizar as perdas de balón para evitar que poidan correr e en impor nós o ritmo que queremos que teña o partido. —Tiveron tempo para analizar o seu rival e preparar ben o partido? Moi ben. A verdade é que Isma [Martínez, o adestrador] sempre fai un gran traballo á hora de analizar os rivais, e puidemos ver moitas imaxes do Lázně, tanto na súa participación na European Cup como na liga checa. —Antes desta European Cup co BM O Porriño, xa tivera unha breve experiencia en Europa co Atlético Guardés, e todo isto con tan só 19 anos. Como o viviu sendo tan nova? É unha experiencia incríbel, e ao ser tan nova vese doutra forma. Ao principio semella algo case imposíbel, pero cando te dás conta xa o estás vivindo, e falo con moitísima ilusión. Tamén é certo que a miña participación no xogo é diferente á das miñas compañeiras, pero igualmente é unha aprendizaxe brutal. —Queda un mes e medio de competición por diante, con oito partidos e mais os play-off e unha posíbel final da European Cup. Como chega o equipo ao treito decisivo da tempada? Tentamos xestionar ben os tempos de adestramento e de recuperación para que, sobre todo, o corpo estea ao 100%. Estamos moi ilusionadas e con moitas ganas de ir a por todo, evidentemente. —Esta última semana viuse truncada pola derrota en Liga ante o Elx e a eliminación na Copa... É certo que vimos dunha semana un tanto dura, pero xa estamos enfocadas no que vén, coa vista posta nesta ida de semifinais da European Cup. Deixamos atrás o vivido na Copa da Raíña e a derrota en Liga e agora estamos centradas no que realmente toca. —A pesar desta última derrota están a firmar unha brillante tempada na Liga e tamén nesta European Cup. Soñan no Porriño con loitar por dous títulos? Nós sempre imos partido a partido, pero evidentemente imos a por todo. A verdade é que nos gusta meternos en todos os retos que poidamos e, vendo como vai a tempada, si que nos propomos loitar polos dous títulos. Iso si, sempre con calma, paso a paso. —Este é o seu segundo curso no Porriño. Como o viviu? Foi incríbel. Traballamos moitísimo durante toda a tempada, con moita intensidade e compromiso. Desde o inicio tivemos claro que queriamos competir ao máximo nivel, e creo que o grupo humano que formamos dentro do equipo foi clave para que todo funcionase tan ben. A convivencia é excelente, hai unha gran conexión entre todas, e iso nótase en cada adestramento e en cada partido. Estou moi contenta, tiven moitos minutos e estou feliz de estar aquí. —E no plano individual? Estou moi satisfeita co meu rendemento esta tempada. Os minutos que Isma me deu en pista tratei de aproveitalos ao máximo, sendo sempre competitiva e axudando o equipo en todo o que puiden. Ademais, tamén estou a xogar co equipo de [División de] Prata, así que moi ben. A 120 minutos da gran final: a batalla comeza no Porriño O Conservas Orbe Zendal BM O Porriño afronta o domingo a ida das semifinais da EHF European Cup contra o Lázně Kynžvart checo (19 horas, Pavillón municipal do Porriño). Este primeiro enfrontamento será transcendental para o conxunto galego, que tratará de conseguir unha boa renda de cara ao partido de volta, que se xogará o vindeiro sábado. Para o enfrontamento deste domingo o adestrador, Ismael Martínez, non ten ningunha xogadora na enfermaría, mais si se mantén a dúbida da extremo dereita madrileña Daniela Moreno que se reservou na Copa da Raíña para poder chegar en condicións a esta eliminatoria. As porriñesas superaron para chegar até aquí catro roldas eliminatorias perdendo apenas un dos oito encontros disputados até o momento.